شىلىم شەگۋ ارىقتاۋعا كومەكتەسپەيدى - زەرتتەۋ

  استانا. KAZINFORM - كوپەنگاگەن ۋنيۆەرسيتەتىنىڭ عالىمدارى جۇرگىزگەن زەرتتەۋ تەمەكى شەگۋ ارتىق سالماقتان ارىلۋعا كومەكتەسەدى دەپ ءجيى ايتىلاتىن ميفتى جوققا شىعاردى، دەپ جازادى euronews.

1,5 ميلليون ەۋروپالىق شىلىم شەگەتىندەر اراسىندا جۇرگىزىلگەن زەرتتەۋ ناتيجەسى تەمەكى شەگۋ ىشتەگى مايدى ارتتىراتىنىن كورسەتتى.

شىلىم شەگۋدى قويعان ادامنىڭ اعزاسى بۇرىنعىعا قاراعاندا كالوريانى باياۋ جاعا باستايدى، ال بۇل سالماقتىڭ وسۋىنە اكەلەدى.

دەگەنمەن، زەرتتەۋ تەمەكى شەگۋدى جالعاستىرۋ دا ادامدى سىمباتتى ەتپەيتىنى انىق ەكەنىن كورسەتتى. شىلىم شەگۋ ىشتەگى مايدى، اسىرەسە ۆيستسەرالدى ماي كولەمىن ارتتىراتىنى انىقتالدى.

ىشتەگى زياندى ماي جۇرەك-قان تامىرلارى اۋرۋلارى، قانت ديابەتى، ينسۋلت جانە دەمەنتسيا قاۋپىنىڭ جوعارىلاۋىنا اكەلەدى.

زەرتتەۋشىلەر بۇل تۇجىرىمعا تەمەكى شەگۋ جانە سەمىزدىك تۋرالى گەنەتيكالىق دەرەكتەردى زەرتتەپ، ادامنىڭ الكوگول تۇتىنۋى جانە الەۋمەتتىك-ەكونوميكالىق مارتەبەسى سياقتى فاكتورلاردى ەسكەرە وتىرىپ، ىشتەگى مايدىڭ كوبەيۋى باسقا فاكتورلارعا ەمەس، تەمەكى شەگۋگە تىكەلەي بايلانىستى ەكەنىنە كوز جەتكىزدى.

زەرتتەۋ ەۋروپالىقتاردىڭ گەنەتيكالىق زەرتتەۋلەرىنە نەگىزدەلگەن: وعان تەمەكى شەگۋدى باستاعان 1,2 ميلليون ادام جانە 450 مىڭنان استام تاجىريبەلى تەمەكى شەگۋشىلەر قاتىستى. سونداي-اق اعزاسىنا ماي تاراعان 600 مىڭنان استام ادام زەرتتەۋگە قاتىستى.