شوقىندىرۋ ءراسىمى. ايازدى كۇنى سۋعا شومىلۋ اعزاعا قالاي اسەر ەتەدى؟

جىل سايىن قاڭتار ايىندا اتاپ وتىلەتىن شوقىندىرۋ مەرەكەسى جايلى بىلەسىز بە؟ ايازدى كۇنى سۋىق سۋعا شومىلۋ نەنى بىلدىرەدى؟ بۇل دەنساۋلىق ءۇشىن قانشالىقتى ماڭىزدى جانە قانداي پايداسى بار؟

БҚО-да Крещение мерекесінде 1 400-ге жуық адам суға шомылып шықты
Фото: БҚО ТЖД

 Massaget.kz ءتىلشىسى ق ر د س م "قوعامدىق دەنساۋلىق ساقتاۋ ۇلتتىق ورتالىعى" باسقارما ءتوراعاسى ايجان ەسماعامبەتوۆامەن سۇحباتتاسىپ وسى ساۋالداردىڭ جاۋابىن الدى.

شوقىندىرۋ مەرەكەسى نەنى بىلدىرەدى؟
شوقىندىرۋ مەرەكەسى (كرەشەنيە گوسپودنە) - حريستياندىقتاردىڭ ماڭىزدى ءدىني مەرەكەلەرىنىڭ ءبىرى. ول يسا ءماسىحتىڭ يوردان وزەنىندە شوقىندىرىلعان كۇنىن ەسكە الۋ ءۇشىن اتاپ وتىلەدى. بۇل كۇن ءار جىلدىڭ 19 - قاڭتارىندا (پراۆوسلاۆيە ءداستۇرى بويىنشا) جانە 6 - قاڭتاردا (كاتوليكتەر مەن پروتەستانتتار ءۇشىن) تويلانادى.

بۇل كۇنى الەمنىڭ كوپتەگەن ەلدەرىندە حريستياندار ءداستۇرلى تۇردە شىركەۋلەرگە بارىپ، قاسيەتتى سۋعا شومىلادى. پراۆوسلاۆ حريستياندارى اراسىندا "كرەشەنسكيە كۋپانيا" - ياعني، مۇزداي سۋعا شومىلۋ ءداستۇرى كەڭ تارالعان. ولاردىڭ سەنىمى بويىنشا، بۇل كۇنى بارلىق سۋ قاسيەتتى بولىپ، تازارتۋ كۇشىنە يە بولادى. قازاقستاندا بۇل مەرەكەنى پراۆوسلاۆ حريستياندارى اتاپ وتەدى. ەلدىڭ ءار وڭىرىندە ارنايى مۇز ويىقتارى جاسالىپ، ادامدار سۋعا تۇسەدى. سونىمەن قاتار، شىركەۋلەردە ءدىني راسىمدەر وتكىزىلەدى.

ايازدى كۇنى سۋىق سۋعا ءتۇسۋ اعزاعا قالاي اسەر ەتەدى؟
ق ر د س م "قوعامدىق دەنساۋلىق ساقتاۋ ۇلتتىق ورتالىعى" باسقارما ءتوراعاسى ايجان ەسماعامبەتوۆا بۇل ءداستۇردىڭ ادام دەنساۋلىعىنا ءارتۇرلى اسەر ەتەتىنىن جەتكىزدى. مامان ادام اعزاسىنىڭ سۋىق سۋعا قانداي رەاكتسيا بەرەتىنىن جىلىكتەپ ءتۇسىندىرىپ بەردى.

«سۋىق سۋعا شومىلۋ قان تامىرلارىنىڭ كۇرت جيىرىلۋىن تۋدىرادى جانە سيمپاتيكالىق جۇيكە جۇيەسىن بەلسەندى قالىپقا تۇسىرەدى. بۇل ادرەنالين مەن ەندورفيندەردىڭ بولىنۋىنە ىقپال ەتەدى. دەسە دە سۋىق سۋ - قان اينالىمىن جاقسارتادى جانە دەنەنىڭ جالپى تونۋسىن كۇشەيتىپ، كوڭىل- كۇيگە دە اسەر ەتەدى. الايدا بۇرىن سالقىن سۋعا ءتۇسىپ كورەمەگەن، مۇنداي تەمپەراتۋراعا دايىن ەمەس اعزا ءۇشىن قاۋىپ ءتونۋى دە مۇمكىن: قان قىسىمىنىڭ جوعارىلاۋى، جۇرەك جۇمىسىنىڭ بۇزىلۋى جانە گيپوتەرميا تۋۋى مۇمكىن» دەپ ءتۇسىندىردى ايجان ەسماعامبەتوۆا.

