شينجاڭدىق ايمان جەڭىسنۇر قىزى دزيۋدودان قىتاي چەمپيونى اتاندى - شەتەلدەگى قازاق باسپا سوزىنە شولۋ
استانا. قازاقپارات - Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
تۇرىك مەملەكەتتەرى ۇيىمىنا مۇشە ەلدەر «Turktransplant» جۇيەسىن قالىپتاستىرادى - TRT
ت م ۇ دەنساۋلىق ساقتاۋ مينيسترلەرىنىڭ 4- وتىرىسى ازەربايجاننىڭ شۋشا قالاسىندا ءوتتى.
ازەربايجان دەنساۋلىق ساقتاۋ ءمينيسترى تەيمۋر مۋسايەۆ ۇيىمداستىرعان جيىنعا ت م ۇ باس حاتشىسى كۋبانىچبەك ومىراليەۆ، تۇركيا دەنساۋلىق ساقتاۋ ءمينيسترى كەمال مەميشوگلۋ، قىرعىزستان دەنساۋلىق ساقتاۋ ءمينيسترى الىمقادىر بەيشەناليەۆ، وزبەكستان دەنساۋلىق ساقتاۋ ءمينيسترىنىڭ ورىنباسارى داۆرون سۇلتانوۆ جانە قازاقستان دەنساۋلىق ساقتاۋ ءمينيسترىنىڭ ورىنباسارى ەربول وسپانوۆ قاتىستى.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
تۇركيالىق باسىلىمنىڭ مالىمەتىنشە، مۋسايەۆ جيىندا سويلەگەن سوزىندە ۇيىمعا مۇشە جانە باقىلاۋشى ەلدەر اراسىندا ءبىرتۇتاس مەديتسينالىق عىلىمي سالا قۇرۋدى، بىرلەسكەن عىلىمي زەرتتەۋلەر جۇرگىزۋدى جانە ورتاق مەديتسينالىق ءبىلىم بەرۋ ستاندارتتارىن انىقتاۋدى بىرلەسكەن قىزمەتتىڭ نەگىزگى باعىتى رەتىندە قاراستىراتىنىن ايتتى.
كەزدەسۋدەن كەيىن مينيسترلەر ۇيىم اياسىندا ورگان مەن تىندەردى ترانسپلانتاتسيالاۋ بويىنشا اقپارات پەن تاجىريبە الماسۋعا مۇمكىندىك بەرەتىن «Turktransplant» جۇيەسىن قۇرۋعا قاتىستى نيەت حاتتاماسىنا قول قويدى.
«سونىمەن قاتار، تمۇ- عا مۇشە جانە باقىلاۋشى ەلدەردىڭ دەنساۋلىق ساقتاۋ مينيسترلىكتەرىنىڭ عىلىمي-زەرتتەۋ ينستيتۋتتارى اراسىندا ونكولوگيا، كارديولوگيا، وفتالمولوگيا، پەدياتريا، تراۆماتولوگيا جانە ورتوپەديا سالالارىنداعى ءوزارا تۇسىنىستىك تۋرالى مەموراندۋمدارعا قول قويىلدى»، دەپ تۇيىندەيدى TRT.
شينجاڭدىق سپورتشى ايمان جەڭىسنۇر قىزى قىتاي چەمپيوناتىندا التىن مەدالدى ەنشىلەدى - جەنمين جيباو
ىلە قىزى ايمان جەڭىسنۇر قىزى دزيۋدودان ۇپاي سانى بويىنشا ەل چەمپيوناتىنىڭ العاشقى بىرىنشىلىگىن جەڭىپ الدى.
قىتايدىڭ ىشكى موڭعول اۆتونوميالىق ولكەسى، چىفىڭ قالاسىندا ۇلتتىق دزيۋدودان ۇپاي جيناۋ بويىنشا وتكەن جارىستا ىلە قازاق اۆتونوميالى وبلىسى موڭعولكۇرە اۋدانىنىڭ دزيۋدوشىسى ايمان جەڭىسنۇر قىزى ايەلدەر اراسىندا 78+ كەلى سالماقتا التىن مەدال ەنشىلەدى. جاس سپورتشىنىڭ بۇل جەڭىسى ونىڭ جەكە كۇش-قۋاتىنىڭ دالەلى عانا ەمەس، شىڭجاڭ دزيۋدوسىنىڭ دامىپ كەلە جاتقانىنىڭ جارقىن ۇلگىسى، دەپ حابارلايدى قىتايدىڭ «جەنمين جيباو» اقپاراتتىق پورتالى.
