شومىلۋ ماۋسىمى: قونايەۆقا كەلۋشىلەر بىلتىرعىدان 300 مىڭعا ارتقان
قونايەۆ. KAZINFORM - بيىل قاپشاعاي سۋ قويماسىنىڭ جاعالاۋىنا دەمالۋعا 1,5 ميلليون ادام كەلگەن. وتكەن جىلمەن سالىستىرعاندا دەمالۋشىلار سانى 300 مىڭعا كوبەيدى. بۇل تۋرالى قونايەۆ اكىمدىگىنىڭ باسپا ءسوز قىزمەتى حابارلادى.
قالا اكىمدىگىنىڭ مالىمەتىنە سايكەس، شاھارداعى 140 دەمالىس ورنى 840 ميلليون تەڭگەگە قىزمەت كورسەتكەن.
- بيىل «اق جايىق» دەمالىس ورنىنىڭ قوناق ءۇي كەشەنى قولدانىسقا بەرىلدى. الداعى ۋاقىتتا ينۆەستيسيالىق قارجىعا 9 دەمالىس نىسانى سالىنباق. تارتىلاتىن قاراجاتتىڭ جالپى كولەمى - 294,6 ميلليون تەڭگە. جاڭادان 2000-نان استام جۇمىس ورنى قۇرىلادى، - دەپ حابارلادى قونايەۆ اكىمدىگىنەن.
سونداي-اق، قالا باسشىلىعى شومىلۋ ماۋسىمى كەزىندە اشىق سۋدا جۇزۋدەن «Ocean Man» حالىقارالىق جارىسى، «Rock family fast» فەستيۆالى، «ASpan fest» كونسەرتى ۇيىمداستىرىلعانىن مالىمدەدى.
ەسكە سالايىق، بۇعان دەيىن قونايەۆ قالاسىنداعى ەسكى گاراجدار بۇزىلىپ، ورنىنا باسقا نىساندار سالىناتىنىن جازعانبىز.
اۆتور
دوسبول اتاجان
