شۆەتسيا ۇكىمەتى قىسقى وليمپيادا-2030 وتكىزۋگە ءوتىنىم بەرۋدى ماقۇلدادى
شۆەتسيا ۇكىمەتى 2030-جىلعى قىسقى وليمپيادا ويىندارىن وتكىزۋگە ءوتىنىم بەرۋ بويىنشا ەلدىڭ وليمپيادا كوميتەتىنىڭ (SOK) باستاماسىنا قولداۋ ءبىلدىردى، دەپ حابارلايدى SOK سايتى.
بيىلعى اقپان ايىندا شۆەتسيا 2030-جىلعى اق وليمپيادانى ۇيىمداستىرۋ مۇمكىندىگىن قاراستىرىپ جاتقانى تۋرالى ءمالىم ەتىلگەن ەدى. دۇنيەجۇزىلىك دودانى ەلدىڭ ستوكگولم، فالۋن، ورە، يدرە جانە ەستەرسۋند قالالارى قابىلداي الادى. جارىستى وتكىزۋگە مۇمكىندىكتىڭ بار-جوعىنا الدىن الا زەرتتەۋ ماۋسىم ايىندا اياقتالىپ، ءوتىنىم بەرۋ جوباسى ەكىنشى كەزەڭگە ءوتتى.
شۆەتسيا ۇكىمەتى ءوتىنىم بەرۋ ءۇشىن SOK- قا قاجەتتى قولداۋ مەن قارجىلاي كەپىلدىك ۋادە ەتتى.
ايتا كەتەيىك، شۆەتسيا بۇدان بۇرىن 2026-جىلعى وليمپيادا ويىندارىن وتكىزۋگە ۇمىتكەر ەلدەردىڭ ءبىرى بولدى. الايدا حالىقارالىق وليمپيادا كوميتەتىندە وتكەن داۋىس بەرۋ ناتيجەسى بويىنشا بۇل مۇمكىندىككە يتاليا قول جەتكىزدى.
حالىقارالىق وليمپيادا كوميتەتى 2030 جانە 2034-جىلعى قىسقى وليمپيادا ويىندارى وتەتىن مەملەكەتتى 2024-جىلى انىقتايتىن بولادى.
