شىعىس قازاقستان مەن اباي وبلىستارىندا 4 اۋدان قۇرىلدى
مەملەكەت باسشىسى «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسىنىڭ كەيبىر ماسەلەلەرى تۋرالى» جارلىققا قول قويدى، دەپ حابارلايدى Kazinform اقوردانىڭ رەسمي سايتىنا سىلتەمە جاساپ.
«قازاقستان رەسپۋبليكاسىنىڭ اكىمشىلىك-اۋماقتىق قۇرىلىسىنىڭ كەيبىر ماسەلەلەرى تۋرالى
«قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» قازاقستان رەسپۋبليكاسى زاڭىنىڭ 9-بابىنا سايكەس قاۋلى ەتەمىن:
- شىعىس قازاقستان وبلىسى قاتونقاراعاي اۋدانىنىڭ اكىمشىلىك ورتالىعى شىعىس قازاقستان وبلىسى قاتونقاراعاي اۋدانىنىڭ ۇلكەن نارىن اۋىلىنان قاتونقاراعاي اۋىلىنا كوشىرىلسىن.
- شىعىس قازاقستان وبلىسىنىڭ قۇرامىندا:
1) قاتونقاراعاي اۋدانىنىڭ قۇرامىنان ءبولۋ جولىمەن اكىمشىلىك ورتالىعى ۇلكەن نارىن اۋىلىندا ورنالاساتىن ۇلكەن نارىن اۋدانى؛
2) كۇرشىم اۋدانىنىڭ قۇرامىنان ءبولۋ جولىمەن اكىمشىلىك ورتالىعى مارقاكول اۋىلىندا ورنالاساتىن مارقاكول اۋدانى قۇرىلسىن.
- اباي وبلىسىنىڭ قۇرامىندا:
1) ءۇرجار اۋدانىنىڭ قۇرامىنان ءبولۋ جولىمەن اكىمشىلىك ورتالىعى ماقانشى اۋىلىندا ورنالاساتىن ماقانشى اۋدانى؛
2) سەمەي قالاسىنىڭ قۇرامىنان ابىرالى، اينابۇلاق، اقبۇلاق، العاباس، ەرتىس، نوۆوباجەنوۆو، وزەركا، پريرەچنىي، جيەنالى، دوستىق، قاراولەڭ، كوكەنتاۋ اۋىلدىق وكرۋگتەرى مەن ءشۇلبى، شاعان كەنتتەرىن ءبولۋ جولىمەن اكىمشىلىك ورتالىعى سەمەي قالاسىنىڭ اۋماعىندا ورنالاساتىن جاڭاسەمەي اۋدانى قۇرىلسىن.
- ورتالىق مەملەكەتتىك ورگاندار، شىعىس قازاقستان جانە اباي وبلىستارىنىڭ جەرگىلىكتى وكىلدى جانە اتقارۋشى ورگاندارى ورتالىق مەملەكەتتىك ورگانداردىڭ ءتيىستى اۋماقتىق بولىمشەلەرىنىڭ، جەرگىلىكتى وكىلدى جانە اتقارۋشى ورگاندار مەن ۇيىمداردىڭ ىركىلىسسىز جانە ءتيىمدى جۇمىس ىستەۋىن قامتاماسىز ەتۋ جونىندە شارالار قابىلداسىن.
- وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.
- وسى جارلىق 2024-جىلعى 1- قاڭتاردان باستاپ قولدانىسقا ەنگىزىلەدى جانە رەسمي جاريالانۋعا ءتيىس»، - دەلىنگەن جارلىقتا.
