شەتەلدەن اقشا الاتىنداردىڭ مالىمەتىن جاريالاۋ: قارجى مينيسترلىگى تۇسىنىك بەردى

قارجى ۆيتسە-ءمينيسترى ەرجان ءبىرجانوۆ شەتەلدىك كوزدەردەن اقشا الىپ وتىرعان قازاقستاندىقتاردىڭ جەكە دەرەكتەرىن جاريالاۋ ماسەلەسىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.

шетелден ақша алатындар
Фото: "ҚазАқпарат" ХАА

«ءبىز جەكە ادامداردىڭ دەرەكتەرىن جاريالاعان جوقپىز. ءبىز ءۇشىن سالىق تولەۋشى تۋرالى اقپارات ماڭىزدى. ەگەر سالىق تولەۋشى كاسىپكەرلىك قىزمەتتى جۇزەگە اسىرسا جانە ول بىزدە سالىق تولەۋشى رەتىندە تىركەلسە، سالىق ەسەپتىلىگىن ۇسىنسا، وندا 30-باپقا (سالىق كودەكسى) سايكەس سالىق تولەۋشىلەر تۋرالى دەرەكتەر سالىق قۇپياسى سانالمايدى. سوندىقتان ءبىز سالىق تولەۋشىلەر تۋرالى مالىمەتتەردى ولاردىڭ جەكە سايكەستەندىرۋ نومىرلەرى (ج س ن) بويىنشا ورنالاستىرا الامىز»، - دەدى ە. ءبىرجانوۆ سەناتتا تىلشىلەر سۇراعىنا جاۋاپ بەرە وتىرىپ.

ۆيتسە-مينيستر وسىنداي اقپارات ۆەدومستۆولاردىڭ سايتتارىندا ءبىرازدان بەرى جاريالانىپ كەلە جاتقانىن ايتتى.

بۇدان بۇرىن حابارلانعانداي، مەملەكەتتىك كىرىستەر كوميتەتى بيىلعى ءبىرىنشى جارتىجىلدىقتا شەتەلدىك كوزدەردەن اقشا نەمەسە وزگە دە مۇلىك العان تۇلعالاردىڭ ءتىزىمىن جاريالادى. قۇجاتقا ءارتۇرلى باعىتتا جۇمىس ىستەيتىن 240 ۇيىمنىڭ اتاۋى مەن ازاماتتاردىڭ ەسىمى ەنگەن. تىزىلىمدە ۇيىمدار مەن جەكە ادامداردىڭ بيزنەس-سايكەستەندىرۋ نومىرلەرى (ب س ن) جانە جەكە سايكەستەندىرۋ نومىرلەرى (ج س ن) كورسەتىلگەن.

كوميتەتتىڭ حابارلاۋىنشا، 2018-جىلدان باستاپ سالىق كودەكسىنە شەت مەملەكەتتەردەن، شەتەلدىكتەردەن، حالىقارالىق جانە شەتەلدىك ۇيىمداردان اقشا نەمەسە وزگە دە مۇلىك العان تۇلعالاردىڭ مەملەكەتتىك كىرىستەر ورگاندارىنا ەسەپ بەرۋى تۋرالى تالاپ ەنگىزىلگەن.

ال 2022-جىلى سالىق كودەكسىنىڭ 29-بابىنا وزگەرىس جاسالىپ، وعان سايكەس مەمكىرىستەر كوميتەتى ءوزىنىڭ ينتەرنەت-رەسۋرسىندا شەتەلدىك كوزدەردەن اقشا نەمەسە وزگە دە مۇلىك العان تۇلعالاردىڭ ءتىزىلىمىن جاريالاي الادى.

سوڭعى جاڭالىقتار