شىعىس قازاقستاندا حالىقارالىق بۇركىتشىلەر فەستيۆالى وتەدى
وسكەمەن. KAZINFORM - شىعىس قازاقستان وبلىسى ۇلان اۋدانىندا «شىعىس سالبۋرىنى - 2025» فەستيۆالى وتەدى.
كوزى قىراعى قىران قۇستى قولىنا قوندىرىپ، اڭعا سالۋدى جانى سۇيەتىن جانداردىڭ باسىن قوسىپ كەلە جاتقان «شىعىس سالبۋرىنى» فەستيۆالى بيىل دا جالعاسىن تاپپاق. وعان ادەتتەگىدەي الەمنىڭ ءار تۇكپىرىنەن بۇركىتشىلەر كەلەدى دەپ كۇتىلىپ وتىر.
- «شىعىس سالبۋرىنى - 2025» فەستيۆالى 9-11- قازان ارالىعىندا ۇلان اۋدانىنا قاراستى بوزانباي اۋىلىنىڭ ماڭىنداعى «بۇركىت توبە» الاڭىندا ۇيىمداستىرىلادى. وعان قازاقستاننىڭ تۇكپىر- تۇكپىرىنەن جانە شەتەلدەن بۇركىتشىلەر قاتىسادى. ولار جىرتقىش قۇستاردىڭ كۇشىن، شەبەرلىگىن جانە سۇلۋلىعىن كورسەتىپ، عاسىرلار بويى قالىپتاسقان ۇلتتىق داستۇرلەردى كەڭىنەن ناسيحاتتاماق، - دەپ حابارلادى ۇلان اۋدانى اكىمدىگىنەن.
ايتا كەتەيىك، بىلتىر بۇركىتشىلەر دوداسىنا 90 نان استام قۇسبەگى قاتىسىپ، 5000 نان استام ادام كەلگەن.
ەسكە سالساق، وسىعان دەيىن بۇركىتشى قىز تۇركىستاندا مۇراجاي اشىپ، جاستاردى قۇسبەگىلىك ونەرگە باۋلىپ جۇرگەنى جايلى جازعانبىز.
