شىعىس قازاقستاندىق بۇركىتشى قىز سەگىز جاسىندا تاۋدان قالاي قۇس العانىن ايتىپ بەردى
ۇلان اۋدانىنا قاراستى بوزانباي اۋىلىندا بىرنەشە بۇركىتشى تۇرادى. قىران باپتاپ، اڭعا قۇس سالۋ ولار ءۇشىن ادەپكى تىرلىك. جۋىقتا وڭىردەگى ەڭ جاس قۇسبەگى ايزەرە ماركس قىزى باسىنان وتكەن وقيعالارىنىڭ بىرىمەن ءبولىستى.
ايزەرە بىلتىر ۇلان اۋدانىندا وتكەن "شىعىس سالبۇرىنى - 2022" ۇلتتىق سپورت ويىنىندا كوپكە تانىلدى. ول كەزدە الەمنىڭ بىرنەشە مەملەكەتىنەن تۋريستەر ارنايى كەلىپ، ەڭسەلى بۇركىتشىلەردىڭ ونەرىنە ءتانتى بولىپ قايتتى. قۇس باپتايتىن جان ءۇشىن باۋاشار ءراسىمى اسا ماڭىزدى. اڭشىنىڭ قولعا ۇيرەتكەن قۇسى العاش تاعىعا تۇسكەندە شىم-شىتىرىق الەم قاقپاسىن اشقانداي بولادى.
ايزەرەنىڭ وتباسى 15 جىلدان استام ۋاقىت بۇرىن موڭعوليادان قونىس اۋدارعان. سول كەزدە اكەسى ماركس ناجيتبان قىران قۇستارىمەن بىرگە، قازاقتىڭ كونەدەن كەلە جاتقان ءداستۇرى مەن مادەنيەتىن الا كەلگەن. قازاقستاننىڭ قۇرمەتتى سپورت قايراتكەرى باعداتحان مۇپتەكە قىزى دا جاس قۇسبەگىنىڭ اياق الىسىنا وڭ باعاسىن بەرىپ، ۇلتتىق ونەرگە قارشادايىنان ۇلەس قوسىپ جاتقانىن ەرەكشە اتاپ ءوتتى.
جاقىندارىنىڭ سوزىنشە، ايزەرەنىڭ "مۇزبالاق" اتتى قۇسى ءبىر كەزدەرى قاسقىر دا العان. بىلتىر وتكەن سالبۇرىندا بوزانباي اۋىلىنان شىققان ارۋعا سۇڭقاردىڭ بالاپانىن جەتىسۋ جەرىنەن ارنايى الدىرتتى. ال اكەسىمەن بىرگە تاۋ باسىنا شىعىپ، بۇركىتتىڭ بالاپانىن العاندا سەگىز جاستا بولعان.
"بوزانباي ماڭىنداعى شىڭداردىڭ بىرىنە ەتەكتەي كوتەرىلىپ، ارتىق دىبىس شىعارماۋعا تىرىستىق. اكەم ول جەردە بۇركىتتىڭ ۇياسى بارىن بۇرىننان بىلەتىن. تابيعاتىنان اسا سەزىمتال قۇس. ادامنىڭ قورقىپ تۇرعانىن بىردەن بايقايدى. بويىڭدا ۇرەي تۇرسا، شابۋىلداۋدان دا تايىنبايدى. سۇڭقار، قارشىعا سياقتى تۇرقى شاعىن قاناتتىلاردان ءقاۋىپ از. ءبىز ۇياعا جەتكەندە تەك بالاپان عانا بولدى. ۇيگە اكەلگەلى كۇتىمىنە ەرەكشە ءمان بەردىك. ال بىلتىر باۋاشار راسىمىنەن سوڭ سايىسقا "قاندىكوز" اتتى سۇڭقارىمدى قوستىم"، - دەدى ايزەرە.
بوزانباي اۋىلىنا بارعان تۋريستەر دە، ەكى جىل قاتارىنان وتكىزىلگەن "شىعىس سالبۇرىنى" حالىقارالىق سايىسىنا كەلگەن قوناقتار دا سۇڭقار كوتەرگەن قىزدى كورسە، جانىنا جەتىپ بارىپ، سۋرەتكە تۇسۋدەن جالىقپايدى. ايزەرەنىڭ اناسى شەكەرمان شي توقىما، بىلعارىدان بىلەزىك ازىرلەپ، كىلەم توقۋدىڭ شەبەرى.
اقپارات دەرەككوزى: Massaget.kz
