شىمكەنتتە ەر ادام 23 جىل بۇرىنعى قىلمىسى ءۇشىن سوتتالدى

سوتتا انىقتالعانداي، سوتتالۋشى 2003-جىلدىڭ تامىز ايىندا ەسىرتكى زاتتارىن كوتەرمە باعامەن ساتىپ الىپ، ولاردى باسقا مەملەكەتتەردە ساتۋمەن اينالىسقان حالىقارالىق ۇيىمداسقان قىلمىستىق توپتارمەن تۇراقتى بايلانىستا بولعان.

2003-جىلدىڭ قازان ايىنىڭ باسىندا ول قىلمىستىق قوعامداستىقتاعى وزىنە جۇكتەلگەن مىندەتتەردى ورىنداۋ بارىسىندا توپ باسشىسىنان اسا ءىرى مولشەردەگى گەرويندى وتكىزۋ تۋرالى تاپسىرما العان.

سوتتالۋشى اتالعان تاپسىرمانى ورىنداۋ ماقساتىندا 2003-جىلعى 20-قاراشادا سىبايلاسىمەن بىرگە شىمكەنتتەن اقتوبە باعىتىنا جولعا شىققان.

الايدا 22-قاراشادا شىمكەنت - سامارا اۆتوجولىنىڭ ارال قالاسى ماڭىندا سوتتالۋشى وتىرعان كولىك توقتاتىلعان. اۆتوكولىكتى تەكسەرۋ بارىسىندا جانارماي قۇيۋ ورنىنان ۇنتاق ءتارىزدى زات سالىنعان 35 پاكەت، ياعني جالپى سالماعى 34047,41 گرام اسا ءىرى مولشەردەگى گەروين تاركىلەنگەن.

وسى وقيعادان كەيىن سوتتالۋشى حالىقارالىق ىزدەۋگە جاريالانعان. ول 2024-جىلى رەسەي فەدەراتسياسىنىڭ اۋماعىندا ۇستالىپ، 2025-جىلى قازاقستانعا جەتكىزىلگەن.

سوتتالۋشى كىناسىن مويىنداماعانىنا قاراماستان، ونىڭ قىلمىس جاساعانى كۋالاردىڭ جاۋاپتارىمەن، دىبىس جازبالارىمەن، ساراپتاما قورىتىندىلارىمەن جانە باستى سوت تالقىلاۋىندا زەرتتەلگەن باسقا دا ءىس ماتەريالدارىمەن تولىق دالەلدەندى.

پروكۋرور سوتتالۋشىعا باس بوستاندىعىنان ايىرۋ جازاسىن تاعايىنداۋدى سۇرادى. ال سوتتالۋشى تاعىلعان ايىپتى مويىنداماي، ءوزىن اقتاۋدى ءوتىندى. سوت ونىڭ قىلمىستىق جاۋاپتىلىعى مەن جازاسىن جەڭىلدەتەتىن جانە اۋىرلاتاتىن ءمان-جايلاردى انىقتامادى.

- سوت ە. -نى ق ك- ءنىڭ (1997-جىلعى رەداكسيادا) 235-بابىنىڭ 3-بولىگىمەن، 259-بابىنىڭ 4-بولىگىنىڭ «ا»، «ب» تارماقتارىمەن كىنالى دەپ تانىپ، وعان تۇپكىلىكتى 13 جىل مەرزىمگە باس بوستاندىعىنان ايىرۋ جازاسىن تاعايىندادى، - دەلىنگەن قالالىق سوتتىڭ حابارلاماسىندا.

ۇكىم زاڭدى كۇشىنە ەندى.

بۇعان دەيىن شىمكەنتتە ەسىرتكى سايتتارىن جارنامالاعان كۇدىكتىنىڭ ۇستالعانىن جازعان ەدىك.