شىمكەنتتە تاكسيگە مىنگەن ەكى ادام تابىلماي جاتىر

شىمكەنت. KAZINFORM - «الاش» بازارى الدىنان تاكسيگە مىنگەن قىز بەن جىگىت جوعالىپ كەتتى.

такси
Фото: freepik

الەۋمەتتىك جەلىدە تاراعان اقپاراتقا سۇيەنسەك، شۇبارسۋ اۋىلىنىڭ 17 جاستاعى تۇرعىنى ەرمەكباي ارايلىم ەربول قىزى تۇنگى ساعات 23:00 شاماسىندا شىمكەنتتەن اۋىلىنا قايتپاق بولىپ «الاش» بازارىنىڭ الدىندا تاكسيگە وتىرعان. سودان كەيىن تەلەفونى ءسونىپ، حابارسىز كەتكەن.

بۇگىندە شىمكەنت قالاسى پوليسيا دەپارتامەنتىنىڭ قىزمەتكەرلەرى حابار- وشارسىز جوعالعان قىز تۋرالى ارىز بويىنشا ىزدەستىرۋ ءىس- شارالارىن جۇرگىزىپ جاتىر.

- ىزدەۋ جۇمىستارىنا شىمكەنت قالاسى پوليسيا دەپارتامەنتىنىڭ كەشەندى كۇشتەرى مەن قۇرالدارى جۇمىلدىرىلدى. اۋداندىق بولىمدەردىڭ جەكە قۇرامى مەن كورشى وڭىرلەردىڭ پوليتسيا دەپارتامەنتتەرىنە باعدار جولداندى، - دەلىنگەن شىمكەنت قالاسى پوليسيا دەپارتامەنتىنىڭ باسپا ءسوز قىزمەتى ۇسىنعان اقپاراتتا.

ارادا بىرنەشە كۇن وتكەندە ءدال وسى جاعداي قايتالانىپ وتىر. بۇل جولى 20 جاستاعى ەدىلبەك بايدىبەك اقمىرزا ۇلى ورداباسى اۋدانىنان شىمكەنتكە كەلگەن. كولىك جۇرگىزۋ كۋالىگىن الماق بولعان ول، شارۋالارى بىتكەن سوڭ «الاش» بازارى اۋماعىنان تاكسيگە وتىرادى. دەگەنمەن، جىگىت ۇيىنە جەتپەگەن. تەلەفونى دا ءسوندىرۋلى تۇر.

اتالعان جاعدايعا بايلانىستى شىمكەنت قالاسى پوليتسيا دەپارتامەنتىنىڭ باسپا ءسوز قىزمەتى ىزدەۋ جۇمىستارى جۇرگىزىلىپ جاتقانىن مالىمدەدى.

- جوعالعان ازامات تۋرالى ارىز بويىنشا پوليسەيلەرمەن ىزدەستىرۋ شارالارى جۇرگىزىلۋدە. ەر ادامدى انىقتاۋعا باعىتتالعان جۇمىستارعا پوليسيا دەپارتامەنتىنىڭ بارلىق كۇشى جۇمىلدىرىلدى، - دەلىنگەن ۆەدومستۆا اقپاراتىندا.

 

سوڭعى جاڭالىقتار