شەتەلدە جاسالاتىن ونكولوگيالىق وتانىڭ ءبارىن قازاقستاندىق دارىگەرلەر دە ىستەي الادى - ونكوحيرۋرگ

Нұрлан Балтаев
فوتو: الماتى ءو ك ق

الماتى. KAZINFORM - الماتى ونكولوگيالىق ورتالىعىنىڭ حيرۋرگيالىق قىزمەتىنىڭ باسشىسى نۇرلان بالتايەۆ كەيبىر قازاقستاندىقتاردىڭ نەلىكتەن ءوز ەلىندە ەمەس، شەتەلدە ونكولوگيالىق تەراپيا مەن حيرۋرگيالىق ەمدەلگەندى قالايتىنىن ايتتى.

«ءبىزدىڭ كەيبىر وتانداستارىمىز مەديتسينالىق تۋريزممەن الىس-جاقىن شەتەلگە بارادى. دەگەنمەن ول جاقتا كورسەتىلەتىن كومەكتى ءبىزدىڭ ەلدە دە تەگىن الۋعا بولادى. شەتەلدىك كلينيكالاردا ماماندار قولدانىلعان ەمدەۋ ءادىسى ءۇشىن ەشقانداي جاۋاپكەرشىلىك كوتەرمەيدى. ءبىز ءبارىمىز ءبىر حاتتاما بويىنشا جۇمىس ىستەيمىز. سايكەسىنشە، قازاقستاندىق ادىستەر وسى حاتتامالارعا بەيىمدەلگەن. مۇنىڭ ءبارى ناۋقاستىڭ جاعدايىنا بايلانىستى. ەشقانداي ايىرماشىلىق جوق. شەتەلدىك ەمحانالاردا قىزمەت كورسەتۋ جاقسىراق. ياعني، قوماقتى اقشاعا جەكە دارىگەر مەن جەكە مەدبيكە بەرەدى. بارلىق ايىرماشىلىق وسى»، - دەدى ول.

ايتۋىنشا، الەمدە بار ءادىستىڭ ءبارىن قازاقستان دا قولدانادى.

«ءبىز ۇزاق ۋاقىت بويى بارلىق ورگانعا شاعىن ينۆازيۆتى حيرۋرگيالىق ادىستەردى قولدانىپ كەلەمىز. ءبىز قاشان دا شەتەلدەن كەلگەن ارىپتەستەرىمىزبەن تاجىريبە الماسامىز، ولار ءبىزدىڭ دەڭگەيىمىزدى، اسىرەسە لاپاروسكوپيالىق حيرۋرگيانى جوعارى باعالايدى. بەس جىل بۇرىن شاعىن ءينۆازيۆتى حيرۋرگيا، ياعني كەسۋسىز جاسالاتىن وتا، بىزدە 10 پايىز بولعان. قازىر بىزدە جاسالاتىن بارلىق وتانىڭ 50 پايىزدان استامى شاعىن ينۆازيۆتى ادىسپەن جاسالادى. ونىڭ ۇستىنە بۇل وتانىڭ بارلىعىنا مەملەكەت كەپىلدىك بەرەدى»، - دەيدى مامان.

سپيكەردىڭ سوزىنشە، ونكولوگيا تەك حيرۋرگيالىق جولمەن ەمدەلەتىن اۋرۋ ەمەس، ونكولوگيالىق اۋرۋدى ەمدەۋ قيىن ءارى قىمبات. وتادان باسقا، ناۋقاسقا حيميوتەراپيا جانە ساۋلەلىك تەراپيا قاجەت بولۋى مۇمكىن.

«مۇنىڭ بارلىعى، ارينە، شەتەلدە قىرۋار قارجىنى قاجەت ەتەدى. وڭتۇستىك كورەيا، تۇركيا نە گەرمانيادا قولدانىلاتىن بارلىق زاماناۋي تەحنولوگيا ءبىزدىڭ تۇرعىندارعا تەگىن بەرىلەدى. تەك 2023 -جىلدىڭ وزىندە الماتى ونكولوگيالىق ورتالىعىندا 2681 وپەراتسيا جاسالدى. وتالاردىڭ %55 دا شاعىن ينۆازيۆتى ءادىس قولدانىلدى»، - دەيدى ول.

ونكولوگيالىق ورتالىقتا حيميوتەراپيانىڭ 50 گە جۋىق ءتۇرى، 40 تان استام ماقساتتى جانە گورموندىق پرەپارات قولدانىلىپ، سونىڭ ارقاسىندا 18790 ناۋقاس حيميوتەراپيالىق ەم العان.

«قاتەرلى ىسىككە شالدىققان 1064 ناۋقاسقا 19 مىڭعا جۋىق ساۋلەلىك تەراپيا سەانسى جاسالدى. 10 مىڭعا جۋىق ادام امبۋلاتورلىق حيميوتەراپيا كابينەتىندە ەم الدى»، - دەيدى ونكولوگ.

 

 

اۆتور

الما مۇقانوۆا

سوڭعى جاڭالىقتار