شىعىس قازاقستاندا 9 جىل بويى ىزدەۋدە جۇرگەن قىلمىسكەر اۋەجايدا ۇستالدى
وسكەمەن. KAZINFORM - شىعىس قازاقستان وبلىسىنىڭ پوليتسەيلەرى 2016-جىلدان بەرى ىزدەۋدە جۇرگەن 38 جاستاعى ازاماتتى اۋەجايدا ۇستادى.
بەلگىلى بولعانداي، ول الاياقتىق جاساپ، 5 ميلليون تەڭگە پايدا كوردى دەگەن كۇدىككە ىلىنگەن.
- قىلمىستىق ءىس ماتەريالدارىنا سايكەس، ەر ادام جابىرلەنۋشىنىڭ سەنىمىنە كىرە وتىرىپ، ونى الداپ، اقشاسىن قالتاعا باسقان. وسى جىلدار ىشىندە ول ءادىل سوتتان جالتارىپ ءجۇردى. تۇرعىلىقتى جەرىن جيى اۋىستىرىپ وتىرعان جانە قوعامدىق ورىنداردان ادەيى بوي تاسالاپ جۇرگەن، - دەپ حابارلادى ش ق و پوليتسيا دەپارتامەنتىنىڭ باسپا ءسوز قىزمەتىنەن.
جەدەل-ىزدەستىرۋ شارالارى بارىسىندا پوليتسەيلەر كۇدىكتىنى وسكەمەن قالاسىنا ۇشىپ كەلگەن ساتىندە اۋەجايدان ۇستادى.
قازىرگى ۋاقىتتا ەر ادام ۋاقىتشا ۇستاۋ يزولياتورىنا قامالدى. تەرگەۋ امالدارى جۇرگىزىلىپ جاتىر.
ەسكە سالساق، «ازيا اۆتو» كومپانياسىنىڭ بۇرىنعى باسشىسى سىرتتاي 9 جىلعا باس بوستاندىعىنان ايىرىلعانى حابارلانعان.
