شەتەلدىكتەرگە قازاقستان ۆيزاسىن الۋ قيىنداي ءتۇستى
استانا. KAZINFORM - قازاقستانعا كىرۋگە ۆيزا راسىمدەۋ ەرەجەسى وزگەردى. ەندى ەلگە كەلەتىن شەتەلدىكتەر وتباسىن اسىراي الاتىن قارجىسى بارىن راستاۋى كەرەك. بۇل تالاپ ولاردى شاقىرۋشى تاراپقا دا قاتىستى.
بۇل مەملەكەت باسشىسى وتكەن اپتادا قول قويعان «حالىقتىڭ كوشى-قونى جانە قىلمىستىق-اتقارۋ جۇيەسى سالاسىنداعى زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭدا كورسەتىلگەن.
كوشى-قون زاڭناماسىن جەتىلدىرۋگە باعىتتالعان وزگەرىستەر جونىندە ءى ءى م رەسمي وكىلى شىڭعىس الەكەشيەۆ مالىمدەدى.
ءماجىلىس دەپۋتاتتارى باستاماشى بولعان بۇل زاڭ ارقىلى قازاقستان رەسپۋبليكاسىنىڭ 7-كودەكسىنە جانە 13 زاڭىنا وزگەرىس ەنگىزىلگەن.
اتاپ ايتقاندا:
- قازاقستانعا كىرۋگە تىيىم سالۋ؛
- بالالارعا قاتىستى بۇرىن جىنىستىق سيپاتتاعى قىلمىس جاساعان يمميگرانتتارعا تۇراقتى تۇرۋعا جانە ءبىزدىڭ ازاماتتىعىمىزدى الۋعا رۇقسات بەرۋدەن باس تارتۋ؛
- شەتەلدىكتەردىڭ ەكسترەميستىك نەمەسە تەرروريستىك ارەكەتتەرگە قاتىسى بار ەكەندىگى تۋرالى مالىمەتتەر بولسا، ەلگە كىرۋگە تىيىم سالۋ؛
- ۇيىمداسقان توپتاردىڭ كوشباسشىلارى بولىپ تابىلاتىن، اۋىر قىلمىستارى ءۇشىن سوتتالعان شەتەلدىكتەردىڭ ەلگە كىرۋىنە تىيىم سالاتىن نەگىزدەردى قاتاڭداتۋ.
«حالىقتىڭ كوشى-قونى تۋرالى زاڭعا جاڭا باپتار ەنگىزىلدى. ولارعا سايكەس شەتەلدىك جۇمىس كۇشىن پايدالاناتىن زاڭدى جانە جەكە تۇلعالاردى تەكسەرۋ ءتارتىبى زاڭنامالىق دەڭگەيدە بەكىتىلەدى. بۇل كوشى-قوندى باقىلاۋدىڭ تيىمدىلىگىن ارتتىرىپ، جۇيەلى تۇردە جاسالاتىن جانە جاسىرىن قۇقىق بۇزۋشىلىقتاردى انىقتاۋعا مۇمكىندىك بەرەدى. وتباسىمەن قاۋىشۋ ينستيتۋتىن نىعايتۋ ماقساتىندا ەندى قازاقستان رەسپۋبليكاسىنا كەلۋگە ۆيزانى رەسىمدەۋ كەزىندە وتباسى مۇشەلەرىن قارجىلىق تۇرعىدا قامتاماسىز ەتە الاتىنىن نە شاقىرۋشى تاراپ، نە شاقىرىلعان ادام راستاۋى قاجەت. بۇرىن بۇل تالاپ تەك شاقىرۋشى ادامعا عانا قاتىستى بولاتىن»، - دەدى شىڭعىس الەكەشيەۆ.
وزگەرىس «ازاماتتىق تۋرالى» زاڭعا دا ەنگىزىلگەن. ماسەلەن، مەملەكەتتىك ءتىلدى قاراپايىم دەڭگەيدە، ەلىمىزدىڭ تاريحى مەن كونستيتۋتسياسىنىڭ نەگىزدەرىن بىلمەگەن جاعدايدا ازاماتتىق بەرىلمەيدى. قاجەتتى دەڭگەيدى عىلىم جانە جوعارى ءبىلىم مينيسترلىگى ايقىندايتىن بولادى.
«تۇزەتۋلەر ازاماتتاردىڭ قوعامعا تەز بەيىمدەلۋىن كودەيدى. ءتىلدى ءبىلۋ قوعامعا تەزىرەك ءسىڭىپ، مەملەكەت ومىرىنە ارالاسۋى ءۇشىن قاجەت. ايتا كەتۋ كەرەك، بۇل تۇزەتۋلەر الەمدىك تاجىريبەگە ساي. كوپتەگەن ەلدەردە ازاماتتىق الۋ ءۇشىن مەملەكەت تاريحى مەن مەملەكەتتىك ءتىلدى ءبىلۋ بويىنشا ەمتيحان تاپسىرۋ قاجەت»، - دەيدى ءى ءى م رەسمي وكىلى.
