شىعىس قازاقستاندا زاڭسىز التىن وندىرۋمەن اينالىسقان 6 ادام ۇستالدى
وسكەمەن. KAZINFORM - شىعىس قازاقستان وبلىسىندا پوليتسەيلەر ارنايى تەحنيكامەن زاڭسىز التىن ءوندىرۋ فاكتىسىن انىقتادى.
ش ق و پ د ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى ءوڭىر اۋداندارىنىڭ بىرىندە باعالى پايدالى قازبالاردى زاڭسىز وندىرۋمەن اينالىسقان ءبىر توپ ادامدى ۇستادى. قىلمىستىق ارەكەتتى تولىق تىركەۋ ماقساتىندا جەدەل ۋاكىلدەر ۇشقىشسىز باسقارىلاتىن ۇشۋ اپپاراتىن پايدالانعان.
- سول ارقىلى زاڭسىز قازۋ جۇمىستارى جۇرگىزىلگەن جەردىڭ ناقتى ورنى انىقتالدى. جەدەل ءىس-شارالار ناتيجەسىندە وقيعا ورنىنان 6 ادام ۇستالدى. تەرگەۋ ارەكەتتەرى بارىسىندا ءبىر ەكسكاۆاتور، ءۇش مەتال ىزدەگىش قۇرىلعى، 2 اۆتوكولىك جانە توپىراق ۇلگىلەرى الىندى، - دەپ حابارلادى دەپارتامەنتتىڭ باسپا ءسوز قىزمەتىنەن.
اتالعان فاكتى بويىنشا سوتقا دەيىنگى تەرگەۋ امالدارى باستالدى. جەراستى رەسۋرستارىنا كەلتىرىلگەن زالالدىڭ مولشەرىن انىقتاۋ ءۇشىن ءتيىستى ساراپتاما تاعايىندالدى.
ەسكە سالساق، وسىعان دەيىن شۋچە كولى جاعالاۋىنداعى 53,4 ميلليون تەڭگەنىڭ جەر ۋچاسكەسى مەملەكەتكە قايتارىلعانى حابارلانعان.
