شىعىس قازاقستاندا قايىقتان قۇلاعان بالىقشى سۋعا باتىپ كەتتى
وسكەمەن. KAZINFORM - شىعىس قازاقستان وبلىسى التاي اۋدانىندا قايىقتان قۇلاعان بالىقشى سۋعا باتىپ كەتتى.
ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، وقيعا 14-ساۋىردە التاي اۋدانى كرەمنيۋحا اۋىلىنان 10 شاقىرىم جەردە بولعان. ەر ادام ەرتىس وزەنىنە بالىق اۋلاۋعا بارعان.
«بەلگىلى بولعانداي، ول بۇرىن ورناتىلعان بالىق اۋلاۋ تورلارىن تەكسەرۋ كەزىندە قايىقتان قۇلاپ كەتكەن. ۇستىندە قۇتقارۋ جيلەتى بولماعاندىقتان قايتا شىعا الماي سۋعا باتتى. ت ج د سۇڭگۋىرلەرى سول جەرگە كەلىپ جەتىپ، 40 جاستاعى ازاماتتىڭ دەنەسىن تاۋىپ، جاعاعا الىپ شىقتى»، - دەپ حابارلادى ۆەدومستۆو وكىلدەرى.
وسى رەتتە، قۇتقارۋشىلار ءوڭىر جۇرتشىلىعىنا بالىق اۋلاۋعا بارعاندا قاۋىپسىزدىك شارالارىن قاتاڭ ساقتاپ، قايىققا وتىرعاندا قۇتقارۋ كەۋدەشەسىن مىندەتتى تۇردە كيۋ كەرەكتىگىن ەسكەرتەدى.
