شىمكەنت وبلىس ورتالىعى بولماسا دا، حالىق ەسكى ادەتپەن ءالى قالاعا اعىلىپ جاتىر - اكىم

 شىمكەنت اكىمى عابيت سىزدىقبەكوۆ ورتالىق كوممۋنيكاتسيالار قىزمەتىندە وتكەن بريفينگىدە قالادا بەيبەرەكەت كوشى-قون نەگە تىيىلماي تۇرعانىن ايتتى، دەپ حابارلايدى Kazinform.

«شىمكەنت -رەسپۋبليكالىق ماڭىزداعى قالا، ال وبلىستىڭ ورتالىعى تۇركىستان بولعالى ىشكى-كوشى- قون تۇراقتادى ما؟ ەڭبەككە جارامدى جاستاردىڭ وزگە وڭىرلەرگە اعىلۋى سايابىرلادى ما؟ وسى باعىتتا ناقتى ستاتيستيكا بار ما؟» دەپ سۇرادى ب ا ق وكىلدەرى.

رەسمي مالىمەت بويىنشا، شىمكەنت قالاسىندا 1,2 ميلليون ادام تۇرىپ جاتىر.

«بۇرىن قالامىز سول كەزدەگى وڭتۇستىك قازاقستان وبلىسىنىڭ ورتالىعى بولعانىن بىلەسىزدەر. سول سەبەپتى تاشكەنتتەن بەرى جاتقان اۋدانداردىڭ تۇرعىندارى ەسكى ادەت بويىنشا ءالى شىمكەنتكە اعىلىپ جاتىر. كۇندەلىكتى كەلىپ- كەتەتىن ادام سانىنىڭ ءوزى 500-600 مىڭعا دەيىن بارادى. ونىڭ ىشىندە جۇمىس بابىمەن كەلەتىندەردەن بولەك تۇركىستان وبلىسىنا قارايتىن، ءبىراق قالامىزدا ورنالاسقان دەنساۋلىق ساقتاۋ نىساندارىنا قارالۋعا كەلەتىندەر دە بار. بۇل نىساندار 2018-جىلى ءبولىنىپ شىققاندا وبلىستىڭ بالانسىندا قالىپ كەتكەن. سول مەكەمەلەرگە كەلەتىن ءبىراز ادام بار. جالپى وسىلاردى ەسكەرسەك، قارقىن ءالى تۇسپەگەنىن ايتۋعا بولادى»، - دەدى عابيت سىزدىقبەكوۆ.