ايەلدەر اراسىنداعى 78+ كەلى سالماقتاعى فينالدا ايمان چەندۋ قالاسىندا وتكەن 31- جازعى ۋنيۆەرسيادا ويىندارىنىڭ چەمپيونى، تيانجيندىك جيا چۋنديمەن كەزدەستى. ايمان جەڭىسنۇر قىزى جاتتىقتىرۋشىسىنىڭ جارىس الدىندا بەلگىلەگەن جوباسى بويىنشا، كۇرەس تەحنيكاسىن دۇرىس يگەرىپ، ورايدى ءدال پايدالانىپ، يكەمدى دە قىراعى ارەكەتىمەن ۇلكەن باسىمدىلىقپەن جەڭىسكە قول جەتكىزدى.
ايتا كەتەيىك، بۇل التىن مەدال ايماننىڭ بيىلعى ب ر ي ك س-2024 ويىندارىندا دزيۋدودان 78+ كەلى التىندى جەڭىپ العاننان كەيىن وسى ساناتتاعى ەكىنشى التىن مەدالى. بۇل شارادا 33 ۇلتتىق قۇرامانىڭ 528 سپورتشىسى 15-ۇلتتىق ويىندارعا جولداما الۋ ءۇشىن باق سىناستى.
شياندا قازاقستاندىقتار «ءداستۇرلى قىتاي مەديتسيناسى» بويىنشا بىلىمدەرىن تولىقتىردى - «حالىق گازەتى»
جاقىندا شيان ءداستۇرلى قىتاي مەديتسيناسىنىڭ مي اۋرۋلارى ەمحاناسى مەن قازاقستان ءداستۇرلى مەديتسينا ساراپشىلارىنىڭ قاۋىمداستىعى بىرلەسىپ، 2024-جىلى ءداستۇرلى قىتاي مەديتسيناسىنىڭ دياگنوستيكاسى مەن ەمدەۋ تەحنولوگياسى بويىنشا حالىقارالىق وقۋ كۋرسىن باستادى. 12 قازاقستاندىق ەمشى ءداستۇرلى قىتاي مەديتسيناسىن ۇيرەنۋ ءۇشىن شانشي ولكەسىنىڭ شيان قالاسىنا كەلدى، دەپ حابارلايدى قىتايدىڭ «حالىق گازەتى».
اتالعان ب ا ق- تىڭ كەلتىرگەن دەرەكتەرىنە سۇيەنسەك، ەكى اپتالىق كۋرس تىڭداۋشىلارى ەكى توپقا ءبولىنىپ وقيدى. وقىتۋ كۋرسى ءداستۇرلى قىتاي مەديتسيناسىنىڭ دياگنوستيكالاۋ مەن ەمدەۋ جانە سيپاتتامالىق ادىستەرىنە نەگىزدەلە وتىرىپ، جەرگىلىكتى مەديتسينانىڭ نەگىزگى تەورياسىن، بالالار سەرەبرالدى سال اۋرۋىن، پسيحيكالىق جانە باسقا دا ءجيى كەزدەسەتىن سىرقاتتاردى ءداستۇرلى قىتاي مەديتسيناسى بويىنشا ەمدەۋدى ۇيرەتەدى. كۋرس زاماناۋي مەديتسينانى ءداستۇرلى مەديتسينامەن، تەوريالىق وقىتۋ مەن كلينيكالىق تاعىلىمدامالاردى بىرىكتىرە وتىرىپ جۇرگىزىلمەك.
