شىمكەنتتە پوليتسيادان كومەك سۇراعان قىزدارعا ءتارتىپ ساقشىسى تاپ بەرگەن

شىمكەنتتە پاترۋلدىك پوليتسيادان كومەك سۇراعان قىزدارعا پوليتسيا دورەكىلىك تانىتقان. بۇل ءسات قالا كوشەسىندەگى بەينەباقىلاۋ كامەراسىنا ءتۇسىپ قالعان.

ۆيدەو Instagram جەلىسىندە جاريالاندى.

ونداعى جازباعا سۇيەنسەك، تۇركىستان كوشەسى بويىندا كەتىپ بارا جاتقان قىزدار ەكى جىگىت كۇشتەپ ۇستاپ وتىرعان بويجەتكەندى بايقاپ قالعان.

وزدەرىنىڭ ايتۋىنشا، كومەك سۇراعان قىزدىڭ جان داۋىسىن ەستىپ، بەي-جاي قاراي الماعان. ءسويتىپ دەرەۋ پوليتسياعا حابارلاسقان.

الايدا وسىدان كەيىن قىزدارعا بەيتانىس بايلانىس نومىرىنەن بىرەۋ حابارلاسىپ، پوليتسيا ۋچاسكەسىنە كەلۋدى ايتىپتى.

ءسال كەيىنىرەك وقيعا ورنىنا پوليتسيا فورماسىن كيگەن ەر ادام كەلگەن.

ول ءوزىن تانىستىرماعان، ءتىپتى قىزمەتتىڭ كۋالىگىن دە كورسەتپەگەن.

بۇل پوليتسيا شاقىرعان قىزداردىڭ بويىندا كۇدىك تۋعىزىپ، ولار ءمان-جايدى ۆيدەوعا تۇسىرمەك بولعان.

الايدا بۇعان ءتارتىپ ساقشىسى اشۋلانىپ، قىزدىڭ قولىنداعى تەلەفوندى تارتىپ الماق بولادى.

كەيىنىرەك بەلگىلى بولعانداي، اينالاسىنداعىلاردان كومەك سۇراعان جاس قىزدى باۋىرلارى كۇشتەپ ۇستاپ وتىرعان. 

اعالارى قىزدى اناسىنا جەتكىزبەك بولىپتى.

قىزدىڭ ايتۋىنشا، وعان اناسى قورلىق كورسەتەتىن كورىنەدى. بويجەتكەن ارىز جازباق بولعاندا وعان بەيتانىس نومىردەن بىرەۋ ماسەلەنى «جاقسىلىقپەن» شەشۋدى ايتىپتى.

قالالىق پوليتسيا دەپارتامەنتى ۆيدەوداعى ءتارتىپ ساقشىسىنا قاتىستى قىزمەتتىك تەكسەرۋ باستالعانىن حابارلادى.

وقيعانىڭ ءمان-جايى انىقتالىپ جاتىر.

اۆتور
جانسايا تاۋەكەل قىزى