شەتەلدىك ب ا ق-تاعى قازاقستان: قىتايمەن گاز كەلىسىمى، قاشاعان سوتى، استانا اۋەجايىن جاڭعىرتۋ

 وسى اپتادا شەتەلدىك ب ا ق-تا قازاقستان مەن قىتاي اراسىنداعى گاز جەتكىزۋگە ارنالعان جاڭا كەلىسىمشارت، قازاقستاننىڭ ەكولوگيا جانە تابيعي رەسۋرستار مينيسترلىگىنىڭ قاشاعان بويىنشا سوت پروتسەسىنە قاتىستى مالىمدەمەسى، ب ا ءا-نىڭ Terminals Holding كومپانياسىمەن استانا اۋەجايىن مۋلتيمودالدى حاب رەتىندە دامىتۋ بويىنشا ىنتىماقتاستىق تۋرالى كەلىسىمگە قول قويىلعانى جايلى ماقالالار جاريالاندى. تولىعىراق Kazinform ساراپشىسىنىڭ شولۋىندا. 

Reuters: قازاقستان مەن قىتاي گاز جەتكىزۋ بويىنشا جاڭا كەلىسىمشارتقا قول قويدى

18-قازاندا Reuters اقپارات اگەنتتىگى قازاقستان پرەزيدەنتى قاسىم-جومارت توقايەۆتىڭ بەيجىڭگە ساپارى كەزىندە قازاقستاندىق QazaqGaz جانە قىتايلىق Petrochina International گاز جەتكىزۋ جونىندە جاڭا كەلىسىمشارتقا قول قويعانىن حابارلادى.

«كومپانيا ساياساتىنا بايلانىستى ءوزىن اتاۋدان باس تارتقان قىتاي ونەركاسىبىنىڭ وكىلى كەلىسىمشارت قولدانىستاعى كەلىسىمنىڭ جالعاسى ەكەنىن ايتتى»، - دەلىنگەن ماقالادا.

قازاقستان بىرنەشە جىلدان بەرى قىتايعا تابيعي گاز جەتكىزىپ كەلەدى، دەگەنمەن ۋاقىت وتە كەلە جەتكىزىلەتىن گاز مولشەرى ازايدى. باستاپقىدا بۇل تومەندەۋ سۇرانىستىڭ تومەندەۋىمەن بايلانىستى بولسا، كەيىنىرەك ىشكى تۇتىنۋدىڭ ارتۋى اسەر ەتكەن.

«رەيتەر اگەنتتىگىنىڭ رەسمي كەدەن دەرەكتەرىنە نەگىزدەلگەن ەسەبىنە سايكەس، قىتاي 2018-2022 -جىلدار ارالىعىندا قازاقستاننان جىلىنا ورتا ەسەپپەن 4,5 ميلليون مەتريكالىق توننا نەمەسە شامامەن 6,2 ميلليارد تەكشە مەتر تابيعي گاز يمپورتتالعان»، - دەلىنگەن ماقالادا.

Reuters: قازاقستان مينيسترلىگى قاشاعانداعى 5 ميلليارد دوللارعا قاتىستى سوت شەشىمىنە شاعىمداندى

16 قازاندا Reuters اقپارات اگەنتتىگى قاشاعان ءىرى مۇناي كەنىىشىنىڭ وپەراتورىنا قارسى 5 ميلليارد دوللارلىق سوت ءىسى جايلى ماقالا جاريالادى.

ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ سوت تالاپتى قاناعاتتاندىرماعان سوڭ مينيسترلىك اپپەلياتسيالىق شاعىم تۇسىرگەنىن ايتقان.

«استانا قاشاعانداعى سەرىكتەس كومپانيالارعا، سونداي-اق قاراشىعاناق گاز كوندەنساتى كەن ورنىن يگەرۋشى كومپانيالارعا قارسى حالىقارالىق اربيتراجعا شاعىم ءتۇسىردى»، - دەلىنگەن ماقالادا.

China Daily: قازاقستان «ءبىر بەلدەۋ، ءبىر جول» باستاماسى اياسىندا 1300 شاقىرىم تەمىر جول سالادى

China Daily گازەتى 18-قازاندا بەيجىڭگە ساپارمەن بارعان قازاقستان پرەزيدەنتى قاسىم-جومارت توقايەۆقا سىلتەمەمەن قازاقستان «ءبىر بەلدەۋ، ءبىر جول» باستاماسى اياسىندا الداعى ءۇش جىلدا 1300 شاقىرىم جاڭا تەمىرجول سالاتىنىن جازدى.

