مۇرات اۋەزوۆ 81 جاسىندا دۇنيەدەن ءوتتى
استانا. KAZINFORM - كورنەكتى قوعام قايراتكەرى، بەلگىلى شىعىستانۋشى، فيلولوگيا عىلىمدارىنىڭ كانديداتى مۇرات مۇحتار ۇلى اۋەزوۆ ومىردەن ءوتتى.
قايعىلى حاباردى جازۋشى- جۋرناليست، قازاقستان پەن كلۋبىنىڭ پرەزيدەنتى بيگەلدى عابدۋللين جەتكىزدى.
«قارالى حابار كەلدى. ۇزاققا سوزىلعان اۋىر ناۋقاستان ۇلتىمىزدىڭ ماقتانىشى، كورنەكتى ويشىل مۇرات اۋەزوۆ ءجانتاسىلىم ەتىپتى. قوش بول، قىمباتتى مۇرات مۇحتار ۇلى!» دەپ جازدى ول Facebook پاراقشاسىندا.
قازاقستاندىق قوعام قايراتكەرى، بەلگىلى شىعىستانۋشى، تۇركىتانۋشى، مادەنيەتتانۋشى، ەسسەيست، ديپلومات جانە فيلولوگيا عىلىمدارىنىڭ كانديداتى بىلتىر عانا 80 جىلدىق مەرەيتويىن اتاپ وتكەن ەدى.
مۇرات مۇحتار ۇلى 1943-جىلعى 1-قاڭتاردا جامبىل وبلىسى مەركى اۋىلىندا دۇنيەگە كەلگەن.
قازاق ادەبيەتىنىڭ كورنەكتى جازۋشىسى، دراماتۋرگ، عالىم، قازاقتىڭ تۇڭعىش «اباي جولى» رومان- ەپوپەياسىنىڭ اۆتورى مۇحتار اۋەزوۆتىڭ وتباسىندا تۋعان مۇرات اكەسىنىڭ وسيەتى ارقاسىندا تۋعان تىلىنە، حالقىنا، مادەني مۇراسىنا دەگەن سۇيىسپەنشىلىك پەن قۇرمەتتى بويىنا ءسىڭىرىپ ءوستى.
1965 -جىلى م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ شىعىس تىلدەرى ينستيتۋتىن فيلولوگ- شىعىستانۋشى ماماندىعى بويىنشا ءبىتىردى.
ك س ر و عىلىم اكادەمياسىنىڭ الەم ادەبيەتى ينستيتۋتىندا ديسسەرتاتسيا قورعاپ، ادەبيەت تەورياسى بويىنشا فيلولوگيا عىلىمدارىنىڭ كانديداتى اتاندى.
قازاقستان جۋرناليستيكا اكادەمياسىنىڭ تولىق مۇشەسى.
مۇرات اۋەزوۆ «قازاقفيلم» كينوستۋدياسىندا باس رەداكتور (1981-1987)، قازاقستان جازۋشىلار وداعىنىڭ كوركەم اۋدارما جانە ادەبي ءوزارا بايلانىستار جونىندەگى القاسىنىڭ باسشىسى (1988-1990)، قازاقستانداعى «مير» تەلەراديوكومپانياسىنىڭ كوركەمدىك جەتەكشىسى (1990)، قازاق ك س ر جوعارعى كەڭەسىنىڭ دەپۋتاتى بولىپ سايلانىپ، كەڭەس پرەزيديۋمىنىڭ مۇشەسى، پارلامەنتارالىق بايلانىستار جونىندەگى كوميتەتتىڭ ءتوراعاسى (1990)، ۇلتتىق كىتاپحانا ديرەكتورى (2003-2006) سەكىلدى جوعارى قىزمەتتەردى اتقارعان.
قازاقستان ءوز تاۋەلسىزدىگىن جاريالاعان كەزدە ەلدى وزگەرتۋگە بەلسەنە اتسالىستى.
پارلامەنت دەپۋتاتى بولدى، سونىمەن قاتار ادەبي زەرتتەۋلەرمەن اينالىستى، قازاقستان رەسپۋبليكاسىنىڭ قىتاي حالىق رەسپۋبليكاسىنداعى تۇڭعىش ەلشىسى قىزمەتىن اتقاردى.
كوركەمدىك پروتسەستىڭ تەورياسى مەن پراكتيكاسى بويىنشا 200-دەن استام جاريالانىمنىڭ، سونداي- اق «ۋاقىتتى بايلانىستىرۋشى ءجىپ» (1972)، «يپپوكرەنا. ۋاقىت قۇدىقتارىن ارالاۋ» (1997) جانە «قايتا ورالۋ ءۇشىن كەتۋ» (2002) سياقتى تانىمال مونوگرافيالاردىڭ اۆتورى.
م. اۋەزوۆ 2007-جىلدان بەرى مۇحتار اۋەزوۆ اتىنداعى قوردى باسقارىپ كەلدى.
Kazinform اگەنتتىگى مارقۇمنىڭ وتباسى، تۋعان- تۋىستارىنىڭ قايعىسىنا ورتاقتاسىپ كوڭىل ايتادى.
