شىمكەنتتە 25 قىزدى الىپ قاشقان

шымкент қыз алып қашу
Фото: Фото: әлеуметтік желіден

 شىمكەنتتە كەيىنگى ەكى جىلدا قىز الىپ قاشۋدىڭ 25 دەرەگى تىركەلگەن. Kazinform بۇل تۋرالى قالا پروكۋراتۋراسىنىڭ مالىمەتىنە سىلتەمە جاساپ حابارلايدى. 

شىمكەنت پروكۋراتۋراسىندا قالىڭدىقتى الىپ قاشۋ جاعدايلارىنا قاتىستى كەڭەس ءوتتى.

قالا پروكۋرورى عابيت مۇقانوۆتىڭ ايتۋىنشا، مۇنداي فاكتىلەر قالادا ءالى دە جىل سايىن تىركەلەدى. ماسەلەن، سوڭعى ەكى جىلدا قالىڭدىقتى الىپ قاشۋ بەلگىلەرى بار 25 دەرەك تىركەلگەن. بيىل مۇنداي وقيعالارعا قاتىستى پوليتسياعا جۇگىنگەندەر بولماعان.

«اتالعان فاكتىلەر بويىنشا قىلمىستىق ىستەردىڭ بارلىعى قىلمىس قۇرامىنىڭ بولماۋىنا بايلانىستى توقتاتىلدى. نەگىزىنەن قالىڭدىقتىڭ ءوزى «كۇيەۋ جىگىتتىڭ» ۇيىنە ءوز ەركىمەن كەلگەنى تۋرالى تۇسىنىكتەمە جازادى. وكىنىشكە وراي، كەلىنشەكتەر ءساتسىز نەكەدەن كەيىن وتباسى ءۇشىن ۇيات بولادى دەپ قورقىپ، نەكەگە تۇرۋعا ءماجبۇر»، - دەلىنگەن ۆەدومستۆو حابارلاماسىندا.

عابيت مۇقانوۆ اتاپ وتكەندەي، نەكە الداۋ مەن زورلىق-زومبىلىقتان باستالماۋى كەرەك جانە قۇزىرلى ورگاندار قىز بالانى اسىعىس قادامنان قورعاۋى قاجەت.

پروكۋراتۋرادان ءمالىم ەتكەندەي، بارلىق ىقتيمال كۇيەۋ جىگىتتەر مۇنداي قادامدار ءۇشىن سوت جازاسى اۋىر ەكەنىن تۇسىنە بەرمەيدى. سونداي-اق «يگى ءىس» دەپ سانايتىن دوستارى دا وعان قاۋىپ ءتوندىرىپ جاتقانىن سەزىنبەيدى.

قالىڭدىقتى الىپ قاشقاندار 10 نان 15 جىلعا دەيىن باس بوستاندىعىنان ايىرىلۋى مۇمكىن. ماسەلەن، قىلمىستىق كودەكستىڭ 125-بابى («ادام ۇرلاۋ») 15 جىلعا دەيىنگى مەرزىمگە، 126-بابى («باس بوستاندىعىنان زاڭسىز ايىرۋ») 10 جىلعا دەيىنگى مەرزىمگە تۇرمەگە قاماۋدى كوزدەيدى.

اتالعان باپتار بويىنشا قىلمىستىق قۇقىق بۇزۋشىلىق تۋرالى ىستەر جاريالى ايىپتاۋ ىستەرى بولىپ ەسەپتەلەدى. مۇنداي جاعدايلاردا بۇل ىستەر بويىنشا قىلمىستىق قۋدالاۋ جابىرلەنۋشىنىڭ شاعىم بەرگەنى-بەرمەگەنىنە قاراماستان جۇزەگە اسىرىلادى.

قالا پروكۋرورى مۇنداي قىلمىستاردىڭ الدىن الۋ ءۇشىن تۇرعىندار اراسىندا قۇقىقتىق ءتۇسىندىرۋ جۇمىستارىن جۇرگىزۋدى تاپسىردى.

اۆتور

گۇلميرا الياكپاروۆا

سوڭعى جاڭالىقتار