شىلدە بيىل باتىس ەۋروپا تاريحىنداعى ەڭ ىستىق اي بولدى
استانا. KAZINFORM - بۇل تۋرالى ەۋروپانىڭ كليماتتىڭ وزگەرۋىن باقىلاۋ قىزمەتى Copernicus (C3S) زەرتتەۋلەرىندە ايتىلعان، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ەۋروپالىق ماماندار ەۋروپانىڭ 2025-جىلعى ماۋسىمنىڭ ورتاسى مەن سوڭىندا ەكى مىقتى جىلۋ تولقىنىن باستان وتكەرگەنىن حابارلادى.
ءبىرىنشى تولقىن 17-22-ماۋسىم ارالىعىندا باتىس جانە وڭتۇستىك ەۋروپانىڭ كەڭ اۋماقتارىن قامتىپ، ءوزىنىڭ شارىقتاۋ شەگىنە جەتتى.
ەكىنشى تولقىن اي سوڭىندا بولدى جانە ول 30-ماۋسىم مەن 2-شىلدە ارالىعىندا وسى وڭىرگە بۇرىنعىدان دا اپتاپ ىستىق اكەلدى.
ەكىنشى تولقىن كەزىندە بىرنەشە ەلدە اۋا تەمپەراتۋراسى 40 گرادۋستان استى، ال يسپانيا مەن پورتۋگاليادا 46 گرادۋسقا دەيىن كوتەرىلدى. بۇل ەكى وقيعا دا جيى «جىلۋ كۇمبەزدەرى» دەپ اتالاتىن جوعارى قىسىممەن بايلانىستى بولدى. ولار جىلى اۋانى ۇستاپ قالىپ، ۇزاققا سوزىلعان اپتاپ ىستىق، اشىق كۇن مەن قۇرعاق اۋا رايىنا سەبەپ بولدى. بۇل جاعداي سونىمەن قاتار اۋاداعى وزوننىڭ لاستانۋىنىڭ ارتۋىنا جانە ورمان ورتتەرى قاۋپىنىڭ كۇشەيۋىنە ىقپال ەتتى.
30-ماۋسىم كۇنى ورتاشا تاۋلىك تەمپەراتۋراسى باتىس ەۋروپا وڭىرىندە 24,9 گرادۋسقا جەتىپ، ەۋروپانىڭ وسى بولىگىندە ماۋسىم ايى بويىنشا رەكورد ورناتتى.
ءدال وسىنداي تەمپەراتۋرا 1-شىلدەدە دە تىركەلدى. بۇل - ايماقتا جاز مەزگىلىندە بۇرىن-سوڭدى بايقالعان ەڭ جوعارى كۇندىزگى تەمپەراتۋرالاردىڭ ءبىرى، مۇنداي كورسەتكىشتەر تەك اپتاپ ىستىقتىڭ شارىقتاۋ كەزەڭىندە - شىلدەنىڭ ورتاسىنان تامىزدىڭ ورتاسىنا دەيىن – 2003، 2018، 2019، 2022 جانە 2023-جىلدارداعى ىستىق تولقىندار كەزىندە عانا تىركەلگەن.
باتىس ەۋروپانىڭ كوپ بولىگىندە - سونىڭ ىشىندە يسپانيانىڭ، پورتۋگاليانىڭ، فرانسيا مەن ۇلى بريتانيانىڭ باسىم اۋماعىندا - ءبىرىنشى جانە ەكىنشى ىستىق تولقىنى ارالىعىنداعى كەزەڭدە (17 ماۋسىمنان 2-شىلدەگە دەيىن) تىركەلگەن ورتاشا تەمپەراتۋرا 1979-جىلدان بەرى وسى مەزگىل ءۇشىن ەڭ جوعارى كورسەتكىش بولدى.
بۇعان قوسا، 2025-جىلدىڭ ماۋسىمى باتىس ەۋروپا تاريحىنداعى ەڭ ىستىق ماۋسىم بولدى. بۇل كەزدە ورتاشا ايلىق تەمپەراتۋرا 20,49 گرادۋستى قۇراپ، 1991-2020-جىلدار ارالىعىنداعى ورتاشا كورسەتكىشتەن 2,81 گرادۋسقا جوعارى بولدى.
ول 2003-جىلدىڭ ماۋسىمىندا ورناتىلعان رەكوردتان نەبارى 0,06 گرادۋسقا استى.
ايتا كەتەرلىگى، 2003-جىلعى ماۋسىم دا، 2025-جىلعى شىلدە دە ەرەكشە جىلى ايلار بولدى، ويتكەنى كەلەسى ەڭ ىستىق ماۋسىم - 2017-جىلى بولدى جانە ول 0,7-0,8 گرادۋسقا سۋىق ەدى.
ءبىرىنشى كەزەكتە وتىن جاعۋ سالدارىنان بولعان جاھاندىق جىلىنۋدىڭ سالدارى اپتاپ ىستىق بولىپ قانا قويماي، قىزىپ كەتكەن اتموسفەرا سالدارىنان مۇحيتتاردىڭ بۋلانۋى كۇشەيىپ، ءوز كەزەگىندە ول جاۋىن-شاشىننىڭ بۇرىنعىدان دا كۇشتى بولۋىنا ىقپال ەتتى.
Copernicus قىزمەتىنىڭ مالىمەتىنشە، بيىلعى ماۋسىمداعى ورتاشا تەمپەراتۋرا يندۋسترياعا دەيىنگى كەزەڭمەن سالىستىرعاندا 1,3 گرادۋسقا جوعارى بولدى. بۇل سالىستىرۋ نەگىز رەتىندە 1850-1900-جىلدار ارالىعىن قامتيدى.
وسىعان دەيىن ددسۇ كليمات پەن دەنساۋلىققا قاتىستى جاڭا كوميسسيا قۇرعانى تۋرالى حابارلادىق.
