شىمكەنتتەن 200 دەن استام ادام جۇمىس كۇشى تاپشى وڭىرلەرگە كوشتى
شىمكەنت. KAZINFORM - جىل باسىنان بەرى شىمكەنت قالاسىنان 48 وتباسى ەرىكتى تۇردە قونىس اۋدارۋ باعدارلاماسى اياسىندا ەلدىڭ ەڭبەك كۇشى تاپشى وڭىرلەرىنە كوشتى. بارلىعى 206 ادام قونىس اۋدارعان.
قونىس اۋدارۋعا ەڭ بەلسەندى قاتىسقان - قاراتاۋ اۋدانىنىڭ تۇرعىندارى. بۇل اۋداننان 27 وتباسى (113 ادام) كوشكەن. ال اباي اۋدانىنان 12 وتباسى (46 ادام) باعدارلاماعا قاتىسقان. ءال-فارابي جانە ەڭبەكشى اۋداندارىنان ءۇش وتباسىدان (جالپى 32 ادام)، سونداي-اق تۇران اۋدانىنان ءۇش وتباسى (15 ادام) قونىس اۋداردى.
قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ مالىمەتىنشە، شىمكەنتتەن كوش تۇزەگەن ازاماتتاردىڭ باسىم بولىگى سولتۇستىك قازاقستان وبلىسىن تاڭداعان. بۇل وڭىرگە 20 وتباسىنىڭ 92 مۇشەسى كوشكەن.
- سونىمەن قاتار قوستاناي وبلىسىنا 10 وتباسىداعى 40 ادام، پاۆلودار وبلىسىنا جەتى وتباسىنىڭ 31 مۇشەسى تۇراقتادى. شىعىس قازاقستان وبلىسىنا سەگىز وتباسىنىڭ 30 ادامى، قاراعاندى وبلىسىنا ەكى وتباسىنىڭ سەگىز ادامى، ال اباي وبلىسىنا ءبىر وتباسىنىڭ بەس مۇشەسى قونىستاندى، - دەپ حابارلادى ۆەدومستۆو.
قونىس اۋدارۋشىلاردىڭ ىشىندە بالالاردىڭ ۇلەسى باسىم - 112 ادام. ەڭبەككە قابىلەتتى ازاماتتار سانى 67 بولسا، 27 ادام ءۇي شارۋاسىمەن اينالىسادى.
جاۋاپتى سالا وكىلدەرىنىڭ مالىمدەۋىنشە، تۇرعىنداردىڭ مەملەكەتتىك باعدارلاماعا دەگەن قىزىعۋشىلىعى جوعارى.
- قالا تۇرعىندارى اراسىندا ەرىكتى تۇردە قونىس اۋدارۋ باعدارلاماسى بويىنشا ءتۇسىندىرۋ جۇمىستارى تۇراقتى جۇرگىزىلىپ كەلەدى. باعدارلاما ەڭبەك كۇشى ارتىق وڭىرلەردەن كادر تاپشىلىعى بار ايماقتارعا جۇمىس كۇشىنىڭ ۇتقىرلىعىن ارتتىرۋعا باعىتتالعان. جۇمىسپەن قامتۋ ورتالىقتارىنىڭ ماماندارى قالا ىشىندە دە، شالعايداعى تۇرعىن الاپتاردا دا اقپاراتتىق كەزدەسۋلەر وتكىزەدى، - دەدى قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى جانات ۋتەبايەۆا.
مەملەكەت تاراپىنان قونىس اۋدارۋشىلارعا جان-جاقتى قولداۋ كورسەتىلەدى. ءبىرجولعى تولەم ءار وتباسى مۇشەسىنە 70 ا ە ك مولشەرىندە قاراستىرىلعان. 2026 -جىلى ونىڭ كولەمى ءبىر ادامعا - 302750 تەڭگە. سونىمەن قاتار ءبىر جىل ىشىندە جالعا الىنعان تۇرعىن ءۇي مەن كوممۋنالدىق قىزمەتتەرگە جۇمسالعان شىعىندار وتەلەدى، ياعني قالالىق جەرلەردە - 86500129750 تەڭگە، ال اۋىلدىق جەرلەردە - 6487590825 تەڭگە. بۇدان بولەك، قانداستار مەن قونىس اۋدارۋشىلارعا تۇرعىن ءۇي ساتىپ الۋ ءۇشىن سەرتيفيكات بەرىلەدى. ول تۇرعىن ءۇي قۇنىنىڭ 50 پايىزىنا دەيىن قامتيدى، ءبىراق 1625 ا ە ك-تەن اسپايدى. بۇل شامامەن - 7 ميلليون تەڭگە.
بۇدان بۇرىن 2025 -جىلى شىمكەنتتەن 660 دەن استام ازامات جۇمىس كۇشى تاپشى وڭىرلەرگە كوشكەنىن جازعان ەدىك. ولاردىڭ باسىم بولىگى پاۆلودار وبلىسىن تاڭداعان.
