شۆەتسيادا وقۋ ورنىنداعى اتىس كەزىندە 10 عا جۋىق ادام مەرت بولدى

استانا. KAZINFORM - پوليتسيانىڭ حابارلاۋىنشا، شۆەتسيانىڭ ورتالىعىنداعى ەرەبرۋ قالاسىنداعى بالالار مەكتەبىنىڭ جانىنداعى ەرەسەكتەرگە ارنالعان ءبىلىم بەرۋ ورتالىعىندا ادامدارعا وق جاۋدىرعان ەر ادام قازا تاپتى، دەپ حابارلايدى BBC.

قالالىق پوليتسيا باسشىسى روبەرتو ەيد فورەست وقيعا سالدارىنان «شامامەن 10 ادامنىڭ» مەرت بولعانىن، ونىڭ ىشىندە وق جاۋدىرعان ەر ادامنىڭ دا قازا تاپقانىن راستادى. پوليتسيا ازىرگە قۇربانداردىڭ ناقتى سانىن جاريالاعان جوق.

قىلمىسكەر تۋرالى بەلگىلى اقپارات - ول پوليتسياعا بۇرىن تانىس ەمەس جانە ەشقانداي ۇيىمداسقان قىلمىستىق توپقا قاتىسى بولعان جوق. پوليتسيا شابۋىلدى ازىرگە لاڭكەستىك ارەكەتپەن دە بايلانىستىرىپ وتىرعان جوق.

- ءبىز قىلمىسكەر جالعىز ارەكەت ەتتى دەپ ويلايمىز، - دەدى فورەست.

ول بۇل «وتە قايعىلى وقيعاعا» قاتىستى تەرگەۋ وتە ەرتە كەزەڭدە ەكەنىن قوسىپ ءوتتى. شۆەتسيا پرەمەر-ءمينيسترى ۋلف كريستەرسسون شۇعىل باسپا ءسوز ءماسليحاتىندا مەكتەپتەگى اتىس قۇرباندار سانى جاعىنان ەل تاريحىندا بۇرىن-سوڭدى بولماعان وقيعا ەكەنىن مالىمدەدى.

ونىڭ ايتۋىنشا، شۆەتسيادا «ەشقاشان جول بەرىلمەۋى ءتيىس وقيعا بوعان». پرەمەردىڭ قاسىندا تۇرعان ادىلەت ءمينيسترى گۋننار ستروممەر شۆەتسيا «مەكتەپتە مۇنداي ماسشتابتاعى اتىس بولعانىن ەشقاشان كورمەگەنىن» قايتالادى. ستروممەر سونىمەن بىرگە قازا تاپقاندار اراسىندا پوليتسياعا بۇرىن بەلگىسىز بولعان شابۋىلشىنىڭ ءوزى دە بار ەكەنىن راستادى.

- قازا تاپقانداردىڭ ءبىرى قازىر باستى كۇدىكتى سانالىپ وتىر. ول بۇرىن پوليتسياعا بەلگىسىز بولىپ كەلگەن جانە بۇل وقيعا نەلىكتەن بولعانىن ءالى كۇنگە دەيىن بىلمەيمىز، - دەدى مينيستر.

بيلىك قالا تۇرعىندارىن بۇدان ءارى شابۋىلدى كۇتۋگە نەگىز جوق، سوندىقتان ەرتەڭ تاڭەرتەڭ بالالاردى ەش قورىقپاستان مەكتەپكە ادەتتەگىدەي جىبەرۋگە بولاتىنىنا سەندىردى.

ەرەبرۋ - شۆەتسيادا حالىق سانى بويىنشا التىنشى مۋنيتسيپاليتەت، وندا شامامەن 125 مىڭ ادام تۇرادى.

وقيعا كەشە جەرگىلىكتى ۋاقىت بويىنشا ساعات 13:00 شاماسىندا، نەگىزىنەن باستاۋىش نەمەسە ورتا مەكتەپتى اياقتاماعاندار باراتىن ەرەسەكتەرگە ارنالعان ءبىلىم بەرۋ ورتالىعىندا بولدى. ول بىرنەشە وقۋ ورىندارىن، سونىڭ ىشىندە بالالارعا ارنالعان مەكتەپتى قامتيتىن كامپۋستا ورنالاسقان. باستاپقى حابارلامالاردا وقيعا مەكتەپتە بولعانى ايتىلعان.

وقيعا ورنىنا پوليتسيا، جەدەل جاردەم قىزمەتكەرلەرى جانە قۇتقارۋشىلار جىبەرىلدى، ال بيلىك وكىلدەرى ادامداردى ايماقتان الىس جۇرۋگە شاقىردى.

وقيعا ورنىنان تۇسىرىلگەن كادرلاردا ونداعان قارۋلى پوليتسيا قىزمەتكەرلەرى، كوپتەگەن جەدەل جاردەم جانە شۇعىل قىزمەت كولىكتەرىن كورۋگە بولادى.

وقيعا تۋرالى پوليتسيانىڭ العاشقى مالىمدەمەسىندە بەس قۇربان بولعانى ايتىلعان.

- وقيعا قازىرگى ۋاقىتتا كىسى ولتىرۋگە وقتالۋ، ورتەۋ جانە اۋىرلاتاتىن ءمان-جايلاردا قارۋ قولدانىپ قىلمىس جاساۋ رەتىندە قاراستىرىلىپ جاتىر، - دەلىنگەن باسپا ءسوز حابارلاماسىندا.