شىمكەنتتە 30 كەلى ەسىرتكىنى 1,5 ميلليون تەڭگەگە ساتپاق بولعاندار ۇستالدى

شىمكەنت. KAZINFORM - شىمكەنت قالالىق پوليتسيا دەپارتامەنتى 30 كەلى ەسىرتكىنى 1,5 ميلليون تەڭگەگە ساتپاق بولعانداردىڭ ۇستالعانىن مالىمدەدى.

ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جەدەل ءىس-شارالاردى وتكىزۋ بارىسىندا شىمكەنتكە ەسىرتكى جەتكىزۋ ارناسىنىڭ جولىن كەستى.

- جامبىل وبلىسىنىڭ 58 جانە 51 جاستاعى تۇرعىنى ۇستالىپ، ولاردان 30 كەلىگە جۋىق كەپتىرىلگەن ماريحۋانا تاركىلەندى. بۇل ەسىرتكى زاتتارىن ولار 1,5 ميلليون تەڭگەگە ساتپاق بولعان، - دەپ جازدى پوليتسيانىڭ باسپا ءسوز قىزمەتىنەن.

قازىرگى تاڭدا وسى جايت بويىنشا تەرگەۋ جۇرگىزىلۋدە. كۇدىكتىلەر قاماۋدا.

پوليتسيا ەسىرتكىمەن بايلانىستى كەز كەلگەن زاڭسىز ارەكەت ۇلكەن قىلمىستىق جاۋاپكەرشىلىككە اكەپ سوعاتىنىن ەسكەرتەدى.