شەتەلدىك اۋە كومپانيالارى قازاقستاننىڭ ءىرى قالالارىنا شەكتەۋسىز ۇشا الادى

شەتەلدىك اۋە كومپانيالارى 5- دارەجەلى «اۋە ەركىندىگى» بار وتاندىق ءبىرقاتار اۋەجايعا شەكتەۋسىز ۇشا الادى. بۇل تۋرالى ق ر كولىك مينيسترلىگىنىڭ ازاماتتىق اۆياتسيا كوميتەتى ءمالىم ەتتى، دەپ حابارلايدى Kazinform.

قازاقستان كولىك مينيسترلىگى باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ، اۋە كولىگىنىڭ قولجەتىمدىلىگى مەن دامۋى ءۇشىن قازاقستاندىق اۋە تاسىمالدار نارىعىنىڭ تارتىمدىلىعىن ارتتىرۋ ماقساتىندا «اشىق اسپان» رەجيمىن ودان ءارى جەتىلدىرىپ جاتىر. اتاپ ايتقاندا، مينيسترلىكپەن «اشىق اسپان» رەجيمىن ەنگىزۋ تۋرالى بۇيرىققا شەتەلدىك اۋە كومپانيالارىنا 5-دارەجەلى «اۋە ەركىندىگىن» پايدالانۋ قۇقىعىن بەرۋ ارقىلى بۇرىن-سوڭدى قولدانىستا بولعان شەكتەۋلەردى الىپ تاستاۋعا باعىتتالعان وزگەرىستەر ەنگىزىلدى.

وسىلايشا، شەتەلدىك اۋە كومپانيالارى قازاقستاننىڭ ءبىرقاتار اۋەجايىنا اۋە كەمەلەرىنىڭ تيپتەرى مەن جيىلىگىنە قاراماستان، ونىڭ ىشىندە باعىتتار بويىنشا شەكتەۋسىز 5-دارەجەلى «اۋە ەركىندىگىمەن» ۇشۋلاردى ورىنداۋ مۇمكىندىگىنە يە بولدى. قولعا الىنعان بۇل ءىس-شارالار باسەكەلەستىكتى ارتتىرۋعا مۇمكىندىك بەرىپ، ءوز كەزەگىندە اۋە بيلەتتەرىنىڭ قۇنىن تومەندەتۋگە جانە ۇشۋ گەوگرافياسىن كەڭەيتۋگە ىقپال ەتەدى دەپ كوزدەلىپ وتىر.

ايتا كەتەرلىگى، «اشىق اسپان» رەجيمى استانا، الماتى، شىمكەنت، اقتاۋ، اقتوبە، قاراعاندى، تۇركىستان، وسكەمەن، پاۆلودار، كوكشەتاۋ، تاراز، پەتروپاۆل، سەمەي قالالارىنىڭ اۋەجايلارىندا قولدانىلادى.