«قازاقستان مەن قىتاي حالىقتارىنىڭ مۇددەسىن، دوستىق پەن ماڭگىلىك ستراتەگيالىق ارىپتەستىك رۋحىن باسشىلىققا الا وتىرىپ، ءبىزدىڭ ەلىمىز «ءبىر بەلدەۋ، ءبىر جول» باستاماسىنىڭ جوعارى ماقساتىن ودان ءارى ىلگەرىلەتەدى»، - دەدى قاسىم- جومارت توقايەۆ.

Anadolu agency:قازاقستان يزرايلدى پالەستينالىق بەيبىت تۇرعىندارعا قارسى «بيلىكتى شامادان تىس پايدالانۋدان» اۋلاق بولۋعا شاقىرادى

تۇركيانىڭ Anadolu اگەنتتىگى 17-قازاندا قازاقستان سىرتقى ىستەر مينيسترلىگىنىڭ يزرايلدەگى قاقتىعىس تۋرالى رەسمي مالىمدەمەسى تۋرالى ماقالا جاريالادى.

«قازاقستان سەيسەنبى كۇنى يزرايل بيلىگىن پالەستينالىق بەيبىت تۇرعىندارعا قارسى «بيلىكتى پروپورتسيونالدى ەمەس پايدالانۋدان» اۋلاق بولۋعا شاقىردى. بۇل جاعدايدا حالىقارالىق قۇقىق نورمالارىن ساقتاۋ جانە پالەستينا حالقىنىڭ زاڭدى قۇقىقتارىن قامتاماسىز ەتەتىن بۇۇ قاۋىپسىزدىك كەڭەسىنىڭ ءتيىستى قارارلارىن ورىنداۋ وتە ماڭىزدى»، - دەلىنگەن ماقالادا.

Channel News Asia: قىتايدىڭ «ءبىر بەلدەۋ، ءبىر جول» باستاماسى ورتالىق ازياعا پايدا اكەلدى مە؟

سينگاپۋردىڭ Channel News Asia جاڭالىقتار ارناسى 17-قازاندا قىتايدىڭ «ءبىر بەلدەۋ، ءبىر جول» باستاماسىنىڭ ورتالىق ازياعا قالاي ىقپال ەتكەنى تۋرالى ماقالا جاريالادى.

جاڭالىقتار ارناسى Bri شەڭبەرىندەگى جوبالار قالاي جۇزەگە اسىرىلىپ جاتقانىن كورۋ ءۇشىن ورتالىق ازيا ەلدەرىنە باردى.

قازاقستاندا تىلشىلەر «BRI -دىڭ ەڭ ءورشىل جوبالارىنىڭ ءبىرى - «قورعاس قاقپاسى» ورنالاسقان، قىتايدىڭ قازاقستانمەن سولتۇستىك- باتىس شەكاراسى بويىنداعى ستراتەگيالىق ماڭىزى بار قالا - قورعاسقا باردى.

«مۇندا تاۋارلار ەۋروپاعا جول تارتپاي تۇرىپ، قىتاي پويىزدارىنان قازاقستاندىق پويىزدارعا تاسىمالدانادى. سەبەبى، قىتايدىڭ تەمىرجول ۆاگوندارىنىڭ ولشەمى قازاقستاندىق پويىزداردان تار، سوندىقتان قىتايلىق پويىزدار قازاقستان جولدارىمەن جۇرە المايدى»، - دەلىنگەن ماقالادا.

Agenzia Nova: استانا اۋەجايىن ب ا ءا كومپانياسى جاڭعىرتادى

يتاليانىڭ Agenzia Nova باسىلىمى 17-قازاندا قازاقستان مەن Emirati Terminals Holding اراسىنداعى كەلىسىمگە سايكەس استانا اۋەجايى مودەرنيزاتسيالانادى دەپ حابارلادى.

«قازاقستان پرەمەر-ءمينيسترى ءاليحان سمايىلوۆ پەن بىرىككەن اراب امىرلىكتەرىنىڭ Terminals Holding كومپانياسى اراسىندا قول قويىلعان كەلىسىمنىڭ ارقاسىندا قازاقستاننىڭ ەلورداسى استانا قالاسىنىڭ اۋەجايى ءىرى مۋلتيمودالدى حابقا اينالادى»، - دەلىنگەن ماقالادا.

ماقالادا ب ا ءا-نىڭ Terminals Holding كومپانياسى ەلوردا اۋەجايىنىڭ قىزمەتىن جان-جاقتى باعالاۋدى جۇزەگە اسىرىپ، كەيىننەن جولاۋشىلارعا قىزمەت كورسەتۋ ساپاسىن جانە جالپى اۋەجايدىڭ تيىمدىلىگىن ارتتىرۋ ءۇشىن جەدەل باسقارۋدى ءوز قولىنا الاتىنى تۋرالى جازىلعان.