شەتەلگە شىعاتىن استانالىقتارعا ۆاكسينا الۋ ۇسىنىلدى
استانا. KAZINFORM - استانا قالاسىنىڭ باس مەملەكەتتىك سانيتاريالىق دارىگەرى سارحات بەيسەنوۆا ءتۇرلى ينفەكسيالاردان قورعانۋ ماقساتىندا ەرەسەكتەر مەن بالالارعا ۆاكسينا الۋعا كەڭەس بەردى.
«وڭتايلى يممۋندى ساقتاۋدىڭ جولى - ەكپە الۋ. ۆاكسينا قولايلى ەپيدەميولوگيالىق جاعدايدى ساقتاۋعا مۇمكىندىك بەرەدى. ءتۇرلى سەبەپتەرمەن نەمەسە تىكەلەي باس تارتىپ ۆاكسينا الماعان ادامداردىڭ ينفەكسيا جۇقتىرۋ قاۋپى جوعارى. ينفەكسيانى جۇقتىرۋدىڭ ارتى اسقىنۋعا الىپ كەلۋى مۇمكىن»، - دەدى سارحات بەيسەنوۆا استانا قالاسىنىڭ كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق ەلوردانىڭ باس سانيتارى شەتەلگە ساپار الدىندا ەكپە العان ءجون دەپ سانايدى.
«جاز مەزگىلى دەمالىس ماۋسىمى ەكەنى بەلگىلى. سوندىقتان شەتەلگە بارار الدىندا پروفيلاكتيكالىق ەكپەلەرمەن الدىن الا ساقتانۋىمىز كەرەك. سەبەبى، ۆاكسينالاردىڭ قولدانۋ ەرەجەلەرى ءارتۇرلى، يممۋنيتەتتىڭ قورعانىش قالقانىن قالىپتاستىرۋ ءۇشىن ۋاقىت قاجەت. ەسىڭىزدە بولسىن، ۆاكسيناتسيا بالالاردى دا، ەرەسەكتەردى دە ينفەكسيانىڭ اۋىر زارداپتارىنان قورعاۋدىڭ وتە ءتيىمدى ءارى قاۋىپسىز ءادىسى»، - دەيدى ول.
اۆتور
داۋلەت ىزتىلەۋ
