شىمكەنتتە التى ادامدى قاعىپ كەتكەن اۆتوبۋس جۇرگىزۋشىسى 5 جىلعا سوتتالدى
شىمكەنتتە التى ادامدى قاعىپ كەتكەن اۆتوبۋس جۇرگىزۋشىسى 5 جىلعا سوتتالدى، دەپ حابارلايدى Kazinform.
شىمكەنتتە قوعامدا ۇلكەن رەزونانس تۋدىرعان قوعامدىق كولىك جۇرگىزۋشىسىنە قاتىستى سوت ۇكىمى شىقتى.
وقيعا وسى جىلدىڭ ءساۋىر ايىندا بولدى. جول جيەگىنە توقتاعان جۇرگىزۋشى قوعامدىق كولىكتەن تۇسكەن ساتىندە اۆتوبۋس وزدىگىنەن قوزعالىپ، جول بويىنداعى التى جاياۋ جۇرگىنشىنى قاعىپ كەتكەن بولاتىن. سالدارىنان 5 ادام قازا تاپسا، ءبىر تۇرعىن مۇگەدەك بولىپ قالدى.
كولىك قۇرالىن قاراۋسىز قالدىرعان 49 جاستاعى جۇرگىزۋشىگە قاتىستى قازاقستان رەسپۋبليكاسى قىلمىستىق كودەكسىنىڭ 345-بابى «ابايسىزدا ەكى نەمەسە ودان دا كوپ ادامنىڭ ولىمىنە اكەپ سوقتىرعان كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ ەرەجەلەرىن بۇزۋى» بويىنشا قىلمىستىق ءىس قوزعالىپ، ايىپ تاعىلدى.
بۇگىن وتكەن سوت وتىرىسىندا سوتتالۋشىنىڭ كىناسى دالەلدەنىپ، 5 جىلعا سوتتالدى. سونداي-اق ول 7 جىلعا جۇرگىزۋشى كۋالىگىنەن ايىرىلدى.
ەسكە سالايىق، 8- ءساۋىر كۇنى بايتەرەكوۆ - نازاربەكوۆ كوشەلەرىنىڭ قيىلىسىندا جۇرگىزۋشىنىڭ باسقارۋىنسىز قالعان اۆتوبۋس بوكتەرمەن تومەن قاراي ءجۇرىپ كەتىپ، قاتتى جىلدامدىقپەن 6 ادامدى قاعىپ كەتكەن بولاتىن.
اتالعان جول-كولىك اپاتى تۋرالى ايتقان جاۋاپتىلار جۇرگىزۋشىنىڭ قوعامدىق كولىكتى قول تەجەگىشىنە قويۋدى ۇمىتىپ، اجەتحاناعا كەتكەنىن جەتكىزگەن بولاتىن.
