شىمكەنتتە 47 ولشەمدى اياق كيىم كيەتىن سارباز بورىشىن وتەپ ءجۇر

19 جاستاعى سارباز الماتى وبلىسىنان مەرزىمدى اسكەري قىزمەتكە شاقىرىلعان. ول اسكەرگە دەيىن تالعار پوليتەحنيكالىق كوللەدجىن «اۆتوەلەكتريك» ماماندىعى بويىنشا ءتامامداعان.

دەنيس بالا كەزىنەن ۆولەيبولمەن اينالىسقان. توعىزىنشى سىنىپتا-اق 45 ولشەمدى اياق كيىم كيگەن. ساربازدىڭ ايتۋىنشا، بويى مەن اياق كيىم ولشەمىنىڭ ۇلكەن بولۋى اكەسىنەن دارىعان.

اسكەري قىزمەتىنىڭ العاشقى كۇندەرىنەن-اق وعان قاجەتتى كيىم-كەشەك پەن اياق كيىمدى تاڭداۋ ماسەلەسى تۋىنداعان. وقۋ پۋنكتىندە وزىنە شاق اياق كيىم تابىلعانشا، وعان اسكەري ءبولىم بەرگەن كروسسوۆكانى كيىپ جۇرۋگە تۋرا كەلگەن.

كوپ ۇزاماي اسكەري ءبولىم قىزمەتكەرلەرى دەنيسكە 47 ولشەمدى اياق كيىم تاۋىپ بەرگەن. سودان بەرى ۇلكەن ولشەمدى اياق كيىمى قارۋلاستارىنىڭ اراسىندا ونى بىردەن تانۋعا مۇمكىندىك بەرەتىن بەلگىلەردىڭ بىرىنە اينالعان.

- شىمكەنت قالاسىندا كەزەكشىلىك اتقارىپ جۇرگەندە ادامدار مەنىڭ بويىما دا، اياق كيىمىمە دە تاڭعالىپ جاتادى. اسكەرگە العاش كەلگەندە اياعىما شاق اياق كيىم تابۋ وڭاي بولعان جوق. كەيىن ارنايى اياق كيىم الدىردى. وسى جاعدايدىڭ ءوزى قىزىق وقيعاعا اينالدى. اسكەرگە دە تەز ۇيرەنىسىپ، بارىمەن ءتىل تابىسىپ كەتتىم، - دەيدى دەنيس مۋحين.

قازىر ول قالا كوشەلەرىندە كۇن سايىن پاترۋلدىك قىزمەت اتقارىپ، تۇرعىندار مەن قوناقتاردىڭ قاۋىپسىزدىگىن قامتاماسىز ەتۋگە ۇلەس قوسىپ ءجۇر.

دەنيس بويىمەن عانا ەمەس، مەملەكەتتىك ءتىلدى جەتىك بىلۋىمەن دە كوزگە تۇسەدى. ول كۇندەلىكتى قىزمەت بارىسىندا قازاق تىلىندە ەركىن سويلەسەدى.

ال قارۋلاستارى بويشاڭ ساربازدى ازىلدەپ «گۋلليۆەر» دەپ اتاپ كەتكەن.