شەتەلدە جۇمىس ىستەيتىن قازاقستاندىقتاردىڭ قۇقىعىن قورعايتىن كەلىسىمدەر بەكىتىلەدى
استانا. KAZINFORM - قازاقستان باسقا ەلدەردە جۇمىس ىستەيتىن وتانداستاردىڭ ەڭبەك جانە الەۋمەتتىك قۇقىقتارىن قامتاماسىز ەتۋ بويىنشا 8 ۇكىمەتارالىق كەلىسىم بەكىتەدى.
بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ايتىپ بەردى.
مينيستر بۇعان دەيىن ەڭبەك كوشى-قونى سالاسىندا شەتەلدە جۇمىس ىستەيتىن قازاقستاندىقتاردىڭ قۇقىقتارىن قورعاۋ ماسەلەسى ەش قاراستىرىلماعانىن اتاپ ءوتتى.
«زاڭسىز كوشى-قوننىڭ كوبەيۋى جانە وتانداستارىمىزدىڭ قۇقىقتارىنىڭ بۇزىلۋى ولاردىڭ ەڭبەك قۇقىقتارىن قورعاۋدىڭ ءتيىمدى تەتىگىن ەنگىزۋدى تالاپ ەتەدى. بۇگىندە باسقا ەلدەردە جۇمىس ىستەيتىن قازاقستاندىقتاردىڭ ەڭبەك جانە الەۋمەتتىك قۇقىقتارىن قامتاماسىز ەتۋگە قاتىستى 8 جاڭا ۇكىمەتارالىق كەلىسىمگە قول قويۋ جۇمىستارى جۇرگىزىلۋدە»، - دەدى س. جاقىپوۆا مينيسترلىكتىڭ القا وتىرىسىندا.
ءمينيستردىڭ ايتۋىنشا، قازاقستاندى وڭتۇستىك كورەيانىڭ جۇمىسقا ورنالاسۋعا رۇقسات بەرۋ جۇيەسىنە (EPS) ەنگىزۋ بويىنشا ءتيىستى شارالار قابىلداندى.
«سونداي- اق، ءبىز قازاقستان ازاماتتارىنىڭ شەتەلدە زاڭدى ەڭبەك قىزمەتىن ۇيىمداستىرۋ ءۇشىن جەكە جۇمىسپەن قامتۋ اگەنتتىكتەرىمەن ءوزارا ءىس-قيمىلدى قامتاماسىز ەتۋدى جوسپارلاپ وتىرمىز»، - دەدى ەڭبەك ءمينيسترى.
بۇعان دەيىن سۆەتلانا جاقىپوۆا قازاقستاندا كوشى-قون پروتسەستەرى سيفرلاندىرىلاتىنىن ايتقان ەدى.
اۆتور
باقىتگۇل اباي قىزى
