شىعىس قازاقستاندا كادر تاپشىلىعى ماسەلەسى وزەكتى

وسكەمەن. KAZINFORM - شىعىس قازاقستان وبلىسىندا ءتۇرلى سالالاردا كادر تاپشىلىعى ماسەلەسى وزەكتى بولىپ وتىر.

وبلىستىق كاسىپكەرلەر پالاتاسى جۇرگىزگەن زەرتتەۋ بارىسىندا وڭىردە كادر تاپشىلىعى سەزىلىپ وتىرعانى انىقتالدى. اسىرەسە ءوندىرىس، قۇرىلىس، ساۋدا، ءبىلىم، دەنساۋلىق ساقتاۋ جانە الەۋمەتتىك سالادا تاپشىلىق جوعارى.

- زەرتتەۋگە شىعىس قازاقستان بويىنشا 2 مىڭعا جۋىق كاسىپورىن قاتىستى. ولاردىڭ ەسەپتەۋى بويىنشا 2025 -جىلى كادرلارعا دەگەن قاجەتتىلىك 7965 ادامدى قۇرايدى. اسىرەسە جۇمىسشى ماماندىقتارىندا بوس ورىن كوپ، - دەيدى ش ق و كاسىپكەرلەر پالاتاسى ادامي كاپيتالدى دامىتۋ ءبولىمىنىڭ باسشىسى اسەت ءادىلحان.

اسىرەسە كەن كۇيدىرۋ جانە مەتالل كۇيدىرۋ پەشتەرىنىڭ وپەراتورى، گاز كەسۋشىلەر، اۆتوسلەسار، اۆتومەحانيك، ارماتۋراشى، مەتالل قۇرىلىمدارىن مونتاجداۋشى، ەلەكتريك، اعاش ۇستاسى، ساتۋشى مەن اۆتوبۋس جۇرگىزۋشىسىنە سۇرانىس جوعارى.

- جوعارى ءبىلىمدى ماماندارعا سۇرانىس سالىستىرمالى تۇردە تومەن. نەگىزگى قاجەتتىلىك - كوللەدج تۇلەكتەرى. بۇل 4,3 مىڭ ادام، - دەيدى اسەت ءادىلحان.

ەسكە سالساق، وسىعان دەيىن وسكەمەندە كاسىپكەر اكىمدىكپەن سوتتاسىپ، جەڭىپ شىققانى حابارلانعان.