شەتەلگە جارتى جىل بويى كارتوپ شىعارىلمايتىن بولدى
جارتى جىل بويى شەتەلگە ەلىمىزدەن كارتوپ شىعارىلمايتىن بولدى. اۋىل شارۋاشىلىعى ءمينيسترى ايداربەك ساپاروۆتىڭ ەكسپورتتى تىيۋعا قاتىستى بۇيرىعى كۇشىنە ەندى، - دەپ حابارلايدى ك ت ك تەلەارناسى.

سىرتقى سۇرانىس ارتۋىنان كارتوپتى شارۋالار بيىل ەكسپورتتاعان ءتيىمدى دەپ شەشكەن. پايداسى دا كوپ. سونىڭ كەسىرىنەن جىل باستالماي جاتىپ- اق ەلدەگى دۇكەندەردە ونىڭ قۇنى شارىقتاپ شىعا كەلدى. شەنەۋنىكتەر شەكتەۋ قويۋدان باسقا امال قالمادى دەپ وتىر. تىيىمعا ىلىكپەگەن رەسەي مەن بەلارۋستە كارتوپ جەتكىلىكتى. كەرىسىنشە، قازاقستاننىڭ باتىس وڭىرىنە وسى ەلدەردەن جەتكىزىلەدى. ەكسپورتقا قاتىستى شەكتەۋدىڭ ەۋرازيالىق ەكونوميكالىق وداققا مۇشە ەلدەرگە قاتىسى جوق.
قازىر تۇراقتاندىرۋ قورىنداعى كوكونىستى شىعارىپ، ايماقتاردا مونيتورينگ توبى قۇرىلعانىمەن، كارتوپ ارزانداماي تۇر. تەك سولتۇستىك جانە ورتالىق وڭىرلەردە ارزانىراق.
قىزىلجار مەن كەرەكۋ جاقتا كارتوپ 270 تەڭگە تۇرسا، جامبىل وبلىسىندا 375 تەڭگە، باتىستاعى اقتوبە مەن اقتاۋ قالالارىندا 400 تەڭگەدەن اسادى.
«ەۋرازيالىق ەكونوميكالىق وداققا مۇشە مەملەكەتتەرگە اكەتۋدى قوسپاعاندا، قازاقستان رەسپۋبليكاسىنىڭ اۋماعىنان بارلىق كولىك تۇرىمەن جاڭا پىسكەن نەمەسە سالقىنداتىلعان كارتوپ شىعارۋعا التى اي مەرزىمگە تىيىم سالۋ ەنگىزىلسىن. وسى بۇيرىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى»، - دەپ جازىلعان مالىمەتتە.
بۇعان دەيىن نە بەلگىلى؟
قازاقستاننىڭ ءتۇرلى وڭىرلەرىندە كارتوپتىڭ باعاسى ەكى ەسەگە دەيىن ءوستى. اقتوبەدە قاڭتاردىڭ باسىندا كارتوپتىڭ ءبىر كەلىسى 200 تەڭگەدەن اسسا، كەيىنگى اپتادا 388 تەڭگەگە دەيىن كوتەرىلدى. جەتىسۋدا باعا 400 تەڭگەدەن اسىپ كەتتى. ەڭ قىمبات كارتوپ استانادا ساتىلدى، كەلىسى - 455 تەڭگە.
كەيىنىرەك بۇل ماسەلەگە قاتىستى ۇكىمەت مالىمدەمە جاسادى. ساۋدا جانە ينتەگراتسيا مينيسترلىگى دە ماسەلە باقىلاۋدا ەكەنىن حابارلادى.
Massaget.kz