شەتەلدىك جىگىتپەن تانىسقان اقتوبەلىك ايەل كۇتپەگەن جايتقا تاپ بولدى

اقتوبە وبلىسىندا «شەتەلدىك كۇيەۋ جىگىت» اقتوبەلىك ايەلدى 2 ميلليون تەڭگەگە الداعان. پوليتسيا مالىمەتىنشە، مۇنداي الاياقتاردىڭ سحەمالارى جىلدار بويى وزگەرمەيدى: جابىرلەنۋشىگە الدىمەن شەت تىلىندە ماحابباتقا تولى حاتتار جولدايدى، سودان كەيىن ءارتۇرلى «يگى» سىلتاۋمەن ودان اقشا يەلەنەدى.

مىسالى، قازان ايىنىڭ سوڭىندا 42 جاستاعى اقتوبەلىك ايەلگە الەۋمەتتىك جەلىدە بەلگىسىز ەر ادام ءوزىن شەتەلدىك رەتىندە تانىستىرىپ، حابارلاما جازعان. وسىلايشا، «شەتەلدىك» پەن اقتوبەلىكتىڭ اراسىندا ماحابباتقا تولى حات الماسۋ باستالعان. «كۇيەۋ جىگىت» ايەلگە سىيلىقتار، زەرگەرلىك بۇيىمدار مەن شەتەلدىك ۆاليۋتا ساتىپ العانى تۋرالى حابارلاما جىبەرىپ، سەنىمدىلىك ءۇشىن سىيلىقتاردىڭ بەينەلەرى مەن فوتوسۋرەتتەرىن جىبەرگەن. ءارى قاراي بۇل سالەمدەمەلەردى جىبەرۋ ءۇشىن كەدەندىك باجدى تولەۋ قاجەتتىگىن ايتىپ، ايەلگە ەسەپ ايىرىسۋ شوتىن جولداعان. ايەل جىگىت كورسەتكەن شوتقا بانك كاسساسى ارقىلى 2 ميلليون تەڭگەدەن استام اقشا جىبەرگەن.

اقشانى العاننان كەيىن «كۇيەۋ جىگىت» بايلانىسقا شىعۋدى توقتاتقان، ال جابىرلەنۋشى الاياقتىڭ قۇربانى بولعانىن ءتۇسىنىپ، پوليتسياعا جۇگىندى. الاياقتىق فاكتىسى بويىنشا تەرگەۋ جۇرگىزىلىپ جاتىر.

پوليتسيا مالىمەتىنشە، ادەتتە، اقشا اۋدارعاننان كەيىن «شەتەلدىك كۇيەۋ جىگىتتەر» بىردەن ءىز-ءتۇزسىز جوعالىپ كەتكەن. ينتەرنەتتەگى تانىستىقتاردىڭ قاۋىپسىز ەمەس ەكەنى تۋرالى ءجيى ەسكەرتىلەتىنىنە قاراماستان، اڭعال ايەلدەر ءالى دە الاياقتاردىڭ ارباۋىنا ءتۇسىپ، ولارعا وزدەرىنىڭ ەڭبەكپەن تاپقان اقشاسىن جىبەرىپ، قارىزدار مەن نەسيەلەر الۋدا.