شۆەتسيادا العاش رەت ديابەتكە جاسۋشالىق تەراپيا قولدانىلماق
استانا. KAZINFORM - شۆەد عالىمدارى 1 ءتيپتى ديابەتتى ەمدەۋدە ماڭىزدى قادام جاسادى. بۇل تۋرالى AZƏRTAC اگەنتتىگى جازدى.
العاش رەت الەمدە بۇل اۋرۋمەن اۋىراتىن ناۋقاسقا يممۋنيتەتتى باساتىن دارىلەردى قولدانۋدى قاجەت ەتپەيتىن گەنەتيكالىق موديفيكاتسيالانعان جاسۋشالار كوشىرىلدى. بۇل جاڭالىق جاڭا، ءقاۋىپسىز جانە ءتيىمدى ەمدەۋ ءادىسىن جاساۋعا نەگىز بولا الادى.
شۆەتسيادا شامامەن 50000 ادام 1 ءتيپتى ديابەتپەن اۋىرادى، ولاردىڭ كوپشىلىگى قانداعى قانت دەڭگەيىن باقىلاۋ ءۇشىن ينسۋلين ينەكتسيالارىن نەمەسە سورعىلارىن پايدالانادى. اۋىر فورماداعى ناۋقاستارعا ينسۋلين شىعاراتىن جاسۋشالاردى ترانسپلانتاتسيالاۋ مۇمكىندىگى بار، ءبىراق يممۋنيتەتتى باساتىن دارىلەردى ءومىر بويى قابىلداۋ قاجەتتىلىگى بۇل ءادىستى قاۋىپتى ەتەدى. سەبەبى ول ينفەكتسيالار، راك تۋدىرىپ، بۇيرەكتىڭ اسقىنۋىنا اكەلۋى مۇمكىن.
ۋپپسالا ۋنيۆەرسيتەتىنىڭ پروفەسسورى پە- ولا كارلسسون جەتەكشىلىك ەتەتىن زەرتتەۋ توبى جاڭا ءتاسىل ويلاپ تاپتى. ولار دونورلىق جاسۋشالاردى CRISPR- Cas12b تەحنولوگياسىن قولدانا وتىرىپ موديفيكاتسيالادى، سوندىقتان يممۋندىق جۇيە ولاردى بوگدە دەپ تانىمادى. ەكسپەريمەنتكە قاتىسقان ناۋقاس بۇل جاسۋشالاردى بىلەكتىڭ بۇلشىقەتتەرىنە ورنالاستىرىپ، يممۋنيتەتتى باساتىن دارىلەرسىز الدى. ءبىر اي وتكەننەن كەيىن جاسۋشالار جۇمىس ىستەپ، ينسۋلين وندىرە باستاعانى، ولاردىڭ ءساتتى بەيىمدەلگەنىن كورسەتتى.
زەرتتەۋدىڭ كەلەسى كەزەڭى - جاسۋشالاردى جاپپاي ءوندىرۋ تەحنولوگياسىن ازىرلەۋ، ويتكەنى دونورلىق جاسۋشالاردىڭ سانى شەكتەۋلى. ەگەر الداعى زەرتتەۋلەر ءدال وسىنداي تابىستى ناتيجە كورسەتسە، جاڭا جاسۋشالىق تەراپيا 1 ءتيپتى ديابەتتى ەمدەۋدىڭ توڭكەرىستى ادىسىنە اينالۋى مۇمكىن. بۇل ەمدەۋ ءادىسىن 5-10 جىل ىشىندە كەڭ اۋقىمدا قولدانۋعا بولادى دەپ كۇتىلەدى.
