شىعىس قازاقستاندا 3 ادام موپەدىن تىركەۋگە قويدى
وسكەمەن. KAZINFORM - شىعىس قازاقستان وبلىسىندا 3 ادام جاڭا زاڭناما تالاپتارىنا سايكەس موپەدتەرىن تىركەۋگە قويدى.

وبلىستا العاشقى موپەدتەر تىركەۋدەن ءوتتى. اۋدانداردىڭ بىرىندە تۇراتىن ازامات اپتا باسىندا موپەدىن رەسىمدەسە، تاعى ەكەۋىن وسكەمەن تۇرعىندارى ەسەپكە قويعان. بارلىق موپەد يەلەرىنە تىركەۋ كۋالىگى مەن مەملەكەتتىك نومىرلەر بەرىلدى. بۇل تۋرالى ش ق و پ د اكىمشىلىك پوليتسيا باسقارماسى باستىعىنىڭ ورىنباسارى يگور كليشين ءمالىم ەتتى.
- وسى جىلدىڭ 5 - ساۋىرىنەن باستاپ موپەدتەر مەحانيكالىق كولىك قۇرالدارىنا تەڭەستىرىلەتىن بولدى. ەندى وسى كولىك ءتۇرىن پايدالانۋ ءۇشىن كەلەسى شارتتاردى ورىنداۋ قاجەت: پوليتسيادا مەملەكەتتىك تىركەۋدەن ءوتۋ، A، A1 نەمەسە B ساناتىنداعى جۇرگىزۋشى كۋالىگىن الۋ، تەحنيكالىق بايقاۋدان ءوتۋ جانە ازاماتتىق- قۇقىقتىق جاۋاپكەرشىلىك ساقتاندىرۋ پوليسىنە يە بولۋ، - دەدى ول.
موپەدتەردى تىركەۋ وسكەمەن قالاسىنىڭ مامانداندىرىلعان حالىققا قىزمەت كورسەتۋ ورتالىعىندا جۇرگىزىلۋدە. كولىك قۇرالىن تىركەۋ ءۇشىن جەكە كۋالىك، تەحنيكالىق پاسپورت نەمەسە كولىك قۇرالىنىڭ سيپاتتامالارى كورسەتىلگەن قۇجاتتار بولۋى ءتيىس. ودان سوڭ ءوتىنىش تولتىرىپ، موپەدتى تەكسەرۋدەن وتكىزىپ، مەملەكەتتىك باج سالىعىن تولەۋ قاجەت.
جاڭا زاڭنامالىق وزگەرىستەر كۇشىنە ەنگەننەن كەيىن، تىركەلمەگەن موپەدتى باسقارۋ جانە جۇرگىزۋشى كۋالىگىسىز ءجۇرۋ قاتاڭ تىيىم سالىنادى.
ەسكە سالساق، وسىعان دەيىن الماتىدا تىركەلگەن موپەدتەر سانى 100 دەن اسقانى حابارلانعان.