شىمكەنتتە مىرزاحمەت، نۇرماحانبەت، دىنمۇحاممەد اتتى ۇشەم دۇنيەگە كەلدى

үшем
فوتو: instagram.com/gorzdravshymkent

شىمكەنت. KAZINFORM - شىمكەنت تۇرعىنى ايگۇل باقىتجان قىزى ۇشەم دۇنيەگە اكەلدى. 24 جاستاعى جاس انا مەرزىمىنەن بۇرىن، ياعني جۇكتىلىكتىڭ 31-اپتاسىندا قالالىق پەرزەنتحانادا بوسانعان.

دۇنيەگە كەلگەن سابيلەردىڭ ۇشەۋى دە - ۇل بالا. ولارعا مىرزاحمەت، نۇرماحانبەت، دىنمۇحاممەد ەسىمدەرى بەرىلدى.

نارەستەلەردىڭ ءبىرىنىڭ سالماعى - 1580 گرام بولسا، ەكىنشىسى - 1640 گرام بوپ دۇنيەگە كەلدى. ال ءۇشىنشى ءسابيدىڭ سالماعى - 1610 گرام.

قالالىق دەنساۋلىق ساقتاۋ باسقارماسىنداعىلار دارىگەرلەر ۇشەمدى الدىمەن جانساقتاۋ بولىمىندە باقىلاۋدا ۇستاعانىن، ءتيىستى ەم-شارالاردى جاساپ، كەيىن پالاتاعا اۋىستىرعانىن ايتتى.

үшем
فوتو: instagram.com/gorzdravshymkent

سالماق قوسىپ، جاعدايى جاقسارعان سابيلەر مەن جاس انانى بۇگىن پەرزەنتحانا قىزمەتكەرلەرى سالتاناتتى راسىممەن ۇيىنە شىعارىپ سالدى.

ايتا كەتەيىك، مىرزاحمەت، نۇرماحانبەت، دىنمۇحاممەد - جىل باسىنان بەرى شىمكەنتتە دۇنيەگە كەلگەن ءتورتىنشى ۇشەم.

بيىل قالادا 10913 ءسابي دۇنيەگە كەلگەن. ونىڭ 5579 ى - ۇل بولسا، 5334 ى - قىز. ەگىزدەردىڭ سانى - 107.

بۇعان دەيىن شىمكەنتتىڭ 31 جاستاعى تۇرعىنى ۇشەم دۇنيەگە اكەلگەن بولاتىن. ولارعا اتامباي، مۇسا، ءمۇسلىم ەسىمدەرى بەرىلدى.

سونداي-اق قوستاناي تۇرعىنى اقشاگۇل ءابدىراحمانوۆا بەس بالاسىنان كەيىن ۇشەم بوساندى.

بۇل - سوڭعى 6 جىلدىڭ ىشىندە قوستانايدا جارىق دۇنيە ەسىگىن اشقان العاشقى ۇشەم.

قالا اكىمى وتباسى مەن جاڭا تۋعان نارەستەلەرگە وبلىس ورتالىعىنداعى جاڭا پاتەردىڭ كىلتىن تابىس ەتكەن بولاتىن.

سوڭعى جاڭالىقتار