سونداي- اق ول بالالار مەن ەگدە جاستاعى ادامدارعا اسا ساق بولۋ كەرەكتىگىن ايتتى.

«بالالار مەن قارت ادامدار ساق بولۋى كەرەك. بالالاردا تەرمورەگۋلياتسيا جۇيەسى ەرەكسەكتەرمەن سالىستىرعاندا تولىق جەتىلمەگەندىكتەن، گيپوتەرميا قاۋپىن ارتتىرادى. ەگدە جاستاعى ادامداردا قان تامىرلارىنىڭ سەرپىمدىلىگىنىڭ تومەندەۋى جانە سوزىلمالى اۋرۋلار كۇرت سالقىنداتۋدىڭ اسەرىن كۇشەيتۋى مۇمكىن. دەنساۋلىق جاعدايىن ەسكەرۋ، سۋدا ۇزاق ۋاقىت بولۋدان اۋلاق بولۋ جانە شىققاننان كەيىن بىردەن جىلىنۋ ماڭىزدى» دەپ جاۋاپ بەردى ول.

قانداي دياگنوزى بار ادامدارعا بۇل ءراسىم قاۋىپتى؟
ايجان سەرىكباي قىزى شوقىندىرۋ مەرەكەسىندە بەلگىلى ءبىر دياگنوزى بار ادامدار ساق بولعانى ءجون دەپ كەڭەس بەردى.

«سۋىق سۋعا گيپەرتونيا، جۇرەكتىڭ يشەميالىق اۋرۋى، اريتميا سياقتى جۇرەك-قان تامىرلارى اۋرۋلارى بار، سونداي- اق ينفاركت نەمەسە ينسۋلت العان ادامدارعا شومىلۋعا بولمايدى. نولدەن تومەن تەمپەراتۋراداعى سۋ قان تامىرلارىنىڭ سپازمىن تۋدىرادى، بۇل قان اينالىمىنىڭ ناشارلاۋىنا جانە ينفاركت سياقتى وتكىر جاعدايلارعا اكەلۋى مۇمكىن. سونداي- اق، تىنىس الۋ جۇيەسى (دەمىكپە، سوزىلمالى برونحيت)، بۇيرەك اۋرۋلارى، تەرمورەگۋلياتسيا بۇزىلىستارى جانە قانت ديابەتى سياقتى ەندوكريندىك پاتولوگيالارى بار ادامدارعا مۇزدى سۋعا ءتۇسۋ ۇسىنىلمايدى. شومىلۋعا قاتىسپاس بۇرىن دارىگەرمەن كەڭەسكەن ابزال» دەدى مامان.

ماماننان بىرنەشە كەڭەس
ايجان ەسماعامبەتوۆا العاش رەت سۋىق سۋعا تۇسكىسى كەلەتىن جاندارعا، قورقىپ جۇرگەن جاندارعا بىرنەشە كەڭەس ايتتى.

شومىلۋدان بۇرىن دەنەنى جەڭىل فيزيكالىق بەلسەندىلىكپەن جىلىتىپ الىڭىز؛
سۋعا تۇسپەس بۇرىن جانە كەيىن الكوگولدى سۋسىن ىشۋگە تىيىم سالىنادى، ويتكەنى ول تەرمورەگۋلياتسيانى بۇزادى جانە اياز بەن گيپوتەرميا قاۋپىن ارتتىرادى؛
العاش رەت سۋعا تۇسەتىن جاندار تاۋەكەلدەردى ازايتۋ ءۇشىن سۋدا بولۋ ۋاقىتىن 10-30 سەكۋندقا دەيىن شەكتەۋ كەرەك؛
گيپوتەرميانىڭ الدىن الۋ ءۇشىن سۋدا بولۋ ۋاقىتىن شەكتەپ، شىققاننان كەيىن بىردەن قۇرعاتىپ ءسۇرتۋ كەرەك؛
تەرميالىق ءىش كيىم، جىلى شۇلىق جانە باس كيىم سياقتى الدىن الا دايىندالعان جىلى زاتتار دايىنداپ الىڭىز؛
شومىلعاننان كەيىن ىستىق سۋسىن ءىشۋ كەرەك.

Massaget.kz

 

سوڭعى جاڭالىقتار