شىمكەنتتە شەبەر اجەلەر كيمەشەك تىگىپ جارىستى
شىمكەنت. KAZINFORM - شىمكەنتتە شەبەر انالار فورۋمى اياسىندا «كەستەلى كيمەشەك» رەسپۋبليكالىق بايقاۋى ءوتتى. مەملەكەتتىك «باقىتتى جانۇيا» ورتالىعى جانىنداعى قالالىق اجەلەر كەڭەسى ۇيىمداستىرعان جوبا بيىل العاش رەت وتكىزىلىپ وتىر.
بايقاۋعا جەرگىلىكتى شەبەر انالاردان بولەك، استانا، الماتى، قاراعاندى، پاۆلودار، تالدىقورعان قالالارىنان تۇركىستان وبلىسىنان ءتىپتى تۇركيادان شەبەرلەر قاتىستى.
«كەستەلى كيمەشەك» جوباسىنىڭ جەتەكشىسى ءارى قالالىق اجەلەر كەڭەسىنىڭ ءتوراعاسى كلارا ايتەنوۆا شەبەر انالار فورۋمى مەملەكەت باسشىسى قاسىم-جومارت توقايەۆتىڭ قاتىسۋىمەن وتكەن «ادال ادام - ادال ەڭبەك - ادال تابىس» اتتى ۇلتتىق قۇرىلتايدان كەيىن اتا-بابادان مۇرا بولىپ جەتكەن ۇلتتىق باس كيىمدى دارىپتەۋ ماقساتىندا ۇيىمداستىرىلعانىن اتاپ ءوتتى.
كيمەشەك تىگىپ جارىسقان شەبەرلەردىڭ ءبىر بولىگى بايقاۋعا ارنايى وزدەرى كەلىپ، ونەرلەرىن پاش ەتسە، ەندى ءبىرى سۋ تاسقىنىنا بايلانىستى وففلاين فورماتتا تۋىندىلارىن ۇسىندى. شەبەرلەر وزدەرىنىڭ جاساعان تۋىندىلارىن، قولدانىلعان ماتا تۇرلەرى مەن ويۋلاردى تانىستىردى. جالپى سانى 50 گە جۋىق قاتىسۋشى باق سىناعان جارىستا كيمەشەكتىڭ ءۇش ءتۇرى ۇسىنىلدى.
«ءبىز ستاندارت بويىنشا كيمەشەكتىڭ ءۇش ءتۇرىن تۇسىندىردىك. ءبىرىنشىسى - قىزىل جاق. قىزىل ءتۇستى جىپپەن كەستەلەنگەن كيمەشەكتىڭ بۇل ءتۇرى 20 جاستان 40 جاستاعى كەلىنشەكتەرگە ارنالىپ تىگىلەدى. ەكىنشىسى - سارى جاق. التىنداي سارى تۇستەس جىپتەرمەن كومكەرىلىپ، ويۋمەن تىگىلەدى. ول 40 تان 60 جاسقا دەيىنگى انالارعا ارنالعان. ءۇشىنشىسى - اق كۇمىس جاق. ءوزى اتى ايتىپ تۇرعانداي اق كۇمىس تۇستەس ويۋلارمەن كومكەرىلەدى. بۇل 60 تان 80-100 جاستاعى اجەلەرگە ارنالعان»، - دەدى جوبا جەتەكشىسى، قالالىق اجەلەر كەڭەسىنىڭ ءتورايىمى كلارا ايتەنوۆا.
جوبا جەتەكشىسى قاتىسۋشىلارعا كيمەشەكتى تەك اجەلەر كيەدى دەگەن ۇعىم دۇرىس ەمەس، ءار ۇيدە كەمىندە ءبىر كيمەشەك بولۋى كەرەكتىگىن بارىنشا تۇسىندىردىك دەپ وتىر.
بايقاۋ قورىتىندىسى بويىنشا قاتىسۋشى شەبەرلەرگە ارنايى ديپلومدار مەن دەمەۋشى ەسەبىنەن سىيلىقتار تابىستالدى.
ۇيىمداستىرۋشىلار اداعى ۋاقىتتا كيمەشەكتى قازاقتىڭ ۇلتتىق باس كيىمى دەپ يۋنەسكو دەڭگەيىندە تانىتۋدى جوسپارلاپ وتىر.
