شىمكەنتتە مەكتەپتەن ءورت شىعىپ، بالالار ۇيلەرىنە قايتارىلدى
شىمكەنت. KAZINFORM - شىمكەنتتە جالپى ورتا مەكتەپ عيماراتىنان ءورت شىقتى. وقيعا ەڭبەكشى اۋدانى بازار قاقپا تۇرعىن الابىنداعى مەكتەپتە بولعان.
قالالىق توتەنشە جاعدايلار دەپارتامەنتىنىڭ مالىمەتىنشە، 104-جالپى ورتا مەكتەبىنىڭ «ا» كورپۋسىنىڭ شاتىرى مەن اعاش تاقتايشالار جانعان. قىزىل جالىن 280 شارشى مەتر اۋماقتى شارپىعان. بۇل عيماراتتا تەك باستاۋىش سىنىپتا وقيتىن بالالار ءبىلىم الادى.
«جانىپ جاتقان مەكتەپ عيماراتى ىشىنەن ءبىرىنشى اۋىسىمدا وقيتىن 350 وقۋشى مەن 25 مۇعالىم ءورت سوندىرۋشىلەر كەلىپ جەتكەنگە دەيىن سىرتقا شىعىپ ۇلگەرگەن. ءورت ساعات 10.46 دا وقشاۋلانىپ، ساعات 11.15 تە تولىعىمەن ءسوندىرىلدى. قىزىل جالىندى سوندىرۋگە ت ج د جەكە قۇرامنان 52 قىزمەتكەر، 8 تەحنيكا جۇمىلدىرىلدى»، - دەدى قالالىق ت ج د.
ءورت كەزىندە قازا تاپقاندار مەن زارداپ شەككەندەر جوق.
الدىن الا بولجام بويىنشا ءورت ەلەكتر سىمدارىنىڭ قىسقا تۇيىقتالۋىنان شىققان.
مەكتەپ ديرەكتورى باۋىرجان راۋاليوۆتىڭ ايتۋىنشا، عيمارات شاتىرىنداعى ءتۇتىندى ءبىرىنشى بولىپ اۋلا كەزەكشىسى بايقاعان. ول دەرەۋ دابىل باتىرماسىن باسىپ، مەكتەپ ىشىندەگى وقۋشىلار مەن قىزمەتكەرلەر 2-3 مينۋت ىشىندە عيماراتتان شىعىپ ۇلگەرگەن. ساناۋلى مينۋتتاردا وقيعا ورنىنا ءورت سوندىرۋشىلەر جەتكەن.
«ءبىزدىڭ مەكتەپتە ءورت بولعان جاعدايعا قاتىستى وقۋ-جاتتىعۋ جۇمىستارى تۇراقتى تۇردە وتكىزىپ كەلەدى. سوندىقتان بالالار اراسىندا شوشۋ نەمەسە دۇربەلەڭگە سالىنۋ بايقالمادى. دەرەۋ اتا-انالارىنا حابار بەرىلدى»، - دەدى ءبىلىم ۇياسىنىڭ باسشىسى.
مەكتەپ ديرەكتورى ءورت شىققان «ا كورپۋسىندا تەك باستاۋىش سىنىپ وقۋشىلارى ءبىلىم الاتىنىن، ال 5-11-سىنىپ وقۋشىلارى وقيتىن نەگىزگى كورپۋسقا قاۋىپ تونبەگەنىن ايتتى. دەگەنمەن ءبىلىم باسقارماسىنىڭ شەشىمىمەن وقيعادان كەيىن ەكى عيماراتتاعى بارلىق وقۋشىنىڭ اتا-اناسىنا حابار بەرىلىپ، بالالار ۇيلەرىنە جىبەرىلگەن. ال ەكىنشى اۋىسىمدا وقيتىن بالالار قاشىقتان وقىپ جاتىر.
«ەرتەڭ نەگىزگى عيماراتتاعى ءبىلىم الاتىن 5-11-سىنىپ وقۋشىلارى ءداستۇرلى فورماتتا وقيدى. ت ج د ماماندارى ول عيماراتقا ەشقانداي قاۋىپ تونبەگەنىن ايتتى. ال ءورت شىققان «ا» كورپۋسىنداعى باستاۋىش سىنىپ وقۋشىلارىنا قاتىستى قالالىق ءبىلىم باسقارماسىنان بۇيرىق كۇتىپ وتىرمىز. ولار ونلاين نەمەسە وففلاين وقۋى مۇمكىن. ول تۋرالى اتا-انالارعا مىندەتتى تۇردە حابارلايتىن بولامىز»، - دەدى مەكتەپ ديرەكتورى باۋىرجان راۋايلوۆ.
ايتا كەتەيىك، 104-جالپى ورتا مەكتەبىندە 1547 بالا ءبىلىم الادى. ونىڭ 700 ءى باستاۋىش سىنىپتا وقيدى.
