شەتەلدىكتەرگە باقىلاۋدى كۇشەيتۋ ۇسىنىلدى

استانا. KAZINFORM - سەنات دەپۋتاتى بيبىگۇل جەكسەنباي زاڭسىز كوشى-قون ماسەلەسىنە قاتىستى مالىمدەمە جاسادى.

ونىڭ سوزىنشە، قازاقستاندا زاڭسىز كوشى-قوننىڭ ءوسۋى الەۋمەتتىك تۇراقتىلىققا قاۋىپ توندىرەدى. ول دەپۋتاتتىق ساۋالىندا باس پروكۋراتۋرانىڭ دەرەكتەرىن كەلتىردى. رەسمي اقپارات بويىنشا زاڭ بۇزعان شەتەلدىك ازاماتتاردىڭ سانى 2024-جىلى ەداۋىر ءوسىپ كەتكەن بولىپ شىقتى.

بيىلدىڭ وزىندە 82 مىڭنان اسا ميگرانت اكىمشىلىك جاۋاپكەرشىلىككە تارتىلعان، ال 1,2 مىڭعا جۋىق جۇمىس بەرۋشى شەتەلدىك ەڭبەك كۇشىن زاڭسىز پايدالانعان.

«جالعان ەڭبەك شارتىن، مەديتسينالىق انىقتامالاردى جاساپ، زاڭسىز ەسەپكە قويعان حالىققا قىزمەت كورسەتۋ ورتالىقتارى مەن ەمدەۋ مەكەمەلەرىنىڭ قىزمەتكەرلەرى تۇراتىن قىلمىستىق توپ انىقتالعان. ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگى بويىنشا قازىر 13,2 مىڭ شەتەل ازاماتى رەسمي تۇردە جۇمىس ىستەيدى. ەڭبەك ميگرانتتارىنىڭ جۇمىسقا شاقىرۋ رۇقسات قاعازى جوق. زاڭدى جانە زاڭسىز ميگرانتتاردىڭ جيناقتالۋى الەۋمەتتىك-ەكونوميكالىق عانا ەمەس، قاۋىپسىزدىك ماسەلەلەرىنىڭ تۋىنداۋىنا اكەلۋى مۇمكىن»، - دەدى دەپۋتات.

بيبىگۇل جەكسەنبايدىڭ پىكىرىنشە، قازاقستانعا شەتەل ازاماتتارىنىڭ كەلۋىنە باقىلاۋدى كۇشەيتۋ، ەڭبەك ميگرانتتارىن زاڭداستىرۋ جۇيەسىن دامىتۋ قاجەت، سونىمەن قاتار زاڭسىز كوشى-قوندى ۇيىمداستىرعاندارعا، ەڭبەك رەسۋرسىن پايدالانعاندارعا جازانى قاتاڭداتۋ قاجەت.

«شەكارادا قاتاڭ شارالار قولدانۋ، باقىلاۋدا يننوۆاتسيالىق تەحنولوگيا پايدالانۋ جانە ميگرانتتار اراسىندا حاباردارلىقتى ارتتىرۋدى كوزدەيتىن كەشەندى ءتاسىل عانا ءوسىپ كەلە جاتقان قاۋىپتى جەڭۋگە كومەكتەسەدى. قازاقستان ەكونوميكالىق مۇددەسىن قورعاپ قانا قويماي، قوعامدا تۇراقتىلىقتى ساقتاپ، بارلىعىنا قاۋىپسىز جانە ادىلەتتى تۇردە جۇمىسقا ورنالاسۋدى قامتاماسىز ەتۋى ماڭىزدى»، - دەدى بيبىگۇل جەكسەنباي.

ەسكە سالايىق، بۇعان دەيىن اقتوبە وبلىسىندا شەتەلدىكتەر زاڭسىز جۇمىس ىستەگەنى حابارلاندى.

رەسمي دەرەككە سۇيەنسەك، قازاقستانعا مىنا ەلدەردەن ەڭبەك ميگرانتتارى كوپ كەلەدى:

قىتاي - 2804؛

وزبەكستان - 1996؛

تۇركيا - 880؛

ءۇندىستان - 781.