شەتەلگە كەتكەندەرگە 8 ميلليون تەڭگەگە ءدارى-دارمەك رەسىمدەۋ دەرەكتەرى انىقتالدى - اۋديت
استانا. KAZINFORM - مەديتسينالىق قىزمەتتەر كورسەتۋگە بولىنگەن قاراجاتتى ءتيىمسىز پايدالانۋ دەرەكتەرى انىقتالدى. بۇل تۋرالى ماجىلىستە م ءا م س جۇيەسىن ودان ءارى جەتىلدىرۋ تاقىرىبىنا ارنالعان ۇكىمەت جوعارى اۋديتورلىق پالاتانىڭ مۇشەسى نۇرلان نۇرجانوۆ ءمالىم ەتتى.

- اۋديت بۇكىل دەنساۋلىق ساقتاۋ جۇيەسى مەن نەگىزگى مەملەكەتتىك ورگانداردىڭ ءبىرىڭعاي اقپاراتتىق ورتاسىنىڭ اراسىندا بايلانىستىڭ جوق ەكەندىگىن كورسەتتى. ماسەلەن، دەنساۋلىق ساقتاۋ، ىشكى ىستەر جانە ادىلەت مينيسترلىكتەرىنىڭ اقپاراتتىق جۇيەلەرىنىڭ دەرەكتەرىن سالىستىرۋ كەزىندە شەتەلگە تۇراقتى تۇرۋعا كەتكەن ازاماتتارعا 8 ميلليون تەڭگەگە ءدارى-دارمەك رەسىمدەۋ فاكتىلەرى انىقتالدى. كەلەسى ماڭىزدى اسپەكت - قارجىلىق ءتارتىپ پەن ەسەپتىلىك. اۋديت كەزەڭىندە امبۋلاتوريالىق ءدارى-دارمەكپەن قامتاماسىز ەتۋ جانە تەگىن كەپىلدەندىرىلگەن مەديتسينالىق كومەك ەسەبىنەن مەديتسينالىق قازمەتتەر كورسەتۋگە بولىنگەن قاراجاتتى ءتيىمسىز پايدالانۋ 31 ميلليارد تەڭگەنى، ونىڭ ىشىندە ۇلتتىق قوردىڭ قاراجاتى 13,2 ميلليارد تەڭگەنى قۇرادى. تيىمسىزدىكتىڭ نەگىزگى سەبەپتەرى - ساپاسىز جوسپارلاۋ، ياعني ۋاقتىلى قۇقىقتىق قۇجاتتاردى بەكىتپەۋ، قالدىقتاردى ەسكەرمەۋ جانە باسقا دا ماسەلەلەر، - دەدى ن. نۇرجانوۆ.
ونىڭ ايتۋىنشا، الەۋمەتتىك مەديتسينالىق ساقتاندىرۋ قورىنىڭ رەسپۋبليكالىق بيۋدجەت پەن مەديتسينالىق ساقتاندىرۋ جۇيەسىنىڭ قاراجاتتارىنىڭ پايدالانۋىنا قاتىستى قارجىلىق ەسەپتەردى قازاقستان رەسپۋبليكاسىنىڭ بۋحگالتەرلىك ەسەپ جانە قارجىلىق ەسەپتىلىك تۋرالى زاڭناما اياسىندا قالىپتاستىرىپ، ۇسىنباعاندىعى انىقتالدى.
بۇدان بۇرىن حابارلانعانداي، 2024 -جىلى جوعارى اۋديتورلىق پالاتا الەۋمەتتىك مەديتسينالىق ساقتاندىرۋ قورى جانە ونىڭ وڭىرلىك فيليالدارى قىزمەتىنىڭ تيىمدىلىگىنە مەملەكەتتىك اۋديت جۇرگىزدى.
الەۋمەتتىك مەديتسينالىق ساقتاندىرۋ قورىنىڭ قارجىلىق مودەلىندە ءبىرقاتار كەمشىلىك انىقتالدى.
اۆتور
رۋسلان عابباسوۆ