شي جينپيڭ مەن ۆلاديمير پۋتين شىنجىندە كەلىسسوز وتكىزدى

استانا. KAZINFORM - سارسەنبى كۇنى قىتاي ءتوراعاسى شي جينپيڭ مەن رەسەي پرەزيدەنتى ۆلاديمير پۋتين قىتايدىڭ وڭتۇستىگىندەگى شىنجىن قالاسىندا ەكىجاقتى كەلىسسوز وتكىزدى، دەپ حابارلايدى Kazinform اگەنتتىگىنىڭ بەيجىڭدەگى مەنشىكتى ءتىلشىسى.

ا
Фото: Берік Табынбаев/Kazinform

- بۇگىن تۇسكە دەيىن ق ح ر ءتوراعاسى شي جينپيڭ رەسەي پرەزيدەنتى ۆلاديمير پۋتيندى قابىلدادى. كەزدەسۋدىڭ ەگجەي-تەگجەيىن كەيىنىرەك جاريالايمىز، - دەدى قىتاي سىرتقى ىستەر مينيسترلىگىنىڭ رەسمي وكىلى گو جياكۋن جۋرناليستەرگە ارنالعان بريفينگتە.

رەسەي پرەزيدەنتى 18-19-قاراشادا شىنجىن قالاسىندا وتەتىن ازيا-تىنىق مۇحيتى ەكونوميكالىق ىنتىماقتاستىعى (ا ت ە س) فورۋمىنا قاتىسۋشى ەلدەر باسشىلارىنىڭ 33-بەيرەسمي كەزدەسۋىنە قاتىسۋ ءۇشىن كەلدى.

كرەملدىڭ حابارلاۋىنشا، كەلىسسوز بارىسىندا تاراپتار جان-جاقتى ارىپتەستىك پەن ستراتەگيالىق ىنتىماقتاستىقتى دامىتۋ جولدارىن، سونداي-اق حالىقارالىق جانە وڭىرلىك ماسەلەلەردى تالقىلادى.

كەلىسسوزدە ق ح ر ءتوراعاسى مەملەكەت باسشىلارى اراسىنداعى ديپلوماتيالىق بايلانىستىڭ ماڭىزدىلىعىنا توقتالدى.

- ءسىزدىڭ جانە مەنىڭ باسشىلىعىمىزبەن قىتاي مەن رەسەي اراسىنداعى قارىم-قاتىناس الەمدەگى ءتۇرلى سىن-قاتەرگە قاراماستان، تۇراقتىلىعىن جوعالتقان جوق. ەكى ەلدىڭ ىنتىماقتاستىعى ۋاقىتشا ساياسي احۋالعا تاۋەلدى ەمەس، دامۋ مۇمكىندىگى دە زور. ول الماعايىپ كەزەڭدى باستان وتكەرىپ جاتقان الەمدە تۇراقتىلىق پەن سەنىمدى نىعايتىپ، تەڭدىككە، ءوزارا قۇرمەت پەن ءتيىمدى ارىپتەستىككە نەگىزدەلگەن ءىرى دەرجاۆالار اراسىنداعى جاڭا قارىم-قاتىناستىڭ ۇلگىسىنە اينالدى، - دەدى شي جينپيڭ.

ال رەسەي پرەزيدەنتى ەكى ەل اراسىنداعى ىنتىماقتاستىقتىڭ ناتيجەلەرىنە توقتالىپ، حالىقارالىق ارەناداعى ءوزارا ءىس-قيمىلعا وڭ باعاسىن بەردى.

- رەسەي مەن قىتايدىڭ سىرتقى ساياسي بايلانىسى تۇراقتى ءارى وڭ باعىتتا دامىپ كەلەدى. كۇردەلى گەوساياسي جاعدايدا ادىلەتتى ءارى كوپپوليارلى الەمدىك ءتارتىپ قالىپتاستىرۋ ماسەلەسىندە سىندارلى ۇستانىمدى باسشىلىققا الامىز، - دەدى ۆلاديمير پۋتين.

بۇعان دەيىن قىتاي س ءى م شي جينپيڭ، پۋتين جانە ترامپتىڭ 19-قاراشادا كەزدەسەتىنىن راستاعانىن حابارلاعان ەدىك.