شياننان الماتىعا جولاۋشىلار پويىزى قاتىنايدى - شەتەلدەگى قازاق باسپا ءسوزى
Kazinform حاا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
بايان-ولگي ايماماعىندا «قۇسبەگىلەر سارايى» سالىنادى - Janadauir
موڭعوليانىڭ «جاڭا ءداۋىر» باسىلىمى «قازاق قۇسبەگىلىك وداعىنىڭ» اتقارۋشى ديرەكتورى بەكبولات بۇعىباي ۇلىمەن وتكىزىلگەن سۇحباتىن جاريالادى. اتالعان ب ا ق-تىڭ دەرەگىنشە، بايان-ولگي ايماقتىق قۇسبەگىلىك وداعىنىڭ باستاماسىمەن وسى ايماقتا «قۇسبەگىلەر سارايى» سالىنادى. ءتىلشى وداقتىڭ اتقارۋشى ديرەكتورىنان بۇل جوبا نەگىزىنەن قاشان جۇزەگە اساتىنىن سۇراعان.
بەكبولات بۇعىباي ۇلىنىڭ ايتۋىنشا، بايان-ولگي ايماعىندا بۇركىتشىلەردىڭ ەكى وداعى بار. سونىڭ ءبىرى - «قازاق قۇسبەگىلىك وداعى» ءوز ءىس-قىزمەتىن جۇرگىزگەلى بيىل 3 جىلدىڭ ءجۇزى بولعان. وداقتىڭ ءتوراعاسى كوپ جىلدار بويى تابيعات، تۋريزم سالاسىن باسقارعان اتاي اياتحان ۇلى. ال، بەكبولات بۇعىباي ۇلى اتقارۋشى ديرەكتور قىزمەتىندە. وسى ۋاقىت ارالىعىندا قۇسبەگىلەر سايىسىن ۇيىمداستىرۋ، قۇسبەگىلەر تۋرالى كىتاپ شىعارۋ، ماتەريال جيناقتاۋ قاتارلى شارۋالار جۇرگىزىلدى. وتكەن جىلى بۇركىتشىلەر تويىن سارى كولدە ۇيىمداستىرعان. بۇعان دەيىن 24 رەت بۇركىتشىلەر تويى وتكەن ەكەن. سونىڭ ارقاسىندا الەمنىڭ تۇكپىر- تۇكپىرىندەگى كوپتەگەن ساياحاتشىلارعا تانىلعان. بۇركىت جانە بۇركىتشىلەر ۇلتتىق برەند دارەجەسىنە كوتەرىلىپتى.
الايدا ولاردىڭ ءبىر كەمشىلىگى - تەك بۇركىتشىلەر تويى كەزىندە عانا بۇركىتشىلەردى ەسكە الادى. سوندىقتان دا وسى كىسىلەردىڭ باسىن قوسقان ءبىر ۇيىم بولسىن. ول ۇيىمنىڭ ءوز سارايى، بۇركىتشىلەر تۋرالى ماعلۇماتتى ءبىر ورتالىقتان السىن دەگەندى ماقسات تۇتقان. سارايدىڭ كولەمى - 120 شارشى مەتر. كيىز ءۇي تارىزدەس. شەتەلدىك قوناقتار ماعلۇمات السا، الىس جولدان كەلگەن بۇركىتشىلەرىمىزدىڭ باس سۇعاتىن ورداسى دەپ تۇسىنسە بولادى.
اتالعان ورتالىقتا بۇركىتتى وتىرعىزاتىن جەكە ۇيشىك تارىزدەس كابينكا، ات بايلايتىن جەكە قورا، سارايدىڭ سىرتىندا قاشاسى، دارەتحانا جانە تاعى باسقالاي دۇنيەلەر دە ويلاستىرىلعان. ولار وسى ويلارىن ىسكە اسىرۋ ءۇشىن قارجى ەنگىزەتىن شەتەلدىك كومپانيالارعا، قورلارعا جوباسىن تانىستىرۋ ناتيجەسىندە «Cultural Sanctuaries Foundation» اتتى ۇيىم قارجى ەنگىزىپ، بۇركىتشىلەر سارايىنىڭ سۋرەت جوباسى جاسالىپ بەكتىلگەن.
