شىمكەنتتە تۇرمىستىق قالدىقتاردى وڭدەۋ زاۋىتى سالىنادى

  استانا. KAZINFORM - شىمكەنت قالاسىندا قاتتى تۇرمىستىق قالدىقتاردى سۇرىپتاۋ، وڭدەۋ جانە كادەگە جاراتۋ زاۋىتىن سالۋعا يسپانيا، قىتاي، گەرمانيا، كورەيا جانە تۇركيا ينۆەستورلارى تاراپىنان ۇسىنىستار تۇسكەن.

«قالا اكىمدىگىنىڭ 2023 -جىلعى 13-قاڭتارداعى №55 قاۋلىسى نەگىزىندە «Green line» قالدىقتاردى قايتا وڭدەۋ زاۋىتى» ج ش س- ءنىڭ جەكە مەنشىگىنەن قاتتى تۇرمىستىق قالدىقتار پوليگونى مەملەكەتتىك كوممۋنالدىق مەنشىگىنە قايتارىلدى. پوليگونداعى 1,5 ميلليون توننا جارتىلاي كومىلگەن جانە 250 مىڭ توننا بەي- بەرەكەت شاشىلعان قوقىستار تولىعىمەن رەتكە كەلتىرىلدى. قازىرگى ۋاقىتتا پوليگوننىڭ تولۋىنا بايلانىستى جاڭا پوليگون سالۋ ءۇشىن 30 گا جەر قاراستىرىلىپ، قۇجاتتارى راسىمدەلۋدە»،-دەپ جاۋاپ بەردى شىمكەنت قالالىق اكىمدىگى Kazinform اقپارات اگەنتتىگى جولداعان رەسمي ساۋالعا.

اقپاراتتا ايتىلعانداي، قاتتى تۇرمىستىق قالدىقتاردى سۇرىپتاۋ، وڭدەۋ جانە كادەگە جاراتۋ زاۋىتىن سالۋ جونىندەگى ۇسىنىستار يسپانيا، قىتاي، گەرمانيا، كورەيا جانە تۇركيا ينۆەستورلارىنان تۇسكەن.

«اتالعان ەلدەر ينۆەستورلارمەن كەزدەسۋدە قالدىقتاردى الدىن الا سۇرىپتاۋ شارتتارى قويىلىپ، قالدىقتاردىڭ مورفولوگيالىق قۇرامى ۇسىنىلدى. ءاربىر شەتەلدىك ينۆەستور قالدىقتاردى ەنەرگەتيكالىق كادەگە جاراتۋ كەزىندە الىناتىن ەلەكتر ەنەرگياسىنا قىزىعۋشىلىق تانىتۋدا. ءبىراق قالدىقتاردى ەنەرگەتيكالىق كادەگە جاراتۋ كەزىندە الىنعان ەلەكتر ەنەرگياسىنا بەكىتىلگەن ءتاريفتىڭ بولماۋىنا بايلانىستى ورتەۋ زاۋىتىنىڭ قۇرىلىسى ينۆەستور ءۇشىن ەكونوميكالىق تۇرعىدان ءتيىمسىز بولىپ وتىر»، - دەيدى اكىمدىكتەن.

ەكولوگيا كودەكسىنىڭ 324 بابىنا سايكەس قالدىقتاردى كادەگە جاراتۋ ارقىلى وندىرىلگەن ەلەكتر ەنەرگياسىنا شەكتى اۋكتسيوندىق باعالاردى ۋاكىلەتتى ورگان (ەكولوگيا جانە تابيعي رەسۋرستار مينيسترلىگى) بەكىتەدى.

«قالدىقتاردى كادەگە جاراتۋعا جۇمسالاتىن ەلەكتر ەنەرگياسىنىڭ تاريفى مينيسترلىك تاراپىنان قاراستىرىلعاننان كەيىن قالدىقتاردى وڭدەۋ زاۋىتىنىڭ قۇرىلىسى جۇرگىزىلەدى»، - دەلىنگەن ساۋال جاۋابىندا.