شىمكەنت مەديتسينالىق تۋريزم ورتالىعىنا اينالماق

استانا. KAZINFORM - قازاقستانداعى 3- مەگاپوليس مەديتسينالىق تۋريزمدى مىقتاپ قولعا العالى وتىر، دەپ حابارلايدى Jibek Joly تەلەارناسى.

شىمكەنتكە تۋريستتەر دەمالىپ، ءدامدى اس-اۋقات ءىشۋ ءۇشىن عانا كەلمەيدى. ەندى مۇندا دەنساۋلىعىن تۇزەتىپ، ەڭ مىقتى دەگەن دارىگەرلەردەن جاردەم الۋعا بولادى. قازىردىڭ وزىندە دەنساۋلىعىن رەتتەۋگە وزبەكستان، تاجىكستان، رەسەي، ءتىپتى قىتايدان دا ەمدەلۋشىلەر كەلە باستاعان. اسىرەسە، كارديولوگيا، نەيروحيرۋرگيا جانە ورتوپەديا بويىنشا كۇردەلى وتالار جاسالىپ جاتىر.

ابدۋلاحاي قاسىموۆ شىمكەنتتى ءوزىنىڭ ەكىنشى رەت دۇنيەگە كەلگەن جەرى سانايدى. ويتكەنى تاجىكستان ازاماتى وسىدان ءبىراز ۋاقىت بۇرىن ينسۋلت الىپ، قاتتى ناۋقاستانىپ قالعان. دۋشانبەدەگى دارىگەرلەرى وعان مي قانتامىرلارىنا زاقىم كەلگەنىن ايتىپ، شۇعىل وپەراتسيا جاساتۋ ءۇشىن قازاقستانعا بارۋعا كەڭەس بەرىپتى. ءسويتىپ، ازامات شىمكەنتكە كەلگەن.

- ءبىز جاقتا تەكسەرىپ، جاعدايدىڭ كۇردەلى ەكەنىن ايتتى. قازاقستانعا بارۋعا كەڭەس بەردى. حابارلاستىق، كەلدىك - قازىر ءوزىمدى تاماشا سەزىنەمىن. ەركىن ءجۇرىپ-تۇرامىن، ۇيقىم تىنىش، باسىم اينالمايدى. ءبارى جاقسى، - دەدى ابدۋلاحاي كاسىموۆ.

ابدۋلاحايعا شىمكەنتتەگى ەكىنشى قالالىق اۋرۋحاناسىندا وتا جاسالعان. ءبارى ءساتتى ءوتىپ، ەندى اۋرۋحانادان ۇيىنە شىعارىلىپ جاتىر. وعان وپەراتسيا جاساۋ كەزىندە قازاق حيرۋرگتەرى ءاز ينۆازيۆتى ءادىستى قولدانىپتى. بۇل سترەستى ازايتىپ، تەز وڭالۋعا مۇمكىندىك بەرەتىن ءادىس دەسەدى.

- ينسۋلتتەن كەيىنگى جاعداي ميدى قورەكتەندىرەتىن تامىرلاردىڭ اۋرۋلارى بولادى. مالفورماتسيا، انيەۆريزما ينسۋلتكە اكەلەتىن. ءيا، بولماسا تامىر بىتەلە باستايدى، بۇنى اتەروسكلەروز دەيدى. قيىن جەردە ورنالاسقان ىسىكتەر بولادى. وعان جاقسى ميكروسكوپ، تاجىريبەلى مامان تالاپ ەتەتىن جاعدايلاردا وتا جاسالۋى كەرەك. ولار ءبىر-بىرىنەن ەستىپ، تاڭداۋ جاسايدى. قانشاما ادام وسىندا وتا جاساتىپ كەتىپ جاتىر. ءساتتى ءوتىپ جاتىر، - دەدى نەيروحيرۋرگ مارات قۇلمىرزايەۆ.

شىمكەنتتەگى اقىلى مەديتسينالىق قىزمەتتەر - ورتالىق ازياداعى ەڭ قولجەتىمدى قىزمەتتىڭ ءبىرى. ەمدەلۋشىلەر كورشىلەس ەلدەردەن عانا ەمەس، سوناۋ ەۋروپادان دا كەلىپ جاتادى. ءبىزدىڭ ماماندار وزىمىزدە عانا ەمەس، سونداي-اق تاجىريبەسىمەن الماسىپ، شەتەلگە دە شىعادى.

- ءبىزدىڭ دارىگەرلەرىمىزدىڭ، ءبىزدىڭ ماماندارىمىزدىڭ بىلىكتىلىگى عوي. سونى دا ءبىز كوتەرۋ ءۇشىن ەكىنشى جىل قاتارىنان شەتەلدە وقىتىپ جاتىرمىز. بىلتىر 120 ادامدى وسىندا كەلىپ وقىتقان. بيىلعى جىلى دا 120-130 ادامدى وقىتامىز، ماستەر كلاسپەن دە شىعادى. ويتكەنى بارىپ تاجىريبە كورگەن دە دۇرىس دەپ جاتىرمىز، - دەپ اتاپ ءوتتى شىمكەنت قالاسىنىڭ دەنساۋلىق ساقتاۋ باسقارماسىنىڭ باسشىسى نۇرلىبەك اسىلبەكوۆ.

وسىلايشا شىمكەنت مەديتسينالىق تۋريزم باعىتىندا ناعىز كوشباسشىعا اينالۋعا ءۇمىتتى. قانشا جەردەن سىناسا دا، قازىر جالپى قازاقستان مەديتسيناسىنا دەگەن سەنىم ءبىرشاما ارتىپ كەلەدى. بۇل قۋانتاتىن جاعداي. وعان قازاقستانعا كەلىپ ساۋىعىپ، ۇيىنە قايتىپ جاتقان تۋريستتەردىڭ العىسى دالەل.

اۆتور

اينۇر تۋماكبايەۆا