پشون اتتى ءيتتىڭ ءمۇسىنى جايىق جاعاسىنداعى كافە الدىندا تۇر
اتىراۋ. KAZINFORM - اتىراۋلىق ارت- شەبەر ازامات كەنجەعاليەۆ بىلتىرعى سۋ تاسقىنى كەزىندە قاپ تاسىعان پشون اتتى ءيتتىڭ ءمۇسىنىن جاساعان ەدى. كەشە ءيتتىڭ ءمۇسىنى جايىق وزەنىنىڭ جاعالاۋىنداعى كافە الدىنا قويىلدى.

ارت- ءمۇسىننىڭ اۆتورى ازامات كەنجەعاليەۆ يندەر اۋدانىندا تۇرادى. ماماندىعى ءمۇسىنشى ەمەس. ءبىراق اعاشتان، تەمىردەن بىرنەشە ءمۇسىن جاساعان. اۆتوردىڭ تۋىندىلارىنىڭ ءبىرى - سۋ تاسقىنى كەزىندە قاپ تاسىعان پشون اتالاتىن ءيتتىڭ ءمۇسىنى. ونى ءبىر ايدا جاساعان.
- بىلتىرعى سۋ تاسقىنى كەزىندە ەلدىڭ بىرلىگىنە، ۇيىمشىلدىعىنا كۋا بولدىق. ءوزىم دە ەرىكتى رەتىندە جايىق وزەنىنىڭ جاعالاۋىنا بوگەت سالۋعا قاتىستىم. سول كەزدە پشون اتالاتىن ءيتتىڭ قاپ تاسىپ جۇرگەنىن كوردىك. كوپشىلىك الەۋمەتتىك جەلىدە جاعىمدى پىكىر قالدىردى. الايدا بىلتىرعى قاراشادا پشوندى اتىپ كەتكەنىن ەستىدىك. سودان سوڭ ونىڭ ءمۇسىنىن جاساۋعا بەكىندىم، - دەيدى ازامات كەنجەعاليەۆ.
ونىڭ ايتۋىنشا، ءيتتىڭ ءمۇسىنى جاساۋعا كادىمگى قارا تەمىردى قولدانعان. ءمۇسىندى جۇرەك تۇرىندەگى تەمىر بولشەكتەرىنەن قۇراستىرعان.
- الەۋمەتتىك جەلى قولدانۋشىلارى ۇناعان جازباعا، نە سۋرەتكە ءلۇپىل باسادى. ءدال وسى ءلۇپىلدى پشوننىڭ مۇسىنىنە قولداندىم. ءمۇسىندى كولىك سىرىمەن سىرلادىم. ونى جايىق وزەنىنىڭ اتىراۋ قالاسىنداعى جاعالاۋىنا قويۋدى ۇسىنىپ، اكىمدىككە حابارلاسقان ەدىم. اكىمدىكتەن قولداۋ بولمادى، - دەيدى ازامات كەنجەعاليەۆ.

كەشە پشوننىڭ ءمۇسىنى اتىراۋ قالاسىنداعى Ailaq Coffee كافەسىنىڭ الدىنا قويىلدى. بۇل كافە جايىق وزەنىنىڭ جاعالاۋىندا ورنالاسقان.
- پشوننىڭ ءمۇسىنىن سارىتوعاي اۋىلىندا تۇراتىن يەسى ساتىپ العىسى كەلەتىنىن ايتتى. كەيىن Ailaq Coffee كافەسىنىڭ يەسى حابارلاسىپ، ءمۇسىندى قويۋعا ۇسىنىس جاسادى. ءمۇسىندى كۇتىپ ۇستاۋعا ۋادە بەردى. ول ءمۇسىن ءۇشىن اقشا ۇسىنعان ەدى. ءبىراق اقشاسىن المادىم. ماعان ءوزىم جاساعان تۋىندىنىڭ بوس جاتپاعانى قاجەت، - دەيدى ءمۇسىن اۆتورى.
ال اتىراۋ قالاسى اكىمىنىڭ باسپا ءسوز قىزمەتى ازامات كەنجەعاليەۆكە ءمۇسىندى قويۋ ءۇشىن بىرنەشە ورىن ۇسىنىلعانىن حابارلادى.

- وبلىستىق جانە قالالىق اكىمدىك تاراپىنان ءمۇسىندى قويۋعا ارنالعان بىرنەشە جەر ۇسىنىلدى. الايدا ءمۇسىن يەسى ءوز تاڭداۋىن جاسادى. ءمۇسىن اكىمدىكتىڭ يەلىگىندە بولماعاننان سوڭ ناقتى قوياتىن جەرىن بەكىتە المايمىز، - دەپ ءمالىم اكىمدىكتىڭ باسپا ءسوز قىزمەتى.