22:33, 27 - قاراشا 2023 | GMT +5
شىمكەنتتە شيە مەن الما ءبىر جىلدا ەكى رەت ءونىم بەردى
شىمكەنتتە شيە مەن الما ءبىر جىلدا ەكى رەت ءونىم بەردى، دەپ حابارلايدى Kazinform.
شىمكەنتتە جازدىق الما مەن شيە ەكىنشى قايتارا ءونىم بەرۋدە. بۇل تۋرالى جەرگىلىكتى تۇرعىندار ۆيدەو ءتۇسىرىپ، الەۋمەتتىك جەلىگە جۇكتەدى. ۆيدەو اۆتورى جازدىق المانىڭ ءبىر جىلدا ەكىنشى رەت گۇلدەپ، پىسكەنىن ايتادى.
«ەرتە پىسەتىن المانى مايدىڭ سوڭىندا جەيتىنبىز. بيىل ەكىنشى رەت گۇلدەپ، ءتۇيىن سالدى. قازىر ءپىسىپ جاتىر. شيە دە قاراشادا ەكىنشى رەت ءونىم بەرىپ تۇر»، - دەيدى ول.
ال، اتالعان ۆيدەونى جەلىگە جۇكتەگەن شىمكەنت قالاسىنىڭ تۇرعىنى، جۋرناليست ءجاميلا ءمامىرالى «قايتپاس» مولتەك اۋدانىنىڭ تۇرعىندارى الما باۋدان ەكى رەت ءونىم الىپ جاتقانىن ايتتى.
«ۆيدەونى كورشىم ءتۇسىرىپ جىبەرىپتى. قارا بۇلدىرگەندە گۇلدەپ، ءتۇيىن سالىپ جاتىر»، - دەپ جازدى ول Facebook-تەگى پاراقشاسىندا.