قازىرگى تاڭدا ءبىر كومپانيامەن شارت جاساۋ ارقىلى قۇرىلىس جۇمىسى باستالماق كورىنەدى. ەندىگى جوسپار بويىنشا، كەلەسى بۇركىتشىلەر تويىنا دەيىن اياقتالادى دەپ كۇتىلۋدە.
موڭعوليالىق باسىلىمنىڭ مالىمەتىنشە، «Cultural Sanctuaries Foundation» ۇيىمى مادەني مۇرانى قورعاۋ، ساقتاۋ، بولاشاققا جەتكىزۋ ماقساتىندا جۇمىس ىستەپ وتىرعان بەيرەسمي ۇيىم. ورتالىعى - امەريكا قۇراما شتاتىندا. ال ەندى ماقساتىنا كەلسەك - قازىرگى تاڭدا كوپتەگەن ۇلتتىق برەندىمىز ارقىلى، سەرۆيس داياشىلىقتارىن جاقسارتۋ ارقىلى ەلىمىزگە، ايماعىمىزعا كوپتەگەن تۋريست تارتۋ.
«قازاق قۇسبەگىلىك وداعىنىڭ» اتقارۋشى ديرەكتورى بەكبولات بۇعىباي ۇلى سۇحباتىندا ءتىلشىنىڭ تاعى بىرنەشە سۇراقتارىنا جاۋاپ بەرگەن.
حۋناندا ساۋىت- دۋلىعا جاسايتىن قانداسىمىز ەستاي كادىرقان ۇلى - CNR
ساۋىت-دۋلىعا جوبالاۋشىسى ەستاي كونە مۇرانى جاڭعىرتۋدا.
قىتايدىڭ حۋنان ولكەسى چاڭشا قالاسىنىڭ وڭتۇستىك شەتىندەگى شاعىن اۋداندا ورنالاسقان قاراپايىم جۇمىس بولمەسىندە ءبىر قازاق جىگىتى ساۋىت-دۋلىعا جاساۋمەن اينالىسادى. ونىڭ اتى-ءجونى ەستاي كادىرقان ۇلى. ساۋىت-دۋلىعا جاساۋ ورنىنىڭ جوبالاۋشىسى ە. كادىرقان ۇلى اتالعان جۇمىسپەن اينالىسقانىنا 14 جىل بولىپتى، دەپ حابارلايدى قىتايدىڭ «ورتالىق حالىق راديوسى».
قىتايلىق ب ا ق-تىڭ مالىمەتىنشە، ساۋىت-دۋلىعا جاساۋ ءبىرشاما كۇردەلى، قيىندىعى بار ونەرگە جاتادى. ونىڭ ۇستىنە قوعامنىڭ جانە عىلىم-تەحنيكانىڭ بۇگىنگىدەي دامىعان زامانىندا جەكە قورعانىس بۇيىمى رەتىندە قولدانىلاتىن ساۋىت-دۋلىعاعا قاجەتسىنۋ تومەندەگەنى بەلگىلى. سول سەبەپتى بۇل جۇمىستان پايدا تابۋ قيىنداۋ بولادى. دەگەنمەن قىزىعۋشىلىقتان باستالعان كاسىپتى جالعاستىرۋدىڭ قيىندىعى بولعانىمەن، ەستاي كادىرقان ۇلى الدا مۇمكىندىكتەردىڭ كوپ بولاتىندىعىنا سەنىممەن قارايدى ەكەن.
قىتايدىڭ ىشكى ولكەلەرىندە تۇرىپ، ەرەكشە ونەرمەن شۇعىلدانىپ جاتقان ەستاي كادىرقان ۇلىنان وسى اپتادا قىتايدىڭ ورتالىق حالىق راديوسىنىڭ تىلشىلەرى گۇلب ا قشا ءمادى قىزى مەن اينۇر گىمىڭعازى قىزى ارنايى بارىپ دايىنداعان بەينەجازبانى ۇسىنعان.
