شەتەلدەگى 200 قازاق ۇيىمىنىڭ جەتەكشىلەرى قازاقستاندا باس قوسادى
شەتەلدەگى 200 دەن استام قازاق ۇيىمدارىنىڭ باسشىلارى، بەلسەندى جانە تانىمال تۇلعالارى قازاقستاندا باس قوسادى، دەپ حابارلايدى قازاقپارات.
قازاقستان رەسپۋبليكاسى سىرتقى ىستەر مينيسترلىگىنىڭ باستاماسىمەن «وتانداستار قورى» كوممەرتسيالىق ەمەس اكتسيونەرلىك قوعامى قازاقستاندا شەتەل قازاقتارىنىڭ «وتانداستار فورۋمى» اتتى كەزەكتى باسقوسۋىن ۇيىمداستىرادى.
فورۋم - شەتەلدەگى ەتنيكالىق قازاقتارمەن ءوزارا بايلانىستى جەتىلدىرۋ جانە ولاردى ەلىمىزدىڭ تۇراقتى دامۋىنا ۇلەسىن قوسۋ جولدارىن قاراستىراتىن جاڭا فورماتتاعى باسقوسۋ الاڭى.
فورۋمعا شەتەلدەگى 200 دەن استام قازاق ۇيىمدارىنىڭ باسشىلارى، بەلسەندى جانە تانىمال تۇلعالارمەن قاتار، وتاندىق عىلىم، ءبىلىم، مادەنيەت، سپورت، بيزنەس، مەديا، ساياسات، قوعامدىق ۇيىمدار جانە باسقا دا سالالاردىڭ كورنەكتى وكىلدەرى مەن بەلگىلى قاي̆راتكەرلەرى قاتىسادى.
فورۋمنىڭ ماقساتى - شەتەلدەگى قازاق ۇيىمدارىمەن ءوزارا ءتۇرلى ىنتىماقتاستىق ماسەلەلەرىن تالقىلاۋ؛ ەلىمىزدىڭ جاڭا كەزەڭدەگى مەملەكەتتىك ساياساتىمەن جانە ساياسي- ەكونوميكالىق رەفورمالارىمەن، سونداي-اق ۇلتتىق رۋحانياتقا قاتىستى زاماناۋي ترەندتەرمەن تانىستىرۋ؛ شەتەلدەگى قازاقتاردى قولداۋدا قازاقستاننىڭ جۇرگىزىپ وتىرعان ساياساتى، شەتەلدەگى قازاق جاستارىن قازاقستاندا ساپالى ءبىلىم الۋ جانە ءوز قابىلەتتەرىن ىسكە اسىرۋ، سونداي-اق ەلگە كوشىپ كەلەتىن قانداستارعا مەملەكەت تاراپىنان قابىلدانىپ جاتقان قولداۋ شارالارى تۋرالى اقپاراتتاندىرۋ.
فورۋم اياسىندا «ەل دامۋىنداعى قانداستاردىڭ ءرولى»، «وتانداستاردىڭ ينتەللەكتۋالدىق الەۋەتى - ۇلتتىق قۇندىلىقتاردى ىلگەرىلەتۋ درايۆەرى»، «XXI عاسىرداعى قازاق ءتىلى جانە بۇگىنگى مۇمكىندىكتەرى»، «مەديا جانە زاماناۋي ترەندتەر» تاقىرىپتارى بويىنشا سەسسيالار جانە «وتانداستار قورى» ك ە ا ق جاڭا جوبالىر تۇساۋكەسەرى مەن «تايقازان» فورۋمنىڭ قورىتىندى سەسسياسى وتەدى.
وسى ورايدا ەلىمىزدەگى بۇقارالىق اقپارات قۇرالدارى وكىلدەرىن، جۋرناليستەر قاۋىمىن «وتانداستار فورۋمىنا» بەلسەندى قاتىسۋعا شاقىرامىز.
فورۋمعا قاتىسۋشىلار سانى شەكتەۋلى بولعاندىقتان، وعان قاتىسۋ شاقىرتۋ ارقىلى جۇزەگە اسادى.
