شىمكەنتتە كاسىپكەرلەردى بوپسالاعان ۇيىمداسقان قىلمىستىق توپ ۇستالدى

شىمكەنت. KAZINFORM - ىشكى ىستەر مينيسترلىگى وڭىرلەردەگى قىلمىستىق توپتاردىڭ زاڭسىز ارەكەتتەرىنىڭ جولىن كەسۋ بويىنشا كەشەندى جۇمىستى جالعاستىرىپ جاتىر. بۇل تۋرالى Polisia.kz جازدى.

جىل باسىنان بەرى شىمكەنتتە اۋىر جانە اسا اۋىر قىلمىستار جاساۋعا قاتىسى بار وسىنداي 10 نان استام توپ ۇستالدى.

8-قازاندا ۇيىمداسقان قىلمىسقا قارسى كۇرەس باسقارماسى جەدەل ءىس- شارالاردىڭ ناتيجەسىندە ويىن-ساۋىق مەكەمەلەرىنە قىلمىستىق قامقورشىلىق كورسەتكەن جاستار توبىن ۇستادى. ولاردىڭ بوپسالاۋعا، بۇزاقىلىققا جانە قارۋدى زاڭسىز ساقتاۋعا قاتىسى بولعانى تۋرالى مالىمەتتەر الىندى. 11-قازاندا شىمكەنت كاسىپكەرلەرىن بوپسالاۋعا قاتىسى بار باسقا قىلمىستىق توپتىڭ مۇشەلەرى ۇستالدى. ولار وزدەرىنىڭ قىلمىستىق قامقورلىعى ءۇشىن ءۇش ميلليون تەڭگەگە دەيىن العان. كەلىسپەگەن جاعدايدا فيزيكالىق جانە مورالدىق قىسىم جاساعان. وسى فاكتىلەر بويىنشا ىشكى ىستەر ورگاندارىنا بارلىعى 35 فيگۋرانت جەتكىزىلدى، 100-دەن استام ءتىنتۋ شارالارى جۇرگىزىلدى. قارۋ-جاراق پەن وق-ءدارى تاركىلەندى.

- ايتا كەتۋ كەرەك، جىل باسىنان بەرى شىمكەنت قالاسىندا قىلمىستىق توپتاردىڭ جولىن كەسۋ بارىسىندا 30 دان استام اتىس جانە تراۆماتيكالىق قارۋ، ونىڭ ىشىندە ءبىر كالاشنيكوۆ اۆتوماتى، 15 شولاق مىلتىق، 11 تاپانشا، ەكى ۆينچەستەر جانە مىڭنان استام وق-ءدارى تاركىلەندى. وڭىرلەردە «زاڭ جانە ءتارتىپ» قاعيداتىن قامتاماسىز ەتۋ بويىنشا جۇمىس ەرەكشە باقىلاۋدا، - دەدى ءى ءى م ۇيىمداسقان قىلمىسقا قارسى دەپارتامەنتىنىڭ وكىلى قۋاندىق الپىس.