تۇركيا تەلەراديو كورپوراتسياسى 60 جاستا - TRT
تۇركيانىڭ كورۋ جانە ەستۋ جادىسى تۇركيا تەلەراديو كورپوراتسياسى (TRT) 60 جاستا. جارتى عاسىردان استام ۋاقىتتان بەرى ۇمىتىلماس ەفيرلەر مەن جاڭالىقتار TRT ەكرانىنان كورەرمەنگە ۇسىنىلىپ كەلەدى.
بۇل تۋرالى تۇركيا راديو تەلەۆيزيا پورتالى حابارلادى.
اتالعان ب ا ق-تىڭ دەرەگىنشە، تۇركيادا 1927 - جىلى 6-مامىر كۇنى راديو ەفيرلەرى باستالعان TRT- ءنىڭ كەيىن تەلەارنالارى ىسكە قوسىلدى.
العاشقى ەفيرىن 1968 - جىلى 31-قاڭتار كۇنى ميتحاتپاشا ستۋدياسىنان باستالعان TRT-نىڭ 1964 - جىلى 1-مامىر كۇنى قابىلدانعان زاڭمەن تۇركيا تەلەراديو كورپوراتسياسى رەتىندە نەگىزى قالانعان.
ءار كەزەڭ سايىن ءوزىن جاڭارتىپ، ءوز سالاسىندا ءىزاشار بولىپ كەلە جاتقان TRT تۇركيانىڭ كورۋ جانە ەستۋ جادىسىنا اينالدى.
«TRT 41 تىلدە جانە ديالەكتىدە تاراتقان ەفيرلەرى جانە «TRT Germany» ،«TRT Russian» ، «TRT French» ،«TRT Balkan» ،«TRT Africa» ،«TRT Spanish» ساندىق حابار تاراتۋ پلاتفورمالارى مەن حالىقارالىق جاڭالىقتاردى الەم جۇرتشىلىعىنا ۇسىنادى. بۇگىنگى تاڭدا TRT ءوزىنىڭ تەلە-راديو ارنالارى جانە حالىقارالىق حابار تاراتۋ توپتارىمەن 7 قۇرلىققا حابار تاراتۋ جانە ءوندىرىس قىزمەتىن ءساتتى تۇردە جۇزەگە اسىرۋدا. 60 جىلدىق تاجىريبەسىمەن دۇرىس جانە بەيتاراپ قوعامدىق حابار تاراتۋدىڭ جالعىز مەكەنجايى TRT تۇرىك حالقىنىڭ ءۇنى بولۋدى جالعاستىرۋدا»، دەپ جازادى تۇركيالىق ب ا ق.
شياننان الماتىعا جولاۋشىلار پويىزى قاتىنايدى - «حالىق گازەتى»
قىتايدىڭ شيان قالاسىنان الماتىعا جولاۋشىلار پويىزى قاتىنايدى، دەپ حابارلادى «حالىق گازەتى» قازاقستاندىق «sputnik.kz»-كە سىلتەمە جاساپ.
اتالعان اقپارات كوزدەرىنىڭ كەلتىرگەن دەرەكتەرىنە سۇيەنسەك، «ق ت ج» ۇ ك» ا ق، «جولاۋشىلار تاسىمالى» ا ق باسشىلارى جانە شيان قالاسى ۇكىمەتىنىڭ (ق ح ر) دەلەگاتسياسى قىزمەتتىك كەزدەسۋ بارىسىندا شيان قالاسىنان الماتىعا حالىقارالىق تۋريستىك جولاۋشىلار پويىزىن ىسكە قوسۋدى ۇيىمداستىرۋ ماسەلەسىن تالقىلاعان.
تۋريستىك پويىز «ءۇرىمجى - الماتى-2» قاتىناسىنداعى №103/104 جولاۋشىلار پويىزىنىڭ كەستەسى بويىنشا قورعاس- التىنكول شەكارالىق وتكەلى ارقىلى جۇرەدى.
ايتا كەتۋ كەرەك، بۇل پويىز الماتى-2 ستانسياسىندا بىرنەشە كۇن تۇراقتايدى. وسى ۋاقىت ىشىندە قازاقستاندىق تاراپ جولاۋشىلار ءۇشىن تەمىرجول ۆوكزالىندا قاۋىپسىزدىك شارالارىن قولدانىپ، مادەني ءىس-شارالاردى ۇيىمداستىرۋعا كومەك كورسەتەدى.
تەھرانداعى قازاقستان ەلشىلىگىندە «شاڭىراق» اتتى قازاق ۇلتتىق بۇرىشى اشىلدى - Parstoday
يران استاناسى تەگەرانداعى قازاقستان ەلشىلىگىندە ناۋرىز مەيرامى مەن 1-مامىر - بىرلىك كۇنىنە وراي مەرەكەلىك شارا ۇيىمداستىرىلىپ، «شاڭىراق» قازاق ۇلتتىق بۇرىشىنىڭ اشىلۋ ءراسىمى ءوتتى، دەپ حابارلايدى يراننىڭ «Parstoday» اقپارات اگەنتتىگى.
اتالعان ب ا ق-تىڭ حابارلاۋىنشا، مەرەكەلىك شارادا قازاقستاننىڭ يرانداعى جاڭا ەلشىسى وڭتالاپ وڭالبايەۆ مىرزا ءسوز سويلەپ، قازاقستان مەن يراننىڭ ساۋدا- ەكونوميكالىق بايلانىستارىنا توقتالىپ، قازاقستاندا بولىپ جاتقان سۋ تاسقىنىنا بايلانىستى ءبىرقاتار حالىقارالىق شارانىڭ ونلاين فورماتتا وتەتىنىن، سۋ تاسقىنىنان زارداپ شەككەندەردىڭ بارىنە تولىق كومەك بەرىلەتىنىن ايتقان. سونىمەن بىرگە ناۋرىز مەيرامىن تويلاۋعا ارنالعان «ناۋرىزناما» اتتى جاڭا فورماتتىڭ ەرەكشەلىكتەرىن سانامالاپ وتكەن. سوعان سايكەس، قازاقستان ەلشىلىگىنىڭ عيماراتىندا قازاق حالقىنىڭ سالت-ءداستۇرى، ادەت- عۇرپى مەن قولونەر بۇيىمدارىن دارىپتەۋگە ارنالعان «شاڭىراق» اتتى تۇراقتى ۇلتتىق بۇرىشتىڭ اشىلعانىن جاريالاعان.
ايتا كەتەيىك، مەرەكەلىك شارا بارىسىندا قازاقتىڭ ءانى ايتىلىپ، كۇيى شەرتىلىپ، ءبيى بيلەندى. ۇلتتىق ويىندار وينالىپ، قوناقاسى بەرىلدى.
ارال تەڭىزىنىڭ بويىندا ۇيالى بايلانىس پەن ينتەرنەت جەلىسى ىسكە قوسىلدى - «ءوز ا»
تۋريستەرگە قولايلى جاعداي جاساۋ ماقساتىندا ارال تەڭىزى جاعالاۋىندا ۇيالى بايلانىس پەن ينتەرنەت جەلىسى ىسكە قوسىلدى.
بۇل تۋرالى وزبەكستاندىق «ءوز ا» اقپاراتتىق اگەنتتىگى حابارلادى.
وزبەكستاندىق ب ا ق-تىڭ قاراقالپاقستان جۋقورعي كەنگەسينە سىلتەمە جاساپ حابارلاۋىنشا، بۇل جاعداي وزبەكستان پرەزيدەنتىنىڭ 2024 - جىلعى 9-اقپانداعى شەشىمى نەگىزىندە جۇزەگە اسىرىلعان.
كەلتىرىلگەن دەرەكتەرگە سۇيەنسەك، قاراقالپاقستان رەسپۋبليكاسىن كەشەندى الەۋمەتتىك- ەكونوميكالىق دامۋدى جانە حالىقتى جۇمىسپەن قامتۋدى قامتاماسىز ەتۋ جونىندەگى قوسىمشا شارالار تۋرالى قاۋلىعا سايكەس 2024 -جىلدىڭ ناۋرىز ايىندا تۋريستەرگە قولايلى جاعداي جاساۋ ماقساتىندا ۇيالى بايلانىس وپەراتورلارىمەن بىرلەسە جۇمىس جاساماق. سول ارقىلى ارال ءوڭىرىن جوعارى جىلدامدىقتى موبيلدى ينتەرنەتپەن قامتۋ مۇمكىندىگىن زەردەلەۋ جانە ءساۋىر ايىندا ارال ءوڭىرىن جوعارى جىلدامدىقتى موبيلدى ينتەرنەتپەن قامتاماسىز ەتۋ تۋرالى شەشىم قابىلداعان.
سونداي-اق وسى اپتادا «ءوز ا»-دا «تاشكەنتتە وزبەكستان، ازەربايجان جانە قازاقستان ەنەرگەتيكا مينيسترلەرىنىڭ ەكىنشى كەڭەسى ءوتتى» دەگەن تاقىرىپتاعى اقپارات جاريالاندى.
كەلتىرىلگەن دەرەكتەرگە سۇيەنسەك، تاشكەنت قالاسىندا وزبەكستان، ازەربايجان جانە قازاقستان ەنەرگەتيكا مينيسترلەرىنىڭ ەكىنشى كەزدەسۋى وتكەن.
ءو ر ەنەرگەتيكا مينيسترلىگىنىڭ حابارلاۋىنشا، شارادا «وزبەكستان- قازاقستان- ازەربايجان ەنەرگەتيكالىق جۇيەلەرىنىڭ ءوزارا بايلانىسى جوباسىنىڭ («جاسىل ءدالىز») تۇساۋكەسەرى ءوتتى.
«كونفەرەنسيادا ازەربايجان، قازاقستان جانە وزبەكستاننىڭ ەنەرگەتيكالىق سەكتورلارىن قوسۋ ارقىلى ايماقتا وندىرىلەتىن جاسىل ەنەرگيانى ەۋروپاعا ەكسپورتتاۋ جوباسىنىڭ الدىن الا تەحنيكالىق- ەكونوميكالىق نەگىزدەمەسىن بەكىتۋ، تەحنيكالىق-ەكونوميكالىق نەگىزدەرىن زەرتتەۋ ءۇشىن حالىقارالىق كەڭەسشىلەردى تارتۋ ماسەلەلەرىن قاراۋ، جوبا بويىنشا مەملەكەتارالىق كەلىسىمنىڭ جوباسىن دايىنداۋ جانە باسقا دا ماسەلەلەر تالقىلاندى»، دەپ جازادى «ءوز ا».
سونىمەن قاتار «ءوز ا» اقپارات اگەنتتىگىندە «وزبەك مۋلتفيلمى قازاقستاندا وتكەن فەستيۆالدە ءبىرىنشى ورىن الدى» دەگەن تاقىرىپتاعى اقپارات جارىق كوردى.
وزبەكستاندىق باسىلىمنىڭ مالىمەتىنشە، قازاقستاننىڭ الماتى قالاسىندا وتكەن ءبىرىنشى حالىقارالىق «Farabi Film Festival» شاراسىندا جاس وزبەك مۋلتيپليكاتورى دجامشيد اتامبايەۆتىڭ «ساعىنىش» مۋلتفيلمى «ۇزدىك انيماتسيالىق فيلم» اتالىمىندا ءبىرىنشى ورىن العان.
ۇلتتىق كينەماتوگرافيانى دامىتۋ ورتالىعىنىڭ حابارلاۋىنشا، جامشيد اتامبايەۆ قازىر وزبەكستاننىڭ مەملەكەتتىك ونەر جانە مادەنيەت ينستيتۋتىنىڭ ستۋدەنتى جانە كينەماتوگرافيست ءارى رەجيسسەر يقبول مەليقوزيەۆتىڭ شىعارماشىلىق شەبەرحاناسىنىڭ ستۋدەنتى ەكەن.
ايتا كەتەيىك، بۇل انيماتسيالىق كارتينا دجامشيد ەسىمدى جاس جىگىتتىڭ ءوزىنىڭ جانە اناسىنىڭ ارماندارىن ورىنداۋ جولىنداعى وقيعاسىن باياندايدى. فيلمنىڭ نەگىزگى يدەياسى - انالاردى قادىرلەۋگە باعىتتالعان.
اۆتور
بەيسەن سۇلتان