«سيان ءداستۇرلى قىتاي مەديتسيناسى مي اۋرۋلارى ەمحاناسىنىڭ حالىقارالىق مەديتسينالىق جانە ينەمەن ەمدەۋ بولىمىندە قازاقستاندىق ەمشىلەر ەرمەنمەن قاقتاۋ، لوڭقا قويۋ، ينە شانشۋ جانە باسقا دا ءداستۇرلى قىتاي مەديتسيناسىنىڭ ۇتىمدى تاسىلدەرىن تىكەلەي ۇيرەنىپ، جەكە تاجىريبە جيناقتايدى. سول ارقىلى ءداستۇرلى قىتاي مەديتسيناسىنىڭ ءارتۇرلى ەمدەۋ ادىستەرىن مەڭگەرەدى» ، دەپ جازدى قىتايلىق باسىلىم.
نامانگاندا قاۋىننىڭ 400 دەن استام ءتۇرى وسىرىلەدى – ءوز ا
وزبەكستاننىڭ نامانگان وبلىسىنىڭ «مينگبۋلوق»، «چورتوق»، «يانگيقۋرعون»، «چۋست» اۋداندارىندا ديحاندار ەجەلدەن قاۋىننىڭ 400 دەن استام ءتۇرىن ءوسىرىپ كەلەدى. قاشان ءونىم ءپىسىپ جەتىلگەندە، قاۋىن مەيرامى وتەدى. بۇل ءداستۇر ۇجىمدىق شارۋاشىلىقتىڭ ەڭبەكقورلارىنىڭ قاۋىن-قاربىزدان ءدام تاتسىن دەگەن ماقساتتا ۇيىمداستىرىلعان. ءانشى-ونەرپازدار ءان ايتىپ، بارشانى قاۋىن مەيرامىنا شاقىرعان، دەپ جازادى وزبەكستاننىڭ «ءوز ا» اقپاراتتىق پورتالى.
«ءوز ا» - نىڭ اتاپ وتۋىنشە، قاۋىن مەيرامى كەڭىنەن جايقالعان باقتار مەن قۇنارلى ەگىستىكتەردە، سونداي-اق ەلدى مەكەندەردىڭ ورتالىعىندا دۇبىرلەپ وتكەن. مەرەكەلىك شارا اياسىندا ءتۇرلى كورمەلەر مەن جارىستار ۇيىمداستىرىلىپ، حالىقتىڭ كوڭىلىن كوتەرەتىن ويىن- ساۋىقتار مەن سەرۋەندەر قىزۋ قارقىنمەن جالعاسقان. مەيرام اياقتالعان سوڭ، كەلگەن قوناقتارعا، جاقىن تۋىستارىنا، سونداي-اق توي-دۋمانعا قاتىسا الماعان قاريالار مەن ناۋقاستارعا ەرەكشە ىقىلاسپەن قاۋىندار تارتۋ ەتىلگەن.
سونداي-اق، وسى اپتادا «ءوز ا» باسىلىمىندا «ورتالىق ازيا تاريحىندا تۇڭعىش رەت پارلامەنتارالىق وداق اسسامبلەياسى وزبەكستاندا وتەدى» دەگەن اقپارات جاريالادى.
ورتالىق ازيا تاريحىندا تۇڭعىش رەت پارلامەنتارالىق وداق اسسامبلەياسى وزبەكستاندا وتەدى.
وزبەكستاندىق ب ا ق-تىڭ مالىمەتىنشە، وزبەكستان ولي ماجليس سەناتىنىڭ ءتوراعاسى تانزيلا ناربايەۆا جەنيەۆا قالاسىندا ءوتىپ جاتقان پارلامەنتارالىق وداقتىڭ (پ و) 149-اسسامبلەياسىندا وداق ءتورايىمى تۋليا ەكسونمەن كەزدەستى.
پارلامەنتتىڭ جوعارعى پالاتاسىنىڭ حابارلاۋىنشا، كەزدەسۋدە وزبەكستاندا وتەتىن 150-اسسامبلەيانىڭ باعدارلاماسىن، ءىس-شاراعا قاتىستى جوسپارلار مەن جاڭا جوبالاردى تالقىلادى، دەپ جازادى وزبەكستاننىڭ «ءوز ا» اقپاراتتىق پورتالى.
«كەزدەسۋ بارىسىندا سوڭعى جىلدارداعى ەلدەگى ەكونوميكالىق دامۋ، الەۋمەتتىك قورعاۋ جۇيەسىنىڭ جەتىلدىرىلۋى جانە ادام قۇقىقتارىنىڭ باسىمدىعىن قامتاماسىز ەتۋگە باعىتتالعان رەفورمالار تۋليا ەكسون تاراپىنان ەرەكشە اتاپ ءوتىلدى»، دەلىنگەن حابارلامادا.
سونىمەن قاتار، تۇراقتى دامۋ ماقساتتارىنا قاتىستى جۇمىس جانە بۇل باعىتتا وزبەكستان پارلامەنتى تاراپىنان اتقارىلىپ جاتقان شارالار جايىندا ءسوز ايتىلعان.
قازاقستاندا ايگىلى يراندىق اقىن جانە ميستيك حافيز شيرازيدى ەسكە الۋ ءراسىمى ءوتتى - ParsToday
يراننىڭ ۇلى اقىنى ءارى ميستيكى قوجا شامسۋددين مۇحامماد حافيز شيرازيدى (1325-1390 ج.ج.) ەسكە الۋ مەرەيتويىنا وراي قازاقستاندا پارسى ءتىلى جانە يرانتانۋ فاكۋلتەتىنىڭ ستۋدەنتتەرىنىڭ قاتىسۋىمەن سالتاناتتى شارا ءوتتى، دەپ حابارلايدى «ParsToday» اقپارات اگەنتتىگى.
قازان ايىنىڭ 20-كۇنى يران كۇنتىزبەسىندە بەلگىلى يراندىق اقىن قوجا شامسۋددين مۇحامماد حافيز شيرازيدىڭ اتىمەن تىركەلىپ، جىل سايىن بۇل كۇنى ءتۇرلى باعدارلامالار وتكىزىلەدى. حافيز دوستارىنىڭ قازاقستانداعى كەزدەسۋى يران يسلام رەسپۋبليكاسىنىڭ مادەني كەڭەس بەرۋ ورنىندا جانە قازاقستاننىڭ استانا قالاسىنداعى ساادي قورىنىڭ وكىلدىگىندە ءوتتى.
parstoday اگەنتتىگىنىڭ مالىمەتىنشە، بۇل شارادا يراننىڭ ساادي قورىنىڭ قازاقستانداعى مادەني كەڭەسشىسى جانە وكىلى ءالي اكبار تالەبي ماتين ءحافيزدىڭ ءومىربايانىنا توقتالىپ، ەڭبەكتەرىن ءتۇسىندىردى جانە ونىڭ پارسى ءتىلدى يراندىق اقىنداردىڭ ەڭ تانىمال جانە ەڭ ۇلىلارىنىڭ ءبىرى بولعانىن ايتتى. دادەني كەڭەسشى حافيز شىعارمالارىن نازارعا الا وتىرىپ، ونى يراننىڭ ەڭ تانىمال اقىندارىنىڭ ءبىرى دەپ اتاپ، ۇلى شايىردىڭ شىعارمالارى تەك يراندا عانا ەمەس، بۇكىل الەمدە تانىمال ەكەنىن تىلگە تيەك ەتكەن.
سونداي-اق، تالەبي ماتيننىڭ ايتۋىنشا، حافيزدىڭ ولەڭدەرىنىڭ تاقىرىبى الۋان ءتۇرلى جانە ونىڭ ولەڭدەرى ءداستۇرلى يراندىق مۋزىكا، بەينەلەۋ ونەرى جانە كالليگرافيادا قولدانىلادى.
يراننىڭ قازاقستانداعى مادەنيەت جونىندەگى كەڭەسشىسىنىڭ مالىمەتىنشە، حافيزدىڭ ديۋانىندا 500 سونەت، 42 تورتتىك، بىرنەشە ودا بار جانە حافيز ءوزىنىڭ ديۋاناسىن 50 جىل بويى جازعان.
اۆتور
بەيسەن سۇلتان
