شىعىس قازاقستاندا قار كوشكىنى ءتۇسىرىلدى

وسكەمەن. KAZINFORM - شىعىس قازاقستان وبلىسىندا جاساندى جولمەن قار كوشكىنى ءتۇسىرىلدى.

ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، قار كوشكىنىنىڭ الدىن الۋ جۇمىستارى رەسپۋبليكالىق ماڭىزى بار «وسكەمەن- التاي» تاسجولىنىڭ 58-66 شاقىرىمىندا جۇرگىزىلدى.

— تاۋدا جارىلىس جاسالىپ، بارلىعى 5090 تەكشە مەتر قار ءتۇسىرىلدى. جول قاردان جەدەل تازارتىلدى. وبلىستا بارلىعى قار كوشكىنى ءجۇرۋ قاۋپى جوعارى 325 ۋچاسكە بار. ولارعا مونيتورينگ تۇراقتى تۇردە جۇرگىزىلەدى. قار ولشەگىشتەردىڭ كومەگىمەن باقىلاۋشىلار جارىلىس جۇمىستارىن جۇرگىزۋ قاجەتتىلىگىن انىقتايدى، — دەيدى «قازسەلدەنقورعاۋ» شق فيليالىنىڭ باسشىسى سوۆەتبەك ستانبەكوۆ.

ءوڭىردىڭ تاۋلى جەرلەرىندە كوشكىن ءجۇرۋ قاۋپى ءالى دە بار. سوندىقتان تۇرعىندارعا تاۋعا بارۋدان باس تارتۋ قاجەتتىگى ەسكەرتىلدى.

ەسكە سالساق، وسىعان دەيىن شىعىس قازاقستان وبلىسىندا ءبىر كۇندە ەكى رەت قار كوشكىنى جۇرگەنى حابارلانعان.