شوتلانديالىق جاس جۇبايلار كوشپەندىلەر ويىنىنا بال ايىن وتكىزۋگە كەلدى

استانا. KAZINFORM - شوتلانديادان كەلگەن ەرلى-زايىپتى سيلكە ماەس پەن كيەران شەننون نەكەسىن تويلاۋدىڭ ەرەكشە ءادىسىن تاڭدادى. ساياحاتشى جاس جۇبايلار بال ايىن استانادا دۇنيەجۇزىلىك كوشپەندىلەر ويىندارىندا وتكىزۋدى ۇيعارعان.

ەرلى-زايىپتىلار قازاقستانعا 10 كۇن بۇرىن كەلگەن، بۇل ولاردىڭ ورتالىق ازياعا العاشقى ساپارى.

«ءبىز استاناعا شوتلانديادان ۇشىپ كەلدىك. ءبىز قازاقستانعا بيلەت برونداعاندا كوشپەندىلەر ويىندارى تۋرالى بىلدىك جانە راسىمەن دە بارۋىمىز كەرەك دەپ ويلادىق. بۇعان دەيىن كوشپەندىلەر ويىندارى تۋرالى ەستىگەن ەمەسپىز»، - دەيدى سيلكە مايەس.

سيلكە مەن كيەران استانا ماڭىنداعى بۋرابايعا بارىپ ۇلگەردى.

«شىنىمدى ايتسام، بۇل ساپارعا دەيىن قازاقستان تۋرالى ەشتەڭە بىلمەدىم. مۇندا استانا سياقتى قالالار ەمەس، دالا كوپ بولادى دەپ ويلادىم. ءبىز ادامدارعا، ساۋلەت ونەرىنە، تابيعاتقا جانە قازاقستانداعى بارلىق نارسەگە تاڭ قالدىق»، - دەيدى ولار.

جۋرناليستىك اككرەديتاتسيا ارقىلى ەرلى-زايىپتىلار بارلىق جارىستاردى تاماشالاۋعا مۇمكىندىك العان.

«كوشپەندىلەردىڭ ويىندارى مەنى قاتتى تاڭ قالدىردى. مەن نە كۇتەتىنىمدى بىلمەدىم. مىڭداعان جىلدار بويى دامىپ كەلە جاتقان ءداستۇرلى ويىنداردى كورۋ مەن سەزىنۋ وتە عاجاپ. بىزدە ەۋروپادا مۇنداي ەشتەڭە جوق، سوندىقتان ونى قازاقستاندا سەزىنگەنىمىزگە قۋانىشتىمىز»، - دەدى كيەران شەننون.

ەندى شەتەلدىك قوناقتار قازاق داستۇرلەرى تۋرالى كوبىرەك بىلۋگە قىزىعۋشىلىق تانىتۋدا. ولار ۆەگەتاريان(ەت جەۋدى قالامايتىن) بولعاندىقتان، ۇلتتىق ەت تاعامدارىن جەي الماعان. ايتسە دە، قۇرت پەن جەنتتى ەرەكشە ۇناتقان.

سيلكە مەن كيەران 3 جىلدان بەرى ساياحاتتاپ كەلەدى جانە تاعى 7 جىل بويى شىتىرمان وقيعالارىن جالعاستىرۋدى جوسپارلاپ وتىر.

ولار كەلەسى بىرنەشە ايدى قىرعىزستاندا، وزبەكستاندا جانە تۇرىكمەنستاندا وتكىزۋگە نيەتتى. ودان كەيىن ەرلى-زايىپتىلار قىتايعا بارادى.

اۆتور
ايجان سەرىكجان